Ի դեպ. Առաջնորդական փոխանորդին առաջադրված մեղադրանքի մասին
Ի դեպԻ դեպ, դեռ չէինք հասցրել «մարսել» Ամենայն Հայոց կաթողիկոս Գարեգին 2-ի՝ ՀՀ 2-րդ նախագահ Ռոբերտ Քոչարյանի խափանման միջոցին առնչվող հայտարարությունից հետո ստեղծված աղմուկը, նախօրեին արձանագրվեց հերթական տեղեկատվական «պայթյունը»։ Հայտնի դարձավ, որ ՀՀ ազգային անվտանգության ծառայությունը, հանցավոր ճանապարհով ստացված եկամուտների օրինականացման դեմ պայքարի՝ օրենքով վերապահված լիազորությունների շրջանակում, մեղադրանք է առաջադրել Հայ Առաքելական Եկեղեցու թեմերից մեկի առաջնորդական փոխանորդին: Անուն նշված չէր, բայց կարծես ակնհայտ է, որ խոսքը Արարատյան թեմի առաջնորդ Նավասարդ Կճոյանի մասին է, իսկ քրեական գործը առնչվում է հայտնի օֆշորային սկանդալին։
Հիշեցնեմ, դեռևս 2013 թվականին, «Հետք» պարբերականը բացահայտել էր օֆշորային մի խոշոր սկանդալ, որում ներգրավված էին Արարատյան հայրապետական թեմի առաջնորդական փոխանորդ Նավասարդ Արքեպիսկոպոս Կճոյանը, գործարար Փայլակ Հայրապետյանը, Կճոյանի սանիկը՝ Աֆրիկայում ադամանդի բիզնեսում ներգրավված Աշոտ Սուքիասյանը եւ այն ժամանակվա վարչապետ Տիգրան Սարգսյանը: Վերջինս իրեն ուղղված մեղադրանքներն անհեթեթություն էր համարում, ասում էր որ իր նման օֆշորային գոտիներից ու օֆշորային հաշիվներից տեղեկացված մարդը չէր կարող օֆշորային գոտում իր անունով ձեռնարկություն ստեղծել ՝ նպատակ ունենալով Հայաստանում խլել ինչ որ մեկի բիզնեսը։
Բաjց Հետքի բացահայտումն այլ բան էր ասում՝ հենց նրանք էին Կիպրոսում գրանցված օվշորային ընկերության բաժնետերերը։ Գործարքի արդյունքում գործարար Փայլակ Հայրապետյանը ունեզրկվել էր։ Սկանդալից որոշ ժամանակ անց Տիգրան Սարգսյանը պաշտոնանկ եղավ 2014-ի ապրիլին, հետո հայտնվեց ԵԱՏՄ պատասխանատու պաշտոնում, գործարար Աշոտ Սուքիասյանը հայտնվեց բանտում, Նավասարդ Կճոյանն իր հոգեւոր գործերով էր՝ առաջնորդում էր Արարատյան հայրապետական թեմը, Փայլակ Հայրապետյանն էլ պայքարում էր իր իրավունքների վերականգնման համար ու միայն երեկ, լրատվամիջոցներից է տեղեկացել, որ Նավասարդ Կճոյանի նկատմամբ քրեական գործ է հարուցվել։
Ի դեպ, եւս մեկ կարեւոր նրբերանգ՝ 2017 թվականի հոկտեմբերին 16 տարվա ազատազրկման դատապարտված Աշոտ Սուքիասյանը այս տարի հունվարին ազատ է արձակվել, Վերաքննիչ դատարանը բավարարել է նրա բողոքը եւ արդարացրել նրան։
Ինչեւէ, ԱԱԾ հաղորդագրությունը պայթյունի էֆեկտ առաջացրեց, իսկ առջեւում չափազանց ուշագրավ զարգացումներ են սպասվում, ինչպես ժողովուրդն է ասում ՝ «այս խմորը դեռ շատ ջուր կքաշի»։ Ի դեպ, չար լեզուներն ասում են, թե բիզնեսից բարձրաստիճան մարդկանց միջոցով գումար դուրս բերելու սխեմաները բացառիկ կամ եզակի չեն։
