Չէր կարելի և չի կարելի նման մասշտաբի և կարևորության նախկին պաշտոնյաներին տեսադաշտից դուրս թողնել. Հայկ Մարտիրոսյանը՝ Կուտոյանի մահվան մասին

ArmDaily.am-ի զրուցակիցն է քաղաքագետ Հայկ Մարտիրոսյանը։

-Վերջին մի քանի օրերի ընթացքում հանրության և լրատվամիջոցների ուշադրության կենտրոնում է նախկին ԱԱԾ տնօրեն Գեորգի Կուտոյանի մահվան դեպքը, որը, ըստ նախնական վարկածի, որակվում է որպես ինքնասպանություն: Ի՞նչ կասեք այս մասին:

-Ես դժվարանում եմ հավատալ ինքնասպանության վարկածին: Ու քանի որ արդեն մի քանի անգամ առիթ ունեցել եմ ասելու՝ կարճ կձևակերպեմ: Չէր կարելի և չի կարելի նման մասշտաբի և կարևորության նախկին պաշտոնյաներին տեսադաշտից դուրս թողնել: Դա ուղղակի անթույլատրելի թողտվություն է: Կուտոյանի մահվամբ՝ անցյալի որոշ մութ հանգամանքների վերաբերյալ ճշմարտությունն իմանալու մեր առհավետ կորսված շանսերի ծավալն այլևս մենք երբեք կարող է չգիտակցենք:

-Շուրջ չորս ամիս առաջ իր բնակարանում մահացած գտան նախկին ոստիկանապետ Հայկ Հարությունյանին: Հիմնվելով Կուտոյանի և Հարությունյանի մահվան դեպքերի միջև առկա մի շարք նմանությունների վրա՝ նախկին ուժային կառույցների ղեկավարներ, դատարկ ալկոհոլային խմիչքի շշեր, դեպքի վայրը՝ սեփական բնակարաններ, նախնական վարկածը՝ անվանական հրազենով ինքնասպանություն և հարուցված քրգործ՝ ինքնասպանության հասցնելու հոդվածով ի՞նչ եզրահանգում կարելի է անել:

-Վրաստանի նախկին վարչապետ Զուրաբ Ժվանիան էլ մահացավ մի բնակարանում, որտեղ խմիչք կար, ասում են՝ նարդի, գազի արտահոսք և այլն: Վրաստանում այսօր էլ քչերն են հավատում, որ դա թունավորում էր: Այսպիսի կարևորության դեմքերի վաղաժամ մահերը միշտ էլ բազում հարցեր են առաջ բերելու: Պետության, հատկապես՝ իրեն հեղափոխական երեւակայող իշխանության կարևորագույն պարտավորությունն է նման մարդկանցից քաղել ողջ տեղեկատվությունը, որին նրանք տիրապետում են, զուգահեռաբար երկրում հաստատելով այնպիսի ապահով և անվտանգության առումով վերահսկվող մթնոլորտ, որ նման դեպքերում անգամ սպանության կասկած չառաջանա քաղաքացիների մոտ: Եվ ևս մի հարց: Ինչո՞ւ պետք է նախկին ռեժիմի մի քանի հարյուր պաշտոնյաներ պահպանեն իրենց «նվիրաբերված» կամ անվանական զենքերը, եթե անգամ դրանք լիովին «օրինական» են: Զենք կրելը Հայաստանում արտոնություն է և ոչ իրավունք: Ինչո՞ւպետք է նախկին ռեժիմի կարևորագույն կամ ամենասկանդալային մի շարք դեմքեր այդպիսի արտոնություններ պահպանեն հետհեղափոխական երկրում, իսկ հեղափոխություն արած ժողովուրդը զենք ունենալու համար քրեական հետապնդման ենթարկվի: Ես ընդհանրապես դեմ եմ մարտական զենքի կրմանն ու ունենալուն, բայց եթե օրենք կա՝ ապա հետհեղափոխական երկրում այն պետք է բոլորի համար լինի: Կա՛մ բոլորը զենք չպետք է ունենան, կա՛մ բոլորը պետք է ունենան:

-Գեորգի Կուտոյանի մահվան դեպքը արդեն երրորդն է ուժային կառույցների նախկին ղեկավարների շրջանում: Սա կարո՞ղ է դիտարկվել որպես սպառնալիք՝ ուղղված երկրի ներքին անվտանգությանը:

-Ի՞նչ սպառնալիք: Սպառնալիք է մի բան, որ դեռևս միայն սպառնում է: Հայաստանի ներքին անվտանգությունն, իմ կարծիքով, արդեն խաթարված է: Այն իրավիճակը, որ կա այսօր երկրում արդյոք այդ խաթարման վկայությունը չէ՞: Ես կարծում եմ, որ հիմա մենք որպես հասարակություն՝ այլևս մասնատված ենք, շատ ավելի թույլ և շատ ավելի խոցելի: Մեզ թույլ չի տալիս սուզվել միայն մեր ազգային իմաստնությունը: Բայց իմաստնությունն այդ, ցավոք սրտի, քնի շատ երկար փուլեր ունի և հիմա մենք նոր քուն ենք մտել:

Իզաբելա Սուլթանյան

Այս թեմայով Հիմնավորվել է՝ ինքնասպանության դեպք է տեղի ունեցել. ՔԿ-ն՝ Կուտոյանի մահվան մասին (տեսանյութ) Գեորգի Կուտոյանի ինքնասպանության վարկածը հաստատվել է Կուտոյանի կողմից ֆինանսական խնդիրներ ունենալու վերաբերյալ որեւէ փաստական տվյալներ չեն ստացվել. ՔԿ Երբ իմացել եմ, միայն մեկ հրահանգ եմ տվել. վարչապետը՝ Կուտոյանի մահվան մասին (տեսանյութ) Գեորգի Կուտոյանի ատրճանակի վրա դեպքի օրը խլացուցիչ չի հայտնաբերվել. ՔԿ