Ի դեպ. Բալային համակարգի մասին

Ի դեպ, հունվարի մեկից ուժի մեջ է մտել ճանապարհային երթեւեկության խախտումների այսպես կոչված «բալային համակարգը»։ Սա նշանակում է, որ յուրաքանչյուր վարորդի տրված է 9 բալ, որոնք կնվազեն ճանապարհային երթևեկության կանոնները խախտելու հետեւանքով։ Մեկ տարվա ընթացքում այդ բալերը սպառելու դեպքում նրա վարորդական իրավունքը կասեցվում է 6 ամիս ժամկետով։ 1 տարվա ընթացքում երկրորդ անգամ 9 միավորը սպառելու դեպքում անձը կզրկվի մեքենա վարելու իրավունքից արդեն 1 տարի ժամկետով:

Ընդհանուր առմամբ թվով 31 անուն խախտումների համար են նոր կարգավորումներ գործելու տուգանքների ու հանվող բալերի տեսքով, կան նաեւ քրեական պատասխանատվություն ենթադրող խախտումներ։ Ինչպես եւ սպասվում էր, նոր համակարգն առաջացրել է հանրային մեծ հետաքրքրություն ու տարաբնույթ,հակադիր ու իրարամերժ մեկնաբանություններ։

Մի մասը գտնում է, որ այս համակարգն անհրաժեշտ էր՝ ճանապարհային երթեւեկությունը կարգավորելու, այն առավել անվտանգ դարձնելու, ՃՏՊ հետեւանքով զոհերի թիվը նվազեցնելու համար։ Մյուս մասը՝ ճիշտ հակառակը, պնդում է, որ համակարգն ուղղակի ապտակ է ժողովրդին, ստորացում, որ երթևեկությունը կարգավորելու փոխարեն այն ավելի է ցածրացնելու վարորդների և նրանց ընտանիքների կյանքի որակը, սահմանափակելու է մարդկանց ազատությունները և հարվածելու է բոլորի գրպանին անխտիր: Թե ինչպիսի ազդեցություն կունենա այս համակարգը ճանապարհային երթեւեկության կարգավորման ու մարդկանց սոցիալական վիճակի վրա, ցույց կտա ժամանակը եւ դրա համար երկար սպասել չի պահանջվի. Մի քանի ամիս հետո առավել հստակ պատկեր կուրվագծվի։

Իսկ մինչ այդ, բազմաթիվ հարցեր են առաջանում, որոնց հստակ պատասխանը չկա։ Օրինակ՝ ի՞նչ հաշվարկներից ելնելով է ընտրվել բալերի 9-ը թիվը։ Ինչու 9-ը եւ ոչ 7 կամ 12։Կա՞ գոնե մոտավոր վիճակագրություն, թե ամսական կամ տարեկան որքան ինչ ինչ վտանգավորության խախտում է անում միջին վիճակագրական վարորդը։ Կամ՝ ինչպե՞ս է որոշվել այս կամ այն խախտման վտանգավորության աստիճանը, տուգանքի ու հանվող բալերի քանակը։

Օրինակ. Ինչպե՞ս է որոշվել, որ ամրագոտի չկապելը, որի համար նախատեսվում է 10000 դրամ տուգանք ու հանվում է մեկ բալ, ավելի լուրջ վտանգ է դիմացինի համար, քան վազանցի կանոնները խախտելը, որ նախատեսում է 1 բալի նվազեցում, բայց 5000 դրամ տուգանք։ Այս շարքը երկար կարելի է շարունակել։ Ի դեպ. Այս փոփոխությունները կատարում է այն կառավարությունը, որի ղեկավարը ժողովրդային շարժման առաջնորդ եղած ժամանակ պնդում էր, որ արագաչափ սարքերը պետք է հանվեն միանշանակ, տեսախցիկների տվյալներն օգտագործվեն միայն երթեւեկության հոսքերի օպերատիվ կառավարման համար, իսկ քաղաքացին «տուգանվելու մատերիալ չէ»։

Հիմա կարո՞ղ է պարզվել, որ իրավիճակ է փոխվել եւ քաղաքացին լավ էլ «տուգանվելու մատերիալ է»։