ArmDaily.am-ը շարունակում է «Ցանցահեն» շարքը, որում անդրադառնում ենք Ֆեյսբուքում ակտիվ, հայտնի և սիրված ֆեյսբուքահայերին։ Այս անգամ մեր «Ցանցահենը» Անի (Սաննիէ) Սարգսյանն է։
-Անի, Ֆեյսբուքում նաև Սաննիէ, ինչո՞ւ հենց Սաննիէ, ինչ-որ պատմություն կա՞ կապված Ձեր անվան հետ։
-Մանկուց՝ այսինքն մոտ 20 տարի առաջ դեռ Լեհաստանում, անունս հայերենով «Անի», իսկ անգլերենով «Annie» էինք գրում, հետո նաեւ անձնագրում ու ամենուր։ Հայաստանում, երբ դեռ Annie-ն բոլորովին տարածված չէր (ես կասեի՝ մարդիկ դեռ զարմանում էին Annie կարդալով), տարբերելու համար, թե որ Անիի մասին է խոսքը, բոլորն ինձ դիմում էին անունս ուղղակի տառ առ տառ կարդալով՝ «Աննիէ»։ Էդպես դարձա Աննիէ նաեւ հայերենում։ Տարիներ հետո, երբ ֆոտոստուդիա ունեի, բրենդի անունը որոշելիս օգտագործեցի ազգանվանս առաջին տառը ու ստացա Sannie բռենդը։
Իսկ քանի որ տարիներ անց արդեն շատ Անիներ նույնպես դարձան Annie, ինձ սկսեցին բրենդիս անունով կոչել` Սաննիէ։ Հիմա հուսամ այսքանով կբավարարվեմ ու հորս ու մորս անունների սկզբնատառերը չեմ ավելացնի սկզբում (էստեղ ծիծաղ խորհրդանշող ինչ-որ հիմար նշան)։
-Սուրբ Ծնունդն է այսօր, ու հաստատ 1 րոպե 6 վայրկյան տևողությամբ Սուրբ ծննդյան շնորհավորանքը ստացել եք։ Հիմա հարց՝ ո՞րն է Ձեզ ավելի ներվայնացնում, այդ ձայնագրությո՞ւնը, թե՞ մեծացրեք երեխայիս նկարը լայքեք տեքստը պարունակող նամակները։
-Երբեք ոչ մի բառով չեմ արձագանքում երկու նամակներին էլ։ Նման հավասարություն գոյություն չունի աշխարհում, քան ներվայնությունս հանդեպ այդ երկուսի։ Եթե պիտի նույն ձայնագրությունն անէմոցիա ուղարկեք բոլորին, ո՞րն է դա ուղարկելու իմաստը։ Կամ, եթե պիտի չկարողանաք Ձեր երեխային մեծացնել, ինչի՞ եք ընդհանրապես ունենում։
(Բայց բացահայտեմ, որ երեխաների նկարները թեկուզ նյարդայնանալով, բայց միշտ թաքուն բացում, լայքում եմ ու ոչ էլ գրում, որ լայքեցի։ Եթե իրենց կյանքի իմաստը դա է, ինչ արած)։
-Ֆեյսբուքյան այս մի քանի օրվա թեմաներն են՝ բալային համակարգ, Ավստրալիայի հրդեհները, Դիանա անունով ֆեյքը, որը ԱԱԾ-ն բացահայտել է, Սուլեյմանիի սպանություն... Բայց կա մի թոփ թեմա, որի մասին մենակ Անին գիտի, ո՞րն է դա։
-Եթե որեւէ թեմայի մասին միայն մի հոգի գիտի, էլ ի՞նչ թոփ թեմա (էն ծիծաղող նշանից)։ ։)))
-Շարք եք սկսել՝ ԱմանորյաՍուտՍաննիէ, որտեղ հնչում են այս օրերի ամենատարածված ստերը։ Իսկ հիմա կասե՞ք որն է ամենամեծ Ֆեյսբուքյան ՍուտՍաննիէ-ն։
-Շարքս նկատվել է, այսինքն լավ միտք էր. հույս չունեի, որ մամայից բացի կարդացող կլիներ։ ։)
Ամենամեծ Ֆեյսբուքյան սուտն այն է, որ մարդիկ իրենց ծննդյան հաջորդ օրը գրում են «Բոլորիդ սիրում եմ»։ Հո դուք պարապ չե՞ք։ Ո՞նց կարող եք բոլորին սիրել։
Հանրային ստում են, էլի։ Մի քիչ ավելի անկեղծ եղեք։ Ես հավատում եմ ձեր ուժերին։
- Նամակներ հաստատ շատ-շատ եք ստանում։ Կա՞ մի նամակ որն այնքան է տպավորվել Ձեզ մոտ, որ ընկերներին միշտ պատմում, ծիծաղում եք։ Կկիսվե՞ք մեզ հետ։
-Ինձ գրած նամակներից շատերն են տպավորվել, բայց այլ մարդու գրածով կիսվելը սխալ կհամարեմ։ Փոխարենը կիսվեմ իմ պատասխանով։
Մի տղա մնացած բոլորից ավելի համառ գտնվելով մեկ ամիս շարունակ ամեն օր գրում էր պարտադիր՝ ինքն իրեն խոսելով, պատմելով օրվա մասին։ Ոչ մի տառ չէի պատասխանում՝ համբերատար սպասելով, որ մի օր հետը մի բան կպատահի, այլեւս չի գրի։ Բայց չպատահեց։ Որոշեցի մի հիմարություն փորձել։ Լատիներեն տառերով եւ շատ վատ ձեւով գրեցի՝ «Axper, es axjkan ches chanachum, che? Uremn el chgres, kam arden hamard gri henc hima»։
Չէի սպասում, որ մեկ ամիս անդադար գրող տղան դրան կպատասխաներ՝ «Brat, kneres»։
Հանձնվեց. չպայքարեց ինձ համար։ Շատ էի կոտրվել, տանից մեկ ամիս դուրս չեկա։
-Ձեր կարծիքով ո՞ւմ անպայման պետք է հետևել Ֆեյսբուքում և ինչո՞ւ։
-Ֆեյսբուքում անպայման է հետեւել ինձ, որպեսզի սկսեք գնահատել ու արժեւորել մնացածին։)
-Ինչպիսի մարդկանց էջերին երբեք չեք հետևում։ Օրինակ՝ կարող եք նշել մեկին ում երբեք չեք հետևի, ինչ էլ որ լինի։
-Անուն չեմ նշի, միայն կասեմ, որ միանգամից unfriend եմ անում այն մարդկանց, ումից որեւէ բացասական բան եմ զգում՝ անկախ նրանից թե ովքեր են։ 2020-ին շատ մարդկանց եմ հեռացրել ընկերներիս ցանկից՝ մարդկանց, որ երբեք չէի պատկերացնի թե կհեռացնեմ։ Որոշել եմ բացասականի վրա նյարդեր քայքայելու փոխարեն պարզապես հեռացնել կյանքիցս։
Հավես բան էր. Բոլորին խորհուրդ եմ տալիս` չնայած որ նոր եմ սկսել։
-Շատերն ինչ-որ բան են գովազդում Ֆեյսբուքում, իհարկե գումարի դիմաց։ Եղե՞լ է՝ ինչ-որ բան Ձեզ առաջարկեն, որ գովազդեք, բայց հրաժարվել եք։ Եթե այո՝ ի՞նչ էր որ ինչո՞ւ հրաժարվեցիք։
-Դեպքերը չափից դուրս շատ են՝ անսահման շատ։ Ինֆլուենսինգը սոցիալական մեդիայի մարքեթինգային գործիքներից մեկն է դարձել նաեւ Հայաստանում, եւ, բնականաբար, առաջարկները բավականին շատ են ու տարաբնույթ։ Բայց ես հրաժարվում եմ բացարձակապես բոլորից՝ անկախ նրանից տվյալ բրենդը սիրում եմ, թե՝ ոչ։ Իմ կարծիքը չեմ վաճառել, չեմ վաճառում ու չեմ վաճառի, երբեք։ Դրանում միանշանակ համոզված եմ։
Եթե որեւէ կարծիք եմ հայտնում, դա պիտի լինի միայն իմ կարծիքը եւ դրա դիմաց պարզապես չեն կարող ինձ վճարել։ Դրա մեջ որեւէ վատ բան չեմ տեսնում ու ունեմ շատ ընկերներ, ովքեր գումարի դիմաց գովազդում են որոշ բրենդեր, բայց ինձ մոտ սկզբունքային է երբեք չհամաձայնելը։
Առանձնահատուկ հաճույք եմ զգում, երբ սիրելի բրենդի մասին անդադար խոսում եմ անկեղծորեն ( օրինակ` GG, Seaside Startup Summit)։
-Դեռ տոնական տրամադրություն է տիրում Ֆեյսբուքում։ Ի՞նչ կմաղթեք Ֆեյսբուքի բնակիչներին, ի՞նչն է բոլորին պակասում։
-Ցինիզմս մի կողմ դնելով ուղղակի առողջություն մաղթեմ բոլորին՝ ֆեյսբուքից դուրս եւ ներս։ Դա ամենակարեւորն է, որովհետեւ երբ առողջությունը սկսում է կաղել, կարծում եմ ամեն ինչ դառնում է անիմաստ կամ քիչ իմաստով։
Շարքը՝ Անյուտա Աթանեսյանի
