Արթնացա և տեսա, որ իմ մուտքի բոլոր աստիճանների վրա սպիտակ ներկով գրված է «ես քեզ սիրում եմ». բլից հարցազրույց դատավոր Ռուզաննա Ազրոյանի հետ

Բլից հարցազրույց 21 Հոկտեմբեր, 2019 15:00

ArmDaily.am-ը «Խորհրդակցական սենյակում» շարքի շրջանակներում շարունակում է բացահայտել դատավորներին։ Այս անգամ մեր բլից հարցերին պատասխանել է Հայաստանի վարչական դատարանի դատավոր Ռուզաննա Ազրոյանը։

Մանկության չիրականացած եւ իրականացած երազանքը։
-Երազում էի շուտ մեծանալ, կարծես թե իրականացել է:
Միշտ երազել եմ արու զավակ ունենալ...հուսով եմ երազանքս դեռ իրականություն կդառնա:

Երկրպագուներ։
-Եղել են, կան, հուսով եմ միշտ կլինեն...Աստված իրենց առողջություն տա:

Իսկական տղամարդը կամ ով է սպիտակ ձիով ձեր ասպետը։
-Ինձ համար իսկական տղամարդը նա է, ով գիտի իր խոսքի արժեքը:

Խենթություններ ձեզ համար արված կամ ձեր կողմից արված։
-Ինչ մեղքս թաքցնեմ՝ և՛ արել են, և՛ ինքս եմ արել....:
Մեկ օր արթնացա, տանից դուրս եկա և տեսա, որ իմ մուտքի բոլոր աստիճանների վրա սպիտակ ներկով գրված է «ես քեզ սիրում եմ»...նշեմ, որ ես ապրում եմ 5-րդ հարկում, իսկ շքամուտքի մոտ գրված էր «Ժպտա, դու սիրված ես», ավելի քան 1 տարի ամեն օր տուն վերադառնալիս և տանից դուրս գալիս ընթերցում և ակամայից ժպտում էի...հետո իմացա, որ ժպտում էին նաև մուտքի մյուս բնակիչները։ Իմ խենթությունների մասին համեստաբար կլռեմ...առայժմ կլռեմ (ինտրիգ թողնեմ մյուս հարցազրույցի համար):

Երազանքների երկիր, որտեղ կցանկանայիք ապրել։
-Հայաստան, Հայաստան, Հայաստան, անգամ չի քննարկվում:

Ռուզաննա Ազրոյանը՝ խոհանոցում, ի՞նչ եք սիրում պատրաստել, ինչ չեք կարող պատրաստել։
-Շատերը չեն հավատա, բայց խոհանոց շատ եմ սիրում: Հաճույքով եմ պատրաստում (եթե իհարկե ոտքս ընկնում է խոհանոց, իսկ աշխատանքիս բերումով ոտքս խոհանոց համարյա չի ընկնում), ասում են համեղ է...չգիտեմ ինչ չեմ կարող պատրաստել, ինչ փորձել եմ ստացվել է: Հատկապես սիրում եմ պատրաստել Էկլեր:

Դեպրեսիան հաղթահարելու լավագույն միջոցը՝ շոփինգ, շոկոլադ, կարաոկե...։
-Ճամփորդություն, գիրք, մեծ թենիս, եղբորս հետ զրույցներ /իմ դեպրեսիան անցնում է, իրենը ինձանից հետո սկսվում է :)):

Ամենաթանկ նվերը, որը ստացել եք։
-Ծնողներս են նվիրել՝ եղբայրս է:

Նախընտրելի բրենդներ։ Ձեր զգեստապահարանը։
-Բրենդամոլ չեմ, գնում եմ այն, ինչ այդ պահին հավանեցի: Զգեստապահարանիս մասին ավելի լավ է հարցնել մայրիկիս:

Օրվա հարցը՝ ինչ հագնել...։
Բա դա հա՞րց է... օրեր կան դա մի ամբողջ ողբերգություն է:

Սիրո լավագույն խոստովանությունը։
-Տես՝ հարց 4, բայց միևնույն ժամանակ վստահ եմ, որ լավագույնը դեռ առջևում է:

Ճակատագիր կա՞, թե մարդը ինքն է որոշում ինչպես ապրել:
-Ճակատագիր կա, բայց մարդն ինքն է որոշում ինչպես ապրել:

Սեղանի գիրքը կամ վերջին կարդացած գիրքը։
-Սեղանի գիրքը. կարծում եմ, գաղտնիք չեմ բացահայտի՝ ՀՀ վարչական դատավարության օրենսգիրքը: Վերջին կարդացած գիրքը. իմ պարագայում բարդ հարց, քանի որ առնվազն 4-5 օրը մեկ վերջացնում և նոր գիրք եմ սկսում կարդալ, այնուամենայնիվ վերջին կարդացած գրքերից են The Big Ideas of Lee Kuan Yew և Похвала Глупости, Эразм Роттердамский (ի դեպ՝ ես միշտ միաժամանակ 2 գիրք եմ կարդում):

Ընկերուհիներ ունե՞ք:
-Ոչ շատ:

Հնդկական, թե բրազիլական սերիալներ...ո՞րն եք նայում։
-Նայում եմ բացառապես դետեկտիվ ժանրի սերիալներ:

Ձեր կյանքի հեքիաթը:
-Ես հավատում եմ հեքիաթների՝ ի տարբերություն շատերի, բայց այս հարցին չգիտեմ ինչ պատասխանեմ:

Ինչո՞վ եք դուք տարբերվում մյուս կանանցից եւ դատավորներից։
-Ոնց էլ չլինի, մի բանով կտարբերվեմ այլ կանանցից : ), իսկ դատավորներից՝ ես նիստերը շուտ-շուտ եմ նշանակում (ու այստեղ բոլորը բացեցին datalex-ը  ):

Բամբասանք ձեր մասին։ Հարեւանները ինչ են ասում։
-Այնքան շատ են, բազմաբղետ և տարբեր ժանրից, որ չգիտեմ, որ մեկը պատմեմ, դա առանձին հարցազրույցի թեմա է:
Անկեղծ կասեմ՝ չգիտեմ ինչպես է պատահել, բայց հարևաններս ինձ սիրում են, ասում են՝ բարի եմ:

Ամենաշատը ինչ թեմաներով եք ստիպված լինում սուտ ասել կամ խաբել ինչ-որ մեկին:
-Աշխատում եմ չխաբել…ինքս չեմ հանդուրժում ու չեմ ներում սուտը, սակայն երբեմն երբ չափում եմ մայրիկիս ճնշումը, ստիպված մի փոքր խաբում եմ, որ չնեղվի:

Երբեւէ ամաչե՞լ եք ինչ-որ ձեր արածի կամ ասածի համար:
-Ցավոք պատահել է…ոչ մեկ անսխալ ու անթերի չէ, ես բացառություն չեմ: Կարևորը գիտակցել արարքի և/կամ ասածի սխալը և փորձել այն շտկել՝ մինիմալ զոհերով:

Առավելություններ եւ թերություններ:
-Առավելություններ՝ չափից շատ հավատարիմ եմ, նեղացկոտ չեմ, հիշաչար չեմ: Թերություններ՝ չափից շատ հավատարիմ եմ, նեղացկոտ չեմ, հիշաչար չեմ:

Անկեղծ ասած…
-Սոված եմ:

Ո՞ւմ եք սիրում։
-Կյանքիցս շատ եղբորս /մամաս գիտի/:

Ու՞մից եք դժգոհ։
-Ինձանից:

Երբ զայրանում եւ զարմանում եք...։
-Երբ զայրանում եմ աչքերս կանաչում են:
Զարմանում եմ, երբ մարդիկ ստորություններ են անում, երբ դավաճանում են, երբ չարը հաղթում է բարին, երբ մարդիկ անպատիժ են մնում, երբ արդարությունը երբեմն հապաղում է…ընդ որում՝ երբեք չեմ դադարում զարմանալ:

Գեղեցկությունը կփրկի՞ աշխարհը։
-Ոչ. Աշխարհը կփրկի բարիությունն ու կամեցողությունը:

Դեր, որ երբեք չէիք խաղա։
-Դավաճանի դեր չեմ խաղա:

Հիասթափվում եւ հուսահատվում եք...։
-Հիասթափվում եմ, երբ ստում և դավաճանում են:
Հուսահատվել՝ ոչ, եղբայրս թույլ չի տալիս:

Հավատո՞ւմ եք իշխանություններին։
-Իսկ Դու՞ք :

Վախենո՞ւմ եք վեթինգից։
-Ես միայն վախենում եմ մտերիմների կորստից, մնացած ամեն ինչ լուծվող և անցողիկ է։ Վեթինգն էլ կանցնի…:

Հոգսեր։
-Ինչպես բոլոր մարդկանց մոտ:

Արտասվում եք, երբ...։
-Անարդարություն եմ տեսնում և ոչինչ չեմ կարողանում անել կամ երբ ինձ նեղացնում են:

Երբեւէ ձեր սուրճի բաժակը նայե՞լ են, գուշակների այցելե՞լ եք:
-Սուրճ չեմ խմում, իսկ գուշակի պատահել է ընկերուհիներով այցելել՝ շաաաա՜տ վաղուց, հետաքրքրության համար: Բայց հիշում եմ՝ լավ բաներ ասել է…:

Լավագույն դիետան։
-Երբեք չեմ պահել, չեմ կարող, քանի որ համեղ ուտել սիրում եմ:

Աշխատանքային հարուստ կենսագրություն ունեք, որ աշխատանքն է Ձեզ հոգեհարազատ։
-Որտեղ կարող եմ առավելագույնս օգտակար լինել: Այնպես է պատահել, որ բոլոր աշխատանքներս սիրել եմ, հաճույքով եմ գնացել աշխատանքի, շատ լավ անձանցով եմ շրջապատված եղել, ունեցել եմ բանիմաց ղեկավարներ:

Ինչքա՞ն փող կցանկանայիք ունենալ
-Այս պահին հստակ թիվ նշել չեմ կարող: Հետո կհաշվեմ, կասեմ:

Ասում են՝ սերը կյանքի լույսն է, ամուսնությունը՝ լույսի վարձը...չեք ուզում այդ կոմունալը դո՞ւք էլ վճարել։
-Լսել եմ լույսի վարձը թանկանալու է…:

Զանգ ԲԴԽ-ից։
-Ինչու միայն զանգ...նաև կարճ հաղորդագրություններ, նամակներ, մեսիջներ...:

Խորհրդակցական սենյակում։
-Խիղճ, օրենք, բարոյականություն, ապրումներ, արդարադատություն:

Հարց շարքի հաջորդ մասնակցին։
-Որն է Ձեր ամենասիրած գիրքը և ինչու:

Մեր շարքի նախորդ մասնակիցը՝ Միքայել Մելքումյանը Ձեզ հարցնում է՝ ինչն է ավելի վատ՝ ձախողումը, թե չփորձելը:
-Ինձ համար միանշանակ չփորձելը: