Անկյուն կանգնել եմ շատ կարճ, որովհետեւ անզգուշությամբ պահարանը ընկավ ուսուցչի վրա, թողեցի փախա. բլից հարցազրույց դատավոր Սարգիս Երիցյանի հետ

Բլից հարցազրույց 30 Սեպտեմբեր, 2019 18:00

ArmDaily.am-ը «Խորհրդակցական սենյակում» շարքի շրջանակներում շարունակում է բացահայտել դատավորներին։ Այս անգամ մեր բլից հարցերին պատասխանել է Երևան քաղաքի առաջին ատյանի ընդհանուր իրավասության դատարանի դատավոր Սարգիս Երիցյանը։

Մանկություն իմ...
-Բազմաբովանդակ, սկզբում անհոգ, իսկ 90-ականների սկզբներից որոշակի վայրիվերումներով, բայց նաեւ նոր հույսերով, հավատով ապագայի հանդեպ։

Դպրոցում անկյուն կանգնե՞լ եք, իսկ ո՞ր առարկայից եք 2 ստացել։
-Անկյուն կանգնել եմ շատ կարճ, որովհետեւ անզգուշությամբ պահարանը ընկավ ուսուցչի վրա, թողեցի փախա։ 2 էլ եմ ստացել, չեմ հիշում, թե որ առարկայից, առավել հիշում եմ ապրես գնահատականը, այդ օրագիրս պահել եմ։ 4-րդ դասարանում հանձնարարված էր շարադրություն, ընտրել էի նամակ զինվորին, որը ուսուցչուհիս հետագայում զինվորներին արկղերը ուղարկելիս ուղարկել էր, օրագրում ստացա ապրես։

Սովորելու տարիներին միանգամից աշխատանքի եք անցել կառավարությունում, ինչպե՞ս։
-Հայրս ինձ 16 տարեկանից ստիպել է արձակուրդներին աշխատել, օրվա առաջին կեսը դասերի էի, երկրորդ կեսը՝ աշխատանքի, սկսել եմ օգնականի հայեցողական աշխատանքից։

Ի՞նչ դեր է ունեցել Ձեր հայրը ձեր մասնագիտական առաջընթացի հարցում։
-Որպես կենդանի օրինակ նախեւառաջ, որպես կրթության ջատագով, ակադեմիական մասով որեւէ մեկը չի դիմել ինձ համար, դասախոսներս կվկայեն, բնականաբար աշխատանքի տեղավորելու հարցում որոշակի կարծիք, դիրքորոշում ունեցել է առաջին աշխատանքիս մասով։

Ուսանողության տարիներին դո՞ւք էլ էիք դասերը անցկացնում Բրյուսովի կամ Ռոմանոգերմանական ֆակուլտետի պատերի տակ՝ աղջիկներին սպասելով։
-Ռոմանոգերմանականը ուղիղ դիմացն էր, բնականաբար հետաքրքրությունը տարել է այդ ուղղությամբ: Բրյուսովում բախտ վիճակվեց դասախոսել 2 կիսամյակ։ Բայց կարծում եմ, որ իրավաբանականի աղջիկները պակաս գեղեցիկ չէին։

Զենք օգտագործելու կանոններին տիրապետո՞ւմ եք, թե՞ բանակում չծառայելը իրենն արել է։
-Զենք օգտագործելու կանոններին հիմնականում տիրապետում եմ, նաեւ ազատ ժամանակ զբաղվում եմ որսորդությամբ, բայց վերջերս աշխատանքային ծանրաբեռնվածությունը թույլ չի տալիս բնության հետ հարաբերվել, զբաղվում եմ հիմնականում թռչնի որսով։ Բանակում, ցավոք, չեմ ծառայել, քանի որ ընտրեցի գիտության ճանապարհը։

Ձեր ընտրյալը։
-Իմ կինը։

Տանը ով ինչ կարգավիճակ ունի։
-Կինս դատավոր, ես` ամբաստանյալ։

Թվարկեք Ձեր ամենալավ եւ վատ հատկանիշները:
-Եւ լավ, եւ վատ հատկանիշներ են՝ ներողամտությունը, ճշտապահությունը։

Հագուստի նախընտրելի բրենդ։
-Կարեւորը հարմարվետությունն է, բրենդի նախընտրություն չունեմ։

3 անփոխարինելի իր ճամփորդելիս։
-Ժամացույց, հեռախոս, դրամապանակ։

Կարգախո՞ս ունեք:
-Այո, ամեն ինչ անցողիկ է եւ մարդկությունն է մնայուն։

Դուք գոհ եք Ձեր կայացրած որոշումներից, եղե՞լ է, որ գիշերը չքնեք անխնա դատելու համար։
-Եղել է, որ գիշերները չեմ քնել, որպեսզի ճիշտ որոշում կայացնեմ, ընդհանուր առմամբ, իմ կայացրած որոշումները օրինական են եւ հիմնավոր։

Ինչքա՞ն փող կցանկանայիք ունենալ։
-Փողը հաճախ զարգացումը խթանելու միջոց է, դժվարանում եմ չափ ասել։

Ձեր ամենամեծ հաղթանակը եւ պարտությունը:
-Ամենամեծ հաղթանակը տղայիս ծնունդը, ամենամեծ պարտությունը դժվարանում եմ հիշել։

Ամենաշատը ո՞ւմ եք սիրում այս կյանքում Ձեզնից առաջ կամ Ձեզնից հետո:
-Աստծուն, հայրենիքը՝ ինձնից առաջ, ինձնից հետո՝ հասարակություն, ընկերություն, բարեկամություն։

Ովքե՞ր են ձեզ հիասթափեցրել, խաբել:
- Ալիեւը։

Ո՞ր դեպքում հրաժարական կտաք եւ ինչո՞ւ։
-Եթե տեսնեմ, որ այլեւս համակարգում որպես դատավոր ասելիք, անելիք չունեմ, և կան թեկնածուներ, ովքեր իմ գործը ավելի լավ կկատարեն։

Ի՞նչը կարող է ձեզ հուսահատեցնել:
-Գրեթե ոչինչ։

Ուրախությունը եւ տխրությունը ինչպե՞ս են դրսեւորվում:
-Համապատասխան ժեստերով, միմիկայով, երբեմն բացականչություններով, առավելապես նաեւ արտահայտվելով։

Ձեր երջանկությունը գո՞ւյն ունի:
-Բնականաբար, ամեն անգամ տարբեր։

Ի՞նչը կարող է ձեզ նյարդայնացնել, հունից հանել:
-Հունից հանելը դժվար է, նյարդայնանալ հաճախ է լինում հոգնածության հետեւանքով, առիթները բազմաթիվ են՝ սկսած աշխատանքային ծանրաբեռնվածությունից, վերջացրած անկանոն երթեւեկությամբ։

Ձեր կյանքի ամենահամարձակ քայլը:
-Դատավոր դառնալու ծանր եւ պատասախանտու որոշումը։

Ձեր մասին ամենանհեթեթ բամբասանքը:
-Կոնկրետ բան չհիշեցի։ Ժողովրդական բանահյուսության այս ժանրը անտեսված է ինձ մոտ:

Ամենամեծ սուտը, որ ասել եք:
-Այնքան եմ ստում, որ չեմ էլ հիշում ամենամեծը: ՃՃՃՃ

Ամենաշատը ինչքա՞ն եք խմել, ի՞նչ առիթով, խոսքը ալկոհոլի մասին է։
-Տղայիս ծննդյան առիթով, շատ շատ։

Հայաստանյան ո՞ր քաղաքական գործիչով եք հիանում։
-Բնականաբար հորս անցած կենսագրությամբ, որպես քաղաքական գործիչ։ Փառք Աստծո հպարտանալու բազմաթիվ առիթներ ունեցել եմ և դեռ կունենամ:

Սաունա, թե խաղատուն․ինչպե՞ս եք լիցքաթափվում։
-Սպորտ։

Ձեր կյանքի կանայք...ինչպիսի՞ն են նրանք, ի՞նչն եք գնահատում եւ հավանում կնոջ մեջ եւ ի՞նչն է ձեզ նյարդայնացնում նրանց մեջ:
-Կինս, պարզություն, անմիջականություն, գեղեցիկ ժպիտ, աչքերի փայլ, համեստություն, նյարդայանացնում է դանադաղաշարժությունը եւ հաճախ ուշանալու և ուշացնելու պատրաստակամությունը։

Լինում է, չի լինում․․․
-Ավելի շուտ լինում է․․․։

Ձեր կյանքի ամենառոմանտիկ օրը: Ի՞նչ խենթություններ եք արել հանուն սիրելիի:
-Խենթություններ շատ են եղել, ընդհանրապես ռոմանտիկ եմ, նման միջավայրը ինձ հոգեհարազատ է․ խենթությունս ծանոթությունս էր կնոջս հետ, երբ որոշեցի, որ պետք է ծանոթանամ, գնացի նրա աշխատավայր և ուղիղ ասացի իմ գալու նպատակի մասին։

Ձեր ընտանիքի անդամները ինչի՞ համար են ձեզ նախատում:
-Ուշ վերադառնալու, խաղատներ այցելելու, ալկոհոլը չարաշահելու ՃՃՃՃՃ։

Ի՞նչ կերակուրներ եք սիրում, ի՞նչ եք կարողանում պատրաստել:
-Մսի հետ կապված ցանկացած բան կարողանում եմ պատրաստել՝ սկսած թոնրի խորովածից, վերջացրած ժամանակակից սթեյքների տեսակներով: Սիրում եմ մայրիկի, կնոջս, քրոջս պատրաստած ցանկացած կերակուր։

Չասված խոսքեր եղե՞լ են Ձեր կյանքում…Ուզո՞ւմ եք հիմա` այս հարցազրույցի շրջանակներում, ինչ-որ մեկին մի բան ասել, խոստովանել կամ հայտարարել։
-Իհարկե, շատ են եղել չասված խոսքեր, առավել դժվար է լռելը, քան թե խոսելը։

Տան կենցաղային մինիմալ աշխատանքներից ի՞նչ եք կարողանում անել, թե՞ անգամ լամպ փոխելու համար մասնագետ եք կանչում։
-Ցավոք, շատ բան չեմ կարողանում անել, տեխնիկան եւ միջոցները շատ են զարգացել, իսկ մենք հետ ենք մնացել։

Զանգ ԲԴԽ-ից, ինչպես դիմադրել։ -Դիմադրելու կարիք չկա։ Եթե նկատի ունեք միջնորդություններ, բոլոր տեղերից զանգերի դեպքում բաժանորդն անհասանելի է։ Իմ վարքագծի հաստատուն լինելու մասին կարող են վկայել իրավաբական հանրությունը:

Խորհրդակցական սենյակում։
-Խորհրդակցական սենյակում՝ հավատարիմ դատավորի բարձր երդմանը։

Ամենամեծ կաշառքը, որից հրաժարվել եք, եւ ամենափոքրը, որ ակամայից վերցրել եք։
-Կաշառքներ ստանում եմ միայն Ձմեռ պապիկի, արագիլի կողմից, որից դժվար է հրաժարվել, իսկ գործանականում առաջարկ էլ չեմ ստացել, որպեսզի մտածեմ այդ ուղղությամբ։

Վախի դեմ չիշիկ խմելու հայտնի խորհուրդը ումի՞ց էիք լսել, զղջո՞ւմ եք այն հրապարակայնցնելու համար։
-Դա ընդունված խոսք է՝ հայտնի ժողովրդական բանահյուսությունից, ասվել է ընկերներիս հետ կես կատակ-կես լուրջ օրվա լարված անցուդարձը քննարկելու համատեքստում։ Իմ կողմից չի հանրայանցվել, զղջալու կամ չզղջալու առթիները իմը չեն։

Երիտասարդ տարիքում այդպիսի ունեցվածքի գաղտնիքը։
-Կարծում եմ՝ բարեվարքության ստուգման արդյունքում ես էլ կիմանամ։

Վախենում եք պատերին ծեփվելուց, թե՝ ասֆալտին փռվելուց։
-Նաև շնորքով ներխուժելուց: ՃՃՃ Վախենում եմ բոլոր չվախեցողներից։

Մեր շարքի նախորդ մասնակիցը՝ Մարինե Մելքոնյանը Ձեզ հարցնում է՝ ով ինչն է Ձեզ համար կատարյալ և ինչը` գեղեցիկ:
-Այն, ինչ Աստվածային է եւ տեղավորվում է դրախտային կանոնների մեջ։

Հարց շարքի հաջորդ մասնակցին։
-Հավատում եք արդյոք միասնական եւ միացյալ Հայաստանի գաղափարին, գործնականում ինչ եք կատարում դա իրականություն դարձնելու համար։