Ավելի շատ վախենում եմ Աստծուց եւ ասեղից. բլից հարցազրույց դատավոր Երեմ Եսոյանի հետ

Ֆոտո 27 Օգոստոս, 2019 20:00

ArmDaily.am-ը «Խորհրդակցական սենյակում» շարքի շրջանակներում շարունակում է բացահայտել դատավորներին։ Այս անգամ մեր բլից հարցերին պատասխանել է Երեւան քաղաքի առաջին ատյանի ընդհանուր իրավասության դատարանի դատավոր Երեմ Եսոյանի հետ։

Թվարկեք ձեր ամենալավ եւ վատ հատկանիշները:
-Սկզբունքային եմ, սիրում եմ սովորել եւ սովորեցնել, որպես վատ չեմ կարող քծնել։

Հայրական ապտակը թաքուն ծխելու համա՞ր եք ստացել, թե...։
-Երբեւէ չեմ ծխել, ապտակ ստացել եմ 9-րդ դասարանի առաջին կիսամյակում քիմիայից 3 ստանալու համար։

Առարկա, որն այդպես էլ չսովորեցիք։
-Այդ քիմիան։

Ինչպիսի՞ն էր մանուկ ժամանակ, ի՞նչ չարաճճիություններ էիք անում: Իսկ դպրոցական եւ ուսանողական տարիներին «ռազբոյնիկ» եղե՞լ եք, թե՞ ոչ, աղջկա համար մղվող կռիվներին մասնակցե՞լ եք, կհիշեք մեկ դրվագ:
-Եղել եմ լավ սովորող, ակտիվ, ձգտել եմ միշտ լինել առաջինը, «ռազբոյնիկ» չեմ եղել, բայց կռիվների մասնակցել եմ։

Ի՞նչ եք կարծում` գեղեցկությունը կփրկի աշխարհը:
-Բավարար չէ...

Ձեր կարգախոսը։
-Շատ են...ինչ անում ես, լավ արա, եթե կիսատ ես անելու, մի արա, ոչինչ մի հետաձգիր հետոյին, քանզի հետո ավելի հեշտ չի լինի։

Ինչի՞ց եք վախենում՝վեթինգի՞ց, թե՞ մթությունից։
-Երկուսում էլ պարզություն չկա, սակայն վախենալու եւ անհաղթահարելի չեն; Ավելի շատ վախենում եմ Աստծուց եւ ասեղից։

Զոքանչի անունով գույք ունե՞ք գրանցած։
-Ոչ։

Ու՞մ հանդեպ եք Ձեզ մեղավոր զգում:
-Ի՞նչ եմ արել որ...

Ձեր հաջողության գաղտնիքը ո՞րն է: Օրինակ` հնարավոր է ինչ-որ թալիսմաններ եք պահում նախնիններից մնացած։
-Հաջողությունը պարտաճանաչություն, աշխատասիրություն, հավատարմություն, իսկ թալիսման չունեմ։

Ե՞րբ եք ստում:
-Ըստ ծայրահեղ անհրաժեշտության։

Ի՞նչն է ձեզ զայրացնում:
-Կեղծիքը, նախանձը, չարությունը, փնթիությունը։

Փողը, հարստությունը, պաշտոնները երբեւէ ձեր մեջ որեւէ բան փոխե՞լ են, ազդե՞լ են ձեր վրա:
-Իմ կարծիքով ոչ, նորմալ մարդ դրանցից կախում չպետք է ունենա, ավելի ճիշտ կասեն իմ հարազատներն եւ ընկերները։

Հայաստանի պատմության մեջ սիրելի քաղաքական գործիչը ո՞վ է:
-Երբեւէ քաղաքականությամբ չեմ զբաղվել, որեւէ քաղաքական գործչի նկատմամբ որեւէ զգացմունք չունեմ։

20-21-րդ դարի հայտնի մարդկանցից ո՞ւմ հետ կցանկանայիք հանդիպել:
-Նայած ինչի համար։

Ձեր կյանքի ամենամեծ սխալը:
-Սխալներ եղել են, բայց երբեւէ չեմ չափել։

Ձեր վատագույն սովորությունը:
-Դա էլ չեմ չափել։

Վերջին լսած անեկդոտներից կպատմե՞ք:
-Շատ եմ սիրում լսել, պատմել չեմ կարող։

Գուշակների երբեւէ այցելե՞լ եք:
-Ոչ, չեմ ընդունում նման բաներ։

Ի՞նչ վտանգներ եք կյանքում զգացել եւ հաղթահարել:
-Կյանքը լի է վտանգներով, որոնց հետ անընդհատ առնչվում ենք եւ հնարավորինս հաղթահարում։

Համաշխարհային հայտնի կանանցից ո՞ւմ գեղեցկությամբ եք հիանում:
-Տգեղ կին չի լինում, յուրաքանչյուրը գեղեցիկ է յուրովի։

Լուսանկարներ, հիշողություններ:
-Վերջերս թերթել եմ դպրոցական տարիների լուսանկարների եւ գովասանագրերի ալբոմը։

Ո՞վ է ձեզ կյանքում հիասթափեցրել:
-Հիասթափություններ միշտ լինում են, բայց դրանցից չեմ հուսահատվում։ Կոնկրետ անուն չնշեմ, բայց երախտամոռներ էլ կան։

Հուսահատության պահերը ո՞նց եք հաղթահարում:
-Աշխատելով եւ նպատակին հասնելու ձգտումով։

Ինչ-որ սկզբունքներ, որոնց ստիպված եք եղել դավաճանել։
-Սկզբունքները շատ-շատ են, որոնց աշխատում եմ չդավաճանել;

Պատրաստում ենք երջանկություն: Ձեր բաղադրատոմսը:
-Ինչ ուզում ես պատրաստի, надо сделать од души, с любовью И не жалеть։

Ամենաուրախ եւ ամենատխուր օրը։
-Ամենաուրախը երեխաներիս ծնունդը, ամենատխուրը՝ հորս մահվան օրը։

Ի՞նչը կհաղթեր կյանքում հերոսին, թե չլինեին...։
-Սուտը, կեղծիքը, նախանձը, չարությունը, իսկ կինն ու գինին ընդհանրապես օգնում են;

Ձեր խենթություններից:
-Եղել են, չեմ հիշում։

Ու՞մ կցանկանայնիք նմանվել;
-Իդեալներ չպետք է փնտրել։

Աշխարհի ամենալավ մարդը ո՞վ է:
-Լավը լրիվ հարաբերական է։ Վատ մարդ չկա, քանի դեռ շահերի բախում չկա; Յուրաքանչյուրն իր մեջ լավ ու վատ հատկանիշներ ունի, ես մարդկանց մեջ ցանկանում եմ միշտ լավը տեսնել։

Կենդանիներ սիրո՞ւմ եք եւ ի՞նչ կենդանու եք ձեզ նմանեցնում:
-Վագր, ձի, մեղու։

Ի՞նչ է ընտանիքը ձեզ համար:
-Ամեն ինչ։

Ձեր ընտանիքի անդամները ինչի՞ համար են ձեզ նախատում:
-Տուն ուշ գնալու, իրենցով քիչ զբաղվելու։

Չասված խոսքեր եղե՞լ են Ձեր կյանքում…Ուզո՞ւմ եք հիմա` այս հարցազրույցի շրջանակներում, ինչ-որ մեկին մի բան ասել, խոստովանել կամ հայտարարել:
-Ցանկացած խոսք պետք է ասվի ըստ ժամանակի եւ տեղի անհրաժեշտության, ինչ պետք է լինում, դեմքներին ասում եմ, չեմ սիրում հետեւից խոսել, այժմ բոլորին կասեմ՝«մարդիկ, եղեք մարդկային»։

Ի՞նչ հոգսեր ունեք:
-Հոգսեր միշտ էլ կան, կոնկրետ որոշ առողջական խնդիրներ։

Ո՞ր մոլախաղում եք անպարտելի:
-Մոլախաղեր չեմ խաղում, ընկերներով մեկ-մեկ բլոտ ենք խաղում, այդ ընթացքում կրած պարտությունները ծանր չեմ տանում։

Զանգ ԲԴԽ-ից...։
-Դեռ չի եղել; Լինելու դեպքում ուշադիր կլսեմ, իսկ կգործեմ միայն օրենքի շրջանակներում։

Ամենաբարդ գործը, որ քննել եք, ինչպե՞ս եք հաղթահարել նիստերի ժամանակ անելանելի վիճակները։
-Մոտ 20 հազար գործ եմ քննել, ամեն մի գործը յուրովի է իր բարդությամբ, անելանելի վիճակներ չեմ հիշում, միշտ գործել եմ օրենքով՝ կիրառելով փորձս եւ գիտելիքներս։

Խորհրդակցական սենյակում։
-Դատարանը գործը քննում է եւ լուծում է Սահմանադրության եւ օրենքին համապատասխան՝ գործի հանգամանքները գնահատելով իր ներքին համոզմամբ; Ավելի կարճ` ղեկավարվում եմ օրենքով եւ խղճով։

Հարց շարքի հաջորդ մասնակցին։
-Եթե ունենայիր մեկ հնարավորություն, ինչ կփոխեիր քո կյանքում։

Մեր շարքի նախորդ մասնակիցը՝ Գրիգոր Առաքելյանը, Ձեզ հարցնում է՝ Երբևէ պարել եք «мурка» երգի հնչյունների ներքո:
-Երբեք չի եղել նման դեպք։