Շուտով ամուսնանալու եմ, որովհետև սիրում եմ. բլից հարցազրույց դատավոր Գրիգոր Առաքելյանի հետ

Բլից հարցազրույց 20 Օգոստոս, 2019 20:00

ArmDaily.am -ը «Խորհրդակցական սենյակում» շարքի շրջանակներում շարունակում է բացահայտել դատավորներին։ Այս անգամ մեր բլից հարցերին պատասխանել է Հայաստանի վարչական դատարանի դատավոր Գրիգոր Առաքելյանը։

Նայեք հայելու մեջ: Ո՞ւմ եք տեսնում այնտեղ:
-Օրվա ընթացքում հաճախակի եմ նայում հայելու մեջ. ամեն անգամն տարբեր արտացոլանքներ են` կախված տրամադրությունից
Որպես անհատականություն` ե՞րբ եք կայացել:
-Երբ տեղափոխվեցի Երևան` ուսանելու և ստիպված էի համակերպվել երևանյան կյանքին
Ի՞նչ հատկանիշներ կցանկանայիք ունենալ, որ չունեք:
-Կցանկանայի առավել համբերատար լինել
Ի՞նչ հատկանիշներից կցանկանայիք ձերբազատվել:
-Գթասիրտ եմ և ներողամիտ, անձնական շփումներում երբեմն կարող են չարաշահել
Եթե նորից ծնվեիք...ի՞նչ կփոխեիք ձեր կյանքում:
-Ոչինչ, կապրեի նույն կերպ` նույն սկզբունքներով և արժեքներով
Ինչպիսի՞ մանուկ էիք, մի հետաքրքիր դրվագ կպատմե՞ք, ցանկալի է` հումորային:
-Սահմանամերձ գոտում եմ բնակվել, մութ ու ցուրտ տարիները, սահմանին տիրող իրավիճակն անհամատեղելի էին հումորի հետ:
Ինչի՞ համար եք զղջում:
-Երբեք որևէ արարքիս համար չեմ զղջացել և չեմ զղջում։
Ինչպե՞ս դարձաք դատավոր ընդամենը 25 տարեկանում, ի՞նչ դեր է ունեցել Ձեր հայրը ձեր մասնագիտական առաջխաղացման հարցում։
-Բարեհաջող հանձնելով որակավորման քննությունները և ուսանելով ՀՀ արդարադատության ակադեմիայում: Իսկ հայրս իմ մասնագիտական առաջխաղացման հարցում եղել է բացառապես խորհրդատու:
Ինչո՞ւմ եք ամենաշատը ձեզ մեղադրում:
-Կարող էի ուսումս շարունակել արտերկրում, բայց գերադասեցի աշխատել, կարծում եմ` կարող էի շարունակել ուսումս նոր միայն անցնել աշխատանքի:
Ի՞նչ ստեր եք հաճախակի ստիպված ասել, բացի «10 րոպեից կհասնեմ»։
-Հենց նոր պատահաբար տեսա, որ զանգել ես, հեռախոսիս ձայնն անջատված էր։
Ձեր հաջողության հասնելու գաղտնիքը ո՞րն է: Բացի Աստծուց եւ ընտանիքից` էլ ո՞ւմ եք շնորհակալ:
-Համառ եմ, նպատակասլաց, զգուշավոր նպատակներիս մեջ: Իսկ Աստծուց ու ընտանիքիցս բացի կրկին շնորհակալ եմ Աստծուց ու ընտանիքիցս:
Ինքներդ ձեզնից գո՞հ եք, եթե այո, ապա ինչպե՞ս է հաջողվել գոհ լինել, եթե ոչ, ապա դժգոհությունը ի՞նչ հարցերի շուրջ է:
-Գոհ եմ, որովհետև այնպիսին եմ, ինչպիսին ցանկանում եմ լինել:
Ովքե՞ր (ինչեր) են ձեր թշնամիները, հակառակորդները եւ աջակիցները:
-Նրանք, ովքեր մտածում են, որ իմ հակառակորդներն ու թշնամիներն են: Իսկ մշտապես ինձ աջակցում են ծնողներս, սիրելիս ու ընկերներս:
Ֆոբիաներ ունե՞ք։
-Վախենում եմ մթությունից: Ուրիշ որևէ ֆոբիա չունեմ:
Վիսկի, թե թթի օղի։
-Միանշանակ վիսկի, բայց չէի հրաժարվի նաև Արցախի թթի օղուց:
Ի՞նչ կենացներ եք խմում։
-Նախընտրում եմ սեղանապետ չլինել:
Սիրելի ուտեստ եւ ուտեստ, որը կարողանում եք պատրաստել։
-Ինչպես ցանկացած հայ տղամարդ` խորոված պատրաստել, որն, ի դեպ, շատ համեղ եմ պատրաստում և պաստա պատրաստել: Իսկ ուտելիքներից ցանկացած ծովամթերքով պատրաստված ուտեստ անտարբեր չի թողի ինձ:
Հայաստանում ի՞նչն է ամենից շատ ձեզ նյարդայնացնում:
-Երթևեկությունը։
Ամենամեծ նյութական հարստությունը, որ ունեք: Չասեք, թե ձեր համար կարեւորը հոգեւոր հարստությունն է:
-Ես շատ յուրահատուկ պատասխան կտամ. ինձ համար կարևորը հոգևոր հարստությունն է։
Ամենառոմանտիկ օրը:
-Սիրելիիս հետ անցկացրած ցանկացած օր յուրովի ռոմանտիկ օր է:
Անցած սերեր։
-Միայն մեկն է և ներկա:
Ինչի՞ եք պատրաստ հանուն սիրո։
-Պատրաստ եմ ամուսնանալ սիրելիիս հետ:
Եթե Հայաստանում բազմակնություն լիներ, քանի՞ կին կպահեիք:
-Ներկայիս աշխատավարձի պայմաններում միայն մեկը : )
Ձեր սիրտ տանող ճանապարհը ե՞ւս ստամոքսով է։
-Հերքելը ստախոսություն կլիներ:
Հայոց պատմության ամոթալի դրվագը։
-Բագրատունիների թագավորության անկումը, Անի մայրաքաղաքի հանձնումը Բյուզանդիային:
Քանի լեզու գիտեք։
-Ընդամենը 2։
Ինչքա՞ն գումար կարող եք ծախսել մեկ օրվա ընթացքում։
-Դեռ այնքան մեծ գումար չեմ ծախսել մեկ օրվա ընթացքում, որ պատկերացում կազմեմ, թե որքան կարող եմ ծախսել։
Պարտքով փող տալի՞ս եք, իսկ վերցնո՞ւմ եք։
-Պարտատիրոջ կամ պարտապանի կարգավիճակում երբեք չեմ հայտնվել:
Ընկեր, որից հիասթափվել եք։
-Շատ սահմանափակ եմ շփումներում, շատ չեն ընկերներս, հուսամ` որևէ մեկն ինձ չի հիասթափեցնի:
Խաղադրույք անել, խաղատուն գնալ, թե բլոտ խաղալ...որտեղ եք անպարտելի։
-Միանշանակ բլոտ խաղալ, բայց միայն սիրողական մակարդակում, հաճախակի եմ պարտվում:
Մոլախաղում հաղթած ամենամեծ եւ փոքր գումարը։
-Երբեք մոլախաղով չեմ տառապել:
Եթե ոչ դատավոր, ապա...
-Ծնողներս շատ էին ցանկանում, որ բժիշկ դառնամ, կարծում եմ, եթե ոչ դատավոր, ապա բժիշկ:
Խորհրդակցական սենյակում
-Ինձ ամրակցված դատական նիստերի դահլիճը խորհրդակցական սենյակ չունի, որովհետև Վարչական դատավարության օրենսգիրքը չի նախատեսում:
Երիտասարդ տարիքում դատավոր աշխատելու ռիսկերը որո՞նք են..կարծիք կա, որ 25 տարեկանը այնքան մասնագիտական եւ կյանքի փորձ ունի, որ մարդկանց դատի...ի՞նչ խնդիրների եք հանդիպել դուք։
-Խնդիրները բացառապես այդ թյուր կարծիքներն էին, որևէ այլ խնդրի չեմ հանդիպել տարիքիս հետ կապված:
Ամուսնանում են, որովհետեւ սիրում են, թե սիրում են, քանի որ ամուսնացել են...։
-Շուտով ամուսնանալու եմ, որովհետև սիրում եմ: Մյուսների ամուսնական մանրամասներին տեղեկացված չեմ:
Բարսելոնա, թե Ռեալ-Մադրիդ...սիրելի ֆուտբոլիստը։
-Չգիտեմ որևէ ֆուտբոլիստի անուն, որ գոնե գրեի, բացառությամբ Հենրիխ Մխիթարյանի: Եթե նույնիսկ ֆուտբոլով հետաքրքրվեի, միևնույնն է կպատասխանեի Հենրիխ Մխիթարյան:
Սիրելի հավաքականի խաղին հետեւելիս ձեր գործողությունները...եղուգներն եք կրծում, բազմոցի վրա թռչկոտում, ափսեներ ջարդում, գոռգռում, թե...
-Ուղղակի հեռուստացույցի ալիքն եմ փոխում։
Զանգ ԲԴԽ-ից...։
-Երբևէ զանգ չեմ ստացել
Հարց շարքի հաջորդ մասնակցին։
-Երբևէ պարել եք <мурка> երգի հնչյունների ներքո:
Մեր շարքի նախորդ մասնակիցը՝ Սիմիզար Հովսեփյանը, Ձեզ հարցնում է՝ երբ հանդիպեք Աստծուն, ինչ կհարցնեիք կամ կասեիք նրան։

-Թե երբ հանդիպեմ Աստծուն, ինչ կհարցնեմ, պատասխանեմ, որ դեռ շաաաաաաաաատ երիտասարդ եմ և հանդիպման մասին վաղ է մտածել: