Կյանքը շատ խիստ ուսուցիչ է իմ պարագայում, բայց ես երևի վատ աշակերտ եմ. բլից հարցազրույց Ելիզավետա Դանիելյանի հետ

ArmDaily.am-ը «Խորհրդակցական սենյակում» շարքի շրջանակներում շարունակում է բացահայտել դատավորներին։ Այս անգամ մեր բլից հարցերին պատասխանել է Վճռաբեկ դատարանի քրեական պալատի դատավոր Ելիզավետա Դանիելյանը։

Փոքր ժամանակ դո՞ւք էլ եք երազել բժիշկ դառնալ։                                                            -Մանկապարտեզային երազանքներս չեմ հիշում, բայց դպրոցական տարիքից երազել եմ իրավաբան դառնալ: 8-րդ դասարանի ավարտական քննությունների շարադրության մեջ գրել էի, որ ուզում եմ դառնալ իրավաբան և աշխատել անչափահասների հետ: 

Տուն-տունիկ, ցատկապարան, յոթքար, հալամուլա...ինչ էիք խաղում։
-Տուն-տունիկ խաղացել եմ:

Դպրոցում գնահատականի համար լացե՞լ եք։
-Գնահատականի համար լաց չեմ եղել, բայց մեկ անգամ դպրոցում անարդար վերաբերմունքից խիստ հուզվել էի:

Երկրպագուներ։ Իսկական տղամարդու ձեր սահմանումը։
-Իմ պատկերացմամբ՝ տղամարդը պետք է լինի ազնիվ և այնքան ուժեղ, որ պաշտպանի սիրելիին:

Ամենամեծ ձախողումը կամ պարտությունը։
-Կյանքը նման է զեբրի` սև ու սպիտակ բծերը հաջորդում են միմյանց: Մտերիմներիս դավաճանությունը իմ ամենամեծ և ձախողումն է և պարտությունը:
Խոհանոցում ի՞նչ եք սիրում պատրաստել։
-Խոհանոցում սիրում եմ պատրաստել գրեթե ամեն ինչ, հատկապես աղցաններ:

Դեպրեսիան հաղթահարելու լավագույն միջոցը՝ շոփինգ, շոկոլադ...։
-Դեպրեսիա հաղթահարելու լավագույն միջոցը ընկերուհիներս են, հատկապես եթե անհրաժեշտ է նրանց դեպրեսիայից հանել:

Ամենաթանկ նվերը, որը ստացել եք։
-Ամենամեծ նվերս` բալիկներս են:

Նախընտրելի բրենդներ։
-Ոչ ժամանակ ունեմ, ոչ տրամադրություն բրենդերին հետևելու: Նախընտրում եմ պարզությունն ու հարմարավետությունը:

Կաշառք տվե՞լ եք որեւէ մեկին։ Իսկ ձեզ տվե՞լ, առաջարկե՞լ են։
-Կաշառք չեմ տվել, թեև լավությունը միշտ գնահատում եմ: Հնարավորինս ձգտում եմ դատավորի անունը մաքուր պահել, զերծ մնալ ցանկացած ազդեցություններից, էլ ուր մնաց` կաշառք վերցնելուց: Առաջարկներ էլ չեն լինում, երևի գիտեն, որ անօգուտ են:

Ընկերուհիներ ունե՞ք։
-Բազմաթիվ ընկերուհիներ ունեմ, դպրոցական տարիքից մինչ օրս որևէ ընկերուհուս չեմ կորցրել:

Ռոմանտիկ ընթրիք։
-Ռոմանտիկ ընթրիքի վայրն ու ձևաչափը կարևոր չեն, միայն սիրելիի հետ լինի:

Օրվա հարցը՝ ի՞նչ հագնել...։
-Միշտ հարմարավետ կոստյում:

Ինչը՞ կարող է ձեզ երջանկացնել։
-Ինձ կարող է երջանկացնել միայն հավատարմությունը և երեխաներիս հաջողությունները:

Ի՞նչ չեք կարողանում պատրաստել։
-Չեմ կարող պատրաստել կաթնով:

Ձեզ կինոյի, գրքի ո՞ր հերոսուհուն եք նմանեցնում։
-Կինոյի հերուսուհիներից ոչ մեկին կոնկրետ չեմ նմանեցնում, թեև կան մի քանի կերպարներ, որոնցից որոշ գծեր նաև իմ մեջ կան: Օրինակ, Ագաթա Քրիստիի հերոսուհիների, կամ այլ դետեկտիվ կանանց նման ինձ դժվար է խաբել:

Կյանքի դասեր։
-Կյանքը շատ խիստ ուսուցիչ է իմ պարագայում, բայց ես երևի վատ աշակերտ եմ, քանի որ նույն սխալը մի քանի անգամ կարող եմ կրկնել:

Բամբասանք ձեր մասին։
-Բամբասանքներն իմ կյանքի ուղեկիցներն են, քանի որ մարդիկ նախանձ են և անշնորհակալ:

Ինչի՞ համար եք զղջում։
-Թուլություններիս համար զղջում եմ: Եվ սխալներիս:

Ո՞ւմ եք սիրում։
-Սիրում եմ Տիրոջը, բալիկներիս, ընկերներիս և հարազատներիս: Սիրում եմ ուսանողներիս: Մարդկանց եմ սիրում:

Ու՞մից եք դժգոհ։
-Չարախոսներից եմ դժգոհ:

Երբ զայրանում եք եւ զարմանում եք։
-Երբ զայրանում եմ կարող եմ չխնայել դիմացինիս: Եթե զարմանում եմ մի լավ բանից, ապա երջանկանում եմ: Իսկ վատով ինձ արդեն չես զարմացնի:

Համարձակ որոշում։
-Դատավորի աշխատանքի հիմնական բաղադրիչը` համարձակ որոշումներ կայացնելն է, հատկապես Վճռաբեկ դատարանում:

Դեր, որ երբեք չէիք խաղա։
-Չարագործի դեր երբևէ չէի խաղա:

Հիասթափվում եւ հուսահատվում եք...։
-Հիասթափվում եմ ստից, հուսահատվում եմ անարդարությունից, բայց նորից վերալիցքավորվում եմ հավատքով, ներում եմ ինքս և ներում եմ հայցում:

Վեթինգի՞ց եք վախենում, թե՞ անցումային արդարադատությունից...։
-Վեթինգից և անցումային արդարադատությունից չեմ վախենում, յուրաքանչյուրը պատասխանատու է իր ապրածի համար: Միայն թե շատ եմ կարևորում օրինականությունն և օբյեկտիվությունը այդ գործընթացներում:

Հավատո՞ւմ եք...։
-Հավատում եմ Աստծո արդարադատությանը և գթասրտությանը: Եվ բումարանգի սկզբունքին:
Հոգսեր։
-Հոգսերն ուղղակի անթվարկելի են, կարևորը ուժ ունենանք դիմադրելու:

Խենթություններ ձեզ համար արված կամ ձեր կողմից արված, օրինակ՝ պատուհանից կփորձեք մտնել կաբինետ, եթե դռները փակ լինեն։
-Խենթություններն ընդունում եմ և դրանց ընդունակ եմ միայն անձնական հարաբերություններում, ընկերներիս հետ կատակներում: Աշխատանքում հնարավորինս օրինապաշտ եմ:

Ընտանիքը։
--Ընտանիքը մարդու հիմնական հենարանն է: Երջանիկ է նա, որ երջանիկ է իր ընտանիքում: Երեխաներս իմ լավագույն բժիշկներն են:

Ի՞նչ է դատավորի պաշտոնը Ձեզ համար, որ դեպքում հրաժարական կտաք եւ ինչու..։ -Դատավորի պաշտոնը կյանքիս կարևոր բաղադրիչն է, խոսքով եք ասում ` 29 տարի… Հրաժարական կտամ, եթե իրականում պետք չլինեն գիտելիքներս, փորձս և մարդկային հատկանիշներս:

Թուլություններ, թերություններ։
-Թուլություններս ու թերություններս էլ քիչ չեն: Միշտ չէ, որ վճռական եմ:

Ե՞րբ եք արտասվում եւ արցունքներով երբեւէ ինչ-որ բաների հասե՞լ եք։
-Մորս մահից հետո հազվադեպ եմ արտասվում, բայց պատահում է: Դրա պատճառները միշտ խիստ անձնական են լինում, լացը` պոստֆակտում, հետևաբար որևէ հարցի լուծմանը չի կարող նպաստել

Սիրելի արտահայտություն ունե՞ք, որը Ձեզ համար կարգախոս եք դարձրել:
- Լավ է ուշ, քան երբեք: Սխալի կեսից ետ դառնալն էլ ճիշտ է: Յուրաքանչյուրին թող իր սրտով տրվի:

Ինչո՞ւմ է հաջողության հասնելու գաղտնիքը:
-Հաջողության գաղտնիքը` յուրաքանչյուրի ճակատագրի մեջ է, ինչպես նաև ազնվության և աշխատասիրության:

Ի՞նչ կփոխեիք Ձեր մեջ` թե արտաքինում, թե ներքին աշխարհում:
-Արտաքինում որևէ բան փոխելն արդեն ուշ է, պետք է սիրենք մեզ այնպիսին, ինչպիսին ստեղծվել ենք Տիրոջ կողմից: Իսկ ներքինում փորձում եմ գոնե մի քիչ նվազեցնել զգացմունքայնությունս, ամեն ինչ սրտիս այդքան մոտ չընդունել:

Զանգ ԲԴԽ-ից։
-ԲԴԽ անդամներից առնվազն երեքի զանգերից շատ կուրախանամ:

Խորհրդակցական սենյակում։
-Խորհդակցական սենյակը մի վայր է, որտեղից ամեն անգամ դուրս ես գալիս նոր պատասխանատվություն ստանձնած:

Մեր շարքի նախորդ մասնակիցը՝ Երեւան քաղաքի ընդհանուր իրավասության դատարանի նախագահ Ռուբեն Վարդազարյանը Ձեզ հարցնում է՝ ում ինքնաբացարկ կհայտնեիք։
-Այն պաշտոնյաներին, որոնք այս կամ այն ոլորտում որոշումներ են կայացնում, ղեկավարվելով միայն իրենց սեփական շահով / ոչ միայն նյութական շահագրգռվածությանը նկատի ունեմ, այլ նաև անձնական ամբիցիաներով, վրեժխնդրությամբ, նախկինում ստացած առավելությունների համար փոխհատուցում տալու ձգտնումներով/ :

Հարց շարքի հաջորդ մասնակցին։
-Եթե ընտրության հնարավորություն ունենայիք, նորից դատավոր կդառնայի՞ք։

Շարքը՝ Ինգա Մարտինյանի

Այս թեմայով «Ռոմեո և Ջուլիետա» ներկայացման Ռոմեոյի դերը չէի խաղա, չեն էլ առաջարկում. բլից հարցազրույց դատավոր Զարուհի Նախշքարյանի հետ Ամենառոմանտիկ օրը՝ սիրո առաջարկությանս հաստատումն ստանալու օրը. Բլից հարցազրույց Սերգեյ Չիչոյանի հետ Դատավորի ներկայիս վարձատրության չափը թույլ չի տալիս օգտվել բրենդային հագուստներից. բլից հարցազրույց դատավոր Լիանա Հակոբյանի հետ Ինձ մեղավոր եմ զգում եղբորս հանդեպ, ով իմ փոխարեն հայրական ապտակ ստացավ. Բլից հարցազրույց դատավոր Ռուբիկ Մխիթարյանի հետ Ես ընկերներ ձեռք չեմ բերել, որ հիասթափվեմ. Բլից հարցազրույց դատավոր Գոռ Թորոսյանի հետ