Պարզաբանում. Ի՞նչ է անհրաժեշտ երեխայի ծննդյան միանվագ նպաստ ստանալու համար

Պարզաբանում 9 Հունիս, 2019 13:00

«Պարզաբանում» շարքի շրջանակներում այս անգամ անդրադարձել ենք երեխայի ծննդյան միանվագ նպաստ նշանակելու և վճարելու կարգին, փաստաթղթերին՝ անհրաժեշտ գումարը ստանալու համար, ժամկետներին:

«Պետական նպաստների մասին» ՀՀ օրենքի և «Երեխայի ծննդյան միանվագ նպաստի չափը սահմանելու, երեխայի ծննդյան միանվագ նպաստ նշանակելու և վճարելու կարգը հաստատելու մասին» ՀՀ կառավարության 2014 թվականի մարտի 6-ի N 275-Ն որոշման համաձայն երեխայի ծննդյան դեպքում նշանակվում և վճարվում է միանվագ նպաստ: ՀՀ Կառավարությունը հաստատել է երեխայի ծննդյան միանվագ նպաստի չափը, ըստ նոր ծնված երեխայի հերթական կարգաթվի՝

ա) 1-ին երեխայի ծնվելու դեպքում կտրամադրի 50.000 դրամ,
բ) 2-րդ երեխայի ծնվելու դեպքում ՝ 150.000 դրամ,
գ) 3-րդ և 4-րդ երեխայի ծնվելու դեպքում՝ 1.000.000 դրամ,
դ) 5-րդ և յուրաքանչյուր հաջորդ երեխայի ծնվելու դեպքում` 1.500.000 դրամ միանվագ նպաստ։

Միաժամանակ մեկից ավելի երեխա ծնվելու դեպքում երեխայի ծննդյան միանվագ նպաստի չափը յուրաքանչյուր երեխայի համար` նոր ծնված երեխաներից ամենաբարձր կարգաթիվ ունեցող երեխայի համար սահմանված չափով:
Երրորդ և յուրաքանչյուր հաջորդ երեխայի ծնվելու դեպքում երեխայի ծննդյան միանվագ նպաստի՝ պետական աջակցության հաշվին մուտքագրվող չափը`
ա) երրորդ երեխայի ծնվելու դեպքում՝ հինգ հարյուր հազար դրամ,
բ) չորրորդ երեխայի ծնվելու դեպքում՝ հինգ հարյուր հազար դրամ,
գ) հինգերորդ և յուրաքանչյուր հաջորդ երեխայի ծնվելու դեպքում՝ մեկ միլիոն դրամ.

Ո՞վ է նշանակում և վճարում երեխայի ծննդյան միանվագ նպաստը․
Երեխայի ծննդյան միանվագ նպաստը նշանակում և վճարում է Հայաստանի Հանրապետության աշխատանքի և սոցիալական հարցերի նախարարության սոցիալական ապահովության պետական ծառայությունը՝ իր տարածքային բաժինների միջոցով:

Ու՞ր պետք է դիմել երեխայի ծննդյան միանվագ նպաստը ստանալու համար և ի՞նչ փաստաթղթեր է անհրաժեշտ ներկայացնել․
Նպաստը նշանակելու համար ծնողը (հայրը կամ մայրը) անձամբ կամ այլ անձի միջոցով տարածքային բաժին պետք է ներկայացնի
1) դիմում, որում ներառվում են`
ա. դիմողի անունը, ազգանունը, անձը հաստատող փաստաթղթի սերիան և համարը, , հանրային ծառայությունների համարանիշը, հանրային ծառայությունների համարանիշ չստանալու մասին տեղեկանքի համարը, եթե ծնողը հրաժարվել է հանրային ծառայությունների համարանիշ ստանալուց,
բ. նոր ծնված երեխայի կարգաթիվը (միաժամանակ մեկից ավելի երեխա ծնվելու դեպքում` նոր ծնված երեխաների թիվը և ընտանիքում երեխաների թիվը), անունը, ազգանունը, ծննդյան վկայականի (կյանքի չորս շաբաթվա ընթացքում մահացած երեխայի դեպքում` մահվան վկայականի) սերիան և համարը, բնակության (հաշվառման) վայրի հասցեն (բացառությամբ այն դեպքի, երբ նոր ծնված երեխան մահացել է), հանրային ծառայությունների համարանիշը (հանրային ծառայությունների համարանիշ չստանալու մասին տեղեկանքի համարը, եթե ծնողը հրաժարվել է երեխայի հանրային ծառայությունների համարանիշ ստանալուց),
գ. նպաստի` ուղղակի վճարվող գումարը վճարելու համար ծնողի (սույն կարգով սահմանված դեպքում` նրա լիազորած անձի) բանկային հաշվի համարը կամ այն բանկի անվանումը, որտեղից ծնողը (սույն կարգով սահմանված դեպքում` նրա լիազորած անձը) ցանկանում է ստանալ գումարը,
դ. եթե դիմումը ներկայացվում է ընտանիքում երրորդ կամ յուրաքանչյուր հաջորդ երեխայի ծննդյան կապակցությամբ տրվող նպաստի համար` պետական աջակցության (բանկային) հաշվի համարը.
2) դիմողի և ծնողի անձը հաստատող փաստաթղթերը, ծնողի` հանրային ծառայությունների համարանիշ չստանալու մասին տեղեկանքը, եթե ծնողը հրաժարվել է հանրային ծառայությունների համարանիշ ստանալուց,
3) նոր ծնված երեխայի ծննդյան վկայականը, հանրային ծառայությունների համարանիշը կամ հանրային ծառայությունների համարանիշ չստանալու մասին տեղեկանքը, իսկ կյանքի չորս շաբաթվա ընթացքում մահացած երեխայի դեպքում՝ ծննդյան ակտի գրանցման վերաբերյալ տեղեկանքը և մահվան վկայականը.
4) Եթե դիմողն օտարերկրյա քաղաքացի է, ապա անհրաժեշտ է ներկայացնել նաև այլ պետությունում երեխայի ծննդյան կապակցությամբ տրվող նպաստ ստացած չլինելու վերա¬բերյալ փաստաթուղթ:
5) Նպաստը նշանակվում (վճարվում) է նաև առցանց ներկայացված տեղեկատվության հիման վրա` www.epension.am կայքէջ մուտք գործելով և առցանց տվյալները ներկայացնելով :

Երեխայի ծննդյան միանվագ նպաստը նշանակվում է ծնված յուրաքանչյուր երեխայի համար: Եթե երեխան մահացած է ծնվել, նպաստ չի նշանակվում։
Մինչև նոր ծնված երեխայի ծննդյան օրը մահացած ընտանիքի մյուս երեխաները նոր ծնված երեխայի կարգաթիվը որոշելու համար հաշվի չեն առնվում:

Ի՞նչ ժամկետներում կարող են ծնողները դիմել նպաստ ստանալու համար․
Երեխայի ծննդյան միանվագ նպաստը նշանակվում է, եթե դիմողը դիմել է նոր ծնված երեխայի ծննդյան օրվանից հետո՝ 12 ամսվա ընթացքում:

Հնարավո՞ր է, որ նպաստ նշանակելը մերժեն․
Տարածքային բաժինը կարող է մերժել նպաստ նշանակելը,եթե՝
1) ծնողը և նոր ծնված երեխան հաշվառված չեն Հայաստանի Հանրապետությունում բնակության վայրի հասցեով կամ օտարերկրյա քաղաքացի ծնողը բնակչության պետական ռեգիստրում երեխայի ծննդյան օրվա դրությամբ երեք տարի անընդմեջ հաշվառված չէ Հայաստանի Հանրապետությունում բնակության վայրի հասցեով.
2) դիմումը ներկայացվել է նոր ծնված երեխայի ծննդյան ամսվանից 12 ամիս հետո.
3) ծնողը ներկայացված (տարածքային բաժնի կողմից ճշտված) տվյալների և փաստաթղթերի հիման վրա չունի նպաստի իրավունք, կամ նոր ծնված երեխայի ծննդյան կապակցությամբ արդեն նշանակվել է նպաստ.
4) ներկայացվել են ոչ հավաստի տվյալներ (ներկայացված տվյալներում առկա են անճշտություններ).
5) նոր ծնված երեխայի ծննդի պետական գրանցումն իրականացրել է օտարերկրյա պետության իրավասու մարմինը, և ծնողն ու նոր ծնված երեխան դիմելու օրվա դրությամբ չեն գտնվում Հայաստանի Հանրապետությունում:

Երեխայից հրաժարվելու, երեխային բնակչության սոցիալական պաշտպանության կազմակերպությունում (մանկատուն) տեղավորելու, երեխայի որդեգրվելու կամ երեխայի` առանց ծնողական խնամքի մնացած երեխայի կարգավիճակ ձեռք բերելու դեպքում երեխայի ծնողը կորցնում է նպաստ ստանալու իրավունքը:

Ինչպե՞ս է փոխանցվում նպաստը․
Նպաստը նշանակելու և վճարելու վերաբերյալ որոշում կայացնելու դեպքում նպաստի` ուղղակի վճարվող գումարն արտացոլվում է վճարման ցուցակներում: Նպաստի` ուղղակի վճարվող գումարը վճարվում է անկանխիկ եղանակով (գումարը ծնողի կամ նրա լիազորած անձի բանկային հաշվին փոխանցելը)` Հայաստանի Հանրապետության աշխատանքի և սոցիալական հարցերի նախարարության հետ կնքված պայմանագրի հիման վրա համապատասխան ծառայություններ մատուցող բանկի միջոցով:

Հարցերին պատասխանել է «Արատտա քընսալթինգ» ՍՊԸ իրավախորհրդատու Սյուզաննա Պողոսյանը: