Հիասթափեցրել է դատախազը, վախենում է անցումային արդարադատությունից. Բլից հարցազրույց դատավոր Դավիթ Բալայանի հետ

ArmDaily.am-ը «Խորհրդակցական սենյակում» շարքի շրջանակներում շարունակում է բացահայտել դատավորներին: Այս անգամ մեր բլից հարցերին պատասխանել է Երևան քաղաքի ընդհանուր իրավասության դատարանի դատավոր Դավիթ Բալայանը։

Ո՞վ եք դուք եւ ինչպիսի՞ն եք:

-Դավիթ Բալայանն եմ, արդարադատ ղարաբաղցի:

Կարգախոսը։

-Արդարությունը հիվանդանում է, բայց չի մեռնում:

Ձեր ամենաուժեղ եւ թույլ կողմերը:

-Բարի եմ, վճռական, միաժամանակ անհամբեր… 

Ի՞նչ կփոխեիք Ձեր մեջ եւ Ձեր ապրած կյանքում, կամ եթե նորից ծնվեիք:

-Դժվարանում եմ պատկերացնել:

Ամենաշատը ինչո՞ւմ եք Ձեզ մեղադրում:

-Չափից դուրս ներողամիտ եմ:

 Ձեր կյանքի սխալները:

 -Դրանք փոքրաթիվ են ու աններելի չեն:

Ինչի՞ համար եք զղջում:

-Զղջալն իմ ոճի մեջ չէ, ամեն ինչ արվում է ժամանակի և իրավիճակի պահանջներից ելնելով:

Ամենամեծ հաղթանակը եւ պարտությունը:

-Ամենամեծ հաղթանակն առջևում է, պարտություններ չեմ հիշում:

Նպատակն արդարացնո՞ւմ է միջոցները, ինչի՞ եք պատրաստ ձեր նպատակներին հասնելու համար։

- Հիմնականում այո, բայց միշտ չէ, որ կարելի է այդ սկզբունքով առաջնորդվել:  

Ի՞նչ կյանքում երբեք չեք անի։

-էքստրիմի սիրահար եմ, դժվարարում եմ այդ հարցին պատասխանել:

Երբեւէ Ձեր արածի կամ ասածի համար ամաչե՞լ եք:

-Պատահել է:

Ո՞ւմ կամ ինչի՞ն եք հավատում:

-Հավատում եմ Աստծուն, ընտանիքիս, ընկերներիս, ուժերիս,

Ո՞վ է Ձեզ կյանքում հիասթափեցրել:

-Դատախազը:

Ի՞նչն է Ձեզ հուսահատեցնում:

-Անարդարությունը, քծնանքը, շողոքորթությունը:

Ամենահամարձակ քայլը կյանքում:

-Այդ գործը դեռ իմ վարույթում չի:

Հպարտությունը:

-Երեխաներս:

Զարմանում եք, երբ…

-Ակնհայտ սխալը չեն ընդունում:

Զայրանում եք, երբ…

-Նույն պատճառով:  

Տխրելու պատճառներ, ուրախանալու առիթներ:

 -Կյանքը դրանով է նաև հետաքրքիր:

Երջանկությունն ի՞նչ գույն ունի:

-Եռագույն:

Թերթում եք Ձեր հիշողությունների գիրքը, ամենալավ եւ վատ հիշողությունը ո՞րն է:

-Ով չունի հիշողություն նրա ապագան մշուշոտ է:

 Մեր օրերի լավագույն քաղաքական գործիչն ո՞վ է:

-Ամենահաջողվածը Նիկոլ Փաշինյանն է  

Ձեր մասին ամենանհեթեթ սուտը, բամբասանքը:

-2017 թվականի հունվարին` որսի ժամանակ, անզգուշության հետևանքով հրազենային վիրավորում էի պատճառել ինքս ինձ: Լուրեր էին տարածել, որ դատախազներից մեկը մահափորձ է արել իմ նկաստմամբ:

Ինչի՞ց եք վախենում:

-Անցումային արդարադատությունից ))):

Վատագույն սովորությունը: Սիրելի եւ չսիրելի գործեր:

-Ծխելը: Գործերի ծավալով պայմանավորված դրանք տարանջատելն անհնարին է դարձել: 

Հայտնի կանանցից ո՞ւմ հետ չէիք հրաժարվի հանդիպել:

-Նայած ինչ առիթով:

Անցած սերեր:

-Առաջին սերը միշտ կուտ է գնում:

Սեր խոստովանելու լավագույն ձեւը:

-Պարզ ու հասարակ:

Ձեր ընտրյալը:

-Ընտրել եմ 2000 թվականին և դրանից հետո ընտրական փուլն ավարտվել է:

Ընտանեկան վեճերը ի՞նչ թեմաների շուրջ են լինում:

-Երեխաների, հանգստի մեկնելու անհրաժեշտության, աշխատանքից ուշ գալու կամ չգալու:

Ընտանեկան «հոգսերից» որո՞նք են Ձեզ վրա, օրինակ՝ շուկա գնալ, աղբ թափել, լամպ փոխել, երեխաներին կարուսել, սրճարան տանել եւ այլն:

-Հոգսերը աշխատում ենք կիսել, դրանցից մի մասը հաճույք են պատճառում, երեխաներն էլ օգնում են կենցաղային հարցերում:

Խաղադրույքներից մինչեւ կազինոներ, ինչքա՞ն գումար եք պարտվել եւ հաղթել:

-Առանց փաստաբանի հրաժարվում եմ այդ մեղադրանքին պատասխանել:

Խոհանոցում ի՞նչ կարող եք պատրաստել եւ ի՞նչ եք սիրում ուտել: Ձեր սիրտ տանող ճանապարհը ե՞ւս ստամոքսով է:

-Համեղ ուտել սիրում եմ, ինքս տարբեր ուտեստներ եմ պատրաստում, ով ճաշակել է՝ չի դժգոհել:

Որպես կյանքում մի հերոս, Ձեզ կինն ու գինին փրկո՞ւմ են, թե՞ կործանում:

-Ապահովում են իմ բնական կենսագործունեությունը:

Պակաս-պռատ մանկություն, ուսանողությո՞ւն եք ունեցել, թե՞ Դուք ոսկե երիտասարդության ներկայացուցիչ էիք...

-Դպրոցական ու ուսանողական տարիների մեծ մասն անցել է քաղաքական պայքարի ժամանակահատվածում, ուսանող ժամանակ մոտ մեկ տարի քաղբանտարկյալի որդի էի:

Երազ տեսա…

-Վարույթումս մնացել էր 20 գործ:

Երբեւէ ասել կամ մտածել եք՝ կանգ առ ակնթարթ, ինչ չքնաղ ես դու:

-Միանշանակ:

Ձեր զենքը Ձեր հա՞յրն է...ինչ չէիք ունենա, եթե Կիմ Բալայանի որդին չլինեիք։

-Խիստ քննադատ, իմաստություն, շրջահայացություն:

Ձեր տան անդամների մեծ մասը պաշտոնյաներ են, ինչպե՞ս է հաջողվել, գաղտնիքը ո՞րն է։ Առիթներ լինում են միմյանց գործունեությունը քննադատելու։

-Հայրենիքին ծառայելու գեներն ակտիվ են: Իրավական հարցերի շուրջ վեճերը հաճախակի են, բայց մեծ եղբոր գործոնը որոշիչ է, առավել ևս երբ դատարանի որոշումները քննարկման ու քննադատման ենթակա չեն: 

Զանգ ԲԴԽ-ից...

-Նման պատվի դեռ չեմ արժանացել:

Խորհրդակցական սենյակում...

-Բաժանորդն անհասանելի է:

Վարչական վերաքննիչ դատարանի նախագահ Հովսեփ Բեդևյանը Ձեզ հարցնում է՝ վերջին անգամ ե՞րբ եք կյանքում առաջին անգամ մի բան արել։

-Մոտ երկու ամիս առաջ մի գործով ամբաստանյալի ինքնությունը ճշտելուց հետո հասկացա, որ նույնը գործողությունը արել եմ նախորդ նիստում, դա առաջին անգամ էր, որ ես վրիպեցի ու համոզված եմ որ այդ վրիպումը պայմանավորվածա գերծանրաբեռնվածությամբ։

Այժմ, Ձեր հարցը շարքին մասնակցող մյուս դատավորին։

-Ո՞ւմ կփոխեիք համակարգում:

«Խորհրդակցական սենյակում»  շարքին մասնակցել են

Ալեքսանդր Ազարյանը 

Գագիկ Հովհաննիսյանը ,

Քրիստինե Մկոյանը

 Գեւորգ Նարինյանը ,

Անի Հարությունյանը ,

Սուրեն Մնոյանը

Ռաֆիկ Խանդանյանը

Ստեփան ՄիքայելյանըԴավիթ Հարությունյանը

Արսեն Նիկողոսյանը

Աննա Փիլոսյանը

Հովսեփ Բեդեւյանը

Շարքը՝ Ինգա Մարտինյանի