Փաշինյանը հենց այս պահից ցեմենտբետոնում է իր ապագա վերընտրությունը. Զոհրաբյանը՝ Հովակիմյանին ԿԸՀ նախագահի պաշտոնում առաջադրելու մասին

«Քանի որ Նիկոլ Փաշինյանը շատ լավ հասկանում է, որ հասարակության ադեկվատ հատվածը , որը մեծամասնություն է, իրեն դեմ է, հանած իր աղանդավորական սեկտան, որը 10-12 տոկոս է կազմում և հանած վարչական ռեսուրսը, ինքը ահա հենց այս պահից ցեմենտբետոնում է իր ապագա վերընտրությունը՝ փորձելով ընտրական գործընթացների մեջ ներգրավված բոլոր կառույցները սարքել ձեռնասուն և կամակատար, ինչպես դարձրեց Սահմանադրական դատարանը»։

ArmDaily-ի հետ զրույցում նման տեսակետ հայտնեց «Անվտանգություն և ժողովրդավարություն» իրավապաշտպան ՀԿ հիմնադիր, ԱԺ նախկին պատգամավոր Նաիրա Զոհրաբյանը՝ անդրադառնալով ԿԸՀ նախագահի պաշտոնում իշխանական պատգամավոր Վահագն Հովակիմյանին առաջադրելու որոշմանը։

Զոհրաբյանի խոսքով՝ վարչապետն անում է այն, ինչ ցանկանում է, և դա շարունակվելու է այնքան, որքան հանդուրժի հասարակությունը։ «Լա՛վ է անում Նիկոլը, քանի դեռ քաղաքական ուժերը, քանի դեռ հասարակության մի զգալի հատվածը հանդուրժում է այս դիկտատուրան, հանդուրժում է այս «բեսպրեդելը», այն ինչ անում է Նիկոլը ժողովրդի գլխին, ուրեմն ինքն ազատ է։ Ես իրեն լավ գիտեմ, ինքը սեղմելու է «պեդալը» այնքան , ինչքան մեր համբերությունը հերիքելու է»,-նշեց Զոհրաբյանը։

Ինչ վերաբերում է Վահագն Հովակիմյանին, ապա, ըստ քաղաքական գործչի, նա երբեք էլ աչքի չի ընկել  կարողություններով, այդ թվում՝ լրագրողական գործունեության տարիներին։ «Վահագն Հովակիմյանի հետ ես աշխատել եմ լրագրող «Հայկական ժամանակում»։

Մի քանի անգամ Նիկոլը անձամբ Վահագն Հովակիմյանին որպես «պրոֆնիգոդնի» շպրտել է դուրս աշխատանքից։ Ես չեմ սիրում ներքին խոհանոց հրապարակել , բայց քանի որ այդ հումորն այլևս հրապարակվել է «Հրապարակ» օրաթերթում, ցիտեմ, քանիցս ասել է՝ « ֆայլա բազարից գաջ քսող բերեմ, քեզանից ավելի լավ նյութ կգրի»։ Եվ ահա այդ տոտալ դիլետանտը, որ չգիտես ինչպես դարձավ սահմանադրագետ, այսօր հավակնում է ԿԸՀ-ի նախագահի պաշտոնին։ Հասկանո՞ւմ եք, մինչև ուր է իջեցված նշաձողը, մինչև մինուս անսահմանություն»,- ընդգծեց Զոհրաբյանը։

Նա համոզված է՝ եթե նման բան տեղի ունենար նախկին իշխանությունների օրոք՝ միջազգային կառույցները շատ կոշտ կարձագանքեին։  «Կլինի Լևոն Տեր Պետրոսյան, Ռոբերտ Քոչարյան, Սերժ Սարգսյան, այսպիսի անկուսակցական մարմինը բացահայտ կուսակցականացնեին, ես ձեզ վստահեցնում եմ՝ միջազգային կառույցների ոռնոցը և վայնասունը լսված կլիներ։ Սակայն քանի որ միջազգային կառույցները վաղուց վերածվել են քաղաքական օբյեկտների, նրանց ձայնը չենք լսելու ո՛չ այս դեպքում, ո՛չ նաև ապագա բոլոր անօրինականությունների դեպքում, որ Նիկոլը մեր բոլորի թուլտվությամբ դեռ անելու է»,-ընդգծեց Նաիրա Զոհրաբյանը։ 

Արփինե Նավասարդյան