Փաշինյանի ղեկավարման ամբողջ ժամանակաշրջանի ամենալուրջ հակառուսական դեմարշներից մեկն էր. ռազմական փորձագետ

«Կարծում եմ՝ սա քաղաքական հայտարարություն էր և ամենից առաջ քաղաքական դեմարշ էր, այլ ոչ թե կոնկրետ գումարային խնդիրներ կամ նրբություններ։ Վարչապետն ակնարկեց նաև, որ մեր դաշնակիցները հաճախ մեր թշնամիների օգտին են գործում, ըստ էության, երևի թե նկատի ունենալով հանրահայտ «զանգեզուրյան միջանցքը», այսինքն՝  երրորդական մակարդակում ակնարկ գնաց, որ Ռուսաստանը շահագրգռված է, որ Ադրբեջանը Սյունիքի միջանցքը վերցնի»։

ArmDaily-ի հետ զրույցում նման տեսակետ հայտնեց ռազմական փորձագետ Մհեր Հակոբյանը՝ անդրադառալով  Նիկոլ Փաշինյանի այսօրվա հայտարարությանը, որ կան դեպքեր՝ հարյուր միլիոնավոր դոլարներ վճարված են, բայց Հայաստանի նկատմամբ մատակարարումների պարտավորությունները չեն կատարվում, այդ թվում՝ դաշնակից երկրների կողմից։

Ռազմական փորձագետի գնահատմամբ՝ վարչապետի կառավարման ընթացքում այս հայտարարութունը ամենալուրջ հակառուսական ելույթն էր, որն, ըստ էության, դեպի Արևմուտք քայլ էր։ «Ես կոնկրետ զենքի առումով չէի ցանկանա մեկնաբանություն տալ, որովհետև սա քաղաքական դեմարշ էր, ոչ թե կոնկրետ ռազմական։ 100 մլն է , 200 մլն է, այդքան էական չէր, եթե հարց լինի, ինքը միշտ էլ իր ոճով կարող է ասել՝ սխալ են զեկուցել և այլն։ Հայաստանի 3-րդ Հանրապետության պատմության ընթացքում, նաև Նիկոլ Փաշինյանի ղեկավարման ողջ ժամանակաշրջանում ամենալուրջ հակառուսական դեմարշներից մեկն էր,որն արվեց կոնկրետ աշխարհաքաղաքական ինչ-որ զարգացումներով»,- նշեց ռազմական փորձագետը։

Նրա խոսքով՝  Ուկրաինայում այս պահին Ռուսաստանը շատ խնդիրներ ունի, վիճակը լուրջ է, և Ռուսաստանի դժվարությունները ուկրաինական պատերազմում հենց պուտինյան ռեժիմի փակուղային զարգացման արդյունք է։ «Մանավանդ այս սեպտեմբերյան ագրեսիայից հետո ռուսական խումբը ցույց տվեց, որ պատրաստ չէ մեզ համար Սյունիքում կռվել։ Լավ է, թե վատ՝ իրականություն է։ Ես միշտ ասել եմ, որ Ուկրաինայի պատերազմն անդրադառնալու է նաև մեզ վրա։ Այս ամենը հաշի առնելով՝ պետք է ուղղակի ինչ -որ պահի ռուսներին ասել. «հարգելի՛ս, կներես, ոչ մի անձնական բան, բայց մենք ունենք անվտանգության խնդիրներ, և դու չես կարողանում մեզ օգնել,ըմբռնումով մոտեցի,մեջքդ ուղղի, հետո տեսնենք ինչ է լինում»,- ընդգծեց Հակոբյանը։

Նրա կարծիքով՝ այն,որ Ռուսաստանի վրա այլևս հույս չենք կարող դնել, փաստեց նաև երկրորդ նախագահը երեկվա մամուլի ասուլիսում։ «Շատ կարևոր է Ռոբերտ Քոչարյանի երեկվա հայտարարությունը, որ, ըստ էության, մի քիչ թաքնված տեքստով, բայց ասեց ՝ Ռուսաստանի վրա կոպիտ ասած հույս չդնեք։ Իրենց վիճակը այնքան ծանր է, որ քո Արցախի խնդիրը հարյուրերորդական է։ Եթե Քոչարյանի նման գործիչն է ասում հույս չդնեք Ռուսաստանի վրա, ուրեմն, ըստ էության, վերջ»,- ասաց ռազմական փորձագետը։

Անդրադառնալով վարչապետի այն հայտարարությանը, որ ստեղծված իրավիճակում լուծումը կարող է լինել Հայաստան-Ադրբեջան սահմանին միջազգային դիտորդական առաքելության տեղակայումը՝ ռազմական փորձագետը նշեց. դիտորդական առաքելություն կլինի, թե միջազգային խաղաղապահ ուժեր՝ զսպող դեր կունենա Բաքվի ագրեսիայի դեմ։ «Այստեղ նախ կարևոր է դիտորդների կազմը և, բնականաբար, թե ո՞ր երկրներն են ներկայացնում։ Ըստ էության, Փաշինյանը նկատի ունի աշխարհի առաջատար պետությունները, ենթադրում եմ ամենից առաջ ԱՄՆ , ֆրանսիա, եթե ԱՄՆ ենք ասում, Մեծ Բրիտանիան էլ հետը։ Զգուշորեն ինձ թույլ տամ ասել, եթե ԱՄՆ դիտորդները գան, ինքը դիտորդ է ասում, բայց խաղաղապահ ուժերը կարող են լինել։ Կարևորը ԱՄՆ-ի դրոշը լինի, ԱՄՆ-ն այնքան հեղինակություն ունի և այնքան ուշադիր է իր դաշնակիցների նկատմամբ, որ չեմ կարծում՝ թույլ տա այստեղ ինչ-որ մի Ադրբեջան խուլիգանություն անի և ԱՄՆ-ի հեղինակությունը աշխարհում գցի»,- մանրամասնեց Հակոբյանը։

Ավելի վաղ հնդկական Economic Times պարբերականը հայտնել էր, որ Հայաստանը 245 մլն դոլարի զենք է գնել Հնդկաստանից,ռազմական փորձագետի կարծիքով՝ սա Ռուսաստանից հրաժարվելու և դեպի Արևմուտք գնալու քայլերի տրամաբանական շարունակությունն է։ «Այս պահին Ռուսաստանն ինքը զենքի խնդիր ունի, ինքը ուզի էլ՝ չի կարող հիմա մեզ զենք տալ։ Խնդիրն այն էր, որ ռուսները մեզ տալիս էին մի քիչ զեղչով, մի քիչ անվճար, մի քիչ նվեր։ Հիմա Արևմուտքի դեպքում պետք է վճարենք, և սա էլ իր դրական կողմն ունի, վճարում ես՝ քաղաքական ազդեցությունից ես զերծ մնում»,- եզրափակեց Մհեր Հակոբյանը։

Արփինե Նավասարդյան