Քոչարյանը և մյուսները Հայաստանը դարձրին կոնֆլիկտի կողմ, ագրեսոր. Հովիկ Աղազարյան

«Երբ ասում ենք օրակարգ են բերում խաղաղության դարաշրջանի հարցը, դա չի նշանակում մենք հարյուր տոկոսով վստահ ենք, որ այն իրականություն կդառնա, որովհետև դա միայն մեզանից կախված չի, դա կախված է նաև մեր հարևաններից, մեր թշնամիների վարքագծից, այդ բանը ոնց կարող է պարոն Քոչարյանը չընկալի»,-այս մասին ArmDaily-ի հետ զրույցում ասաց ՔՊ-ական պատգամավոր Հովիկ Աղազարյանը՝ անդրադառնալով երկրորդ նախագահ Ռոբերտ Քոչարյանի այն հայտարարությանը, որ վարչապետի ելույթը ՄԱԿ-ում խաղաղության դարաշրջանի հոգեհանգստի ելույթ էր։

Աղազարյանի գնահատմամբ՝ վարչապետի հայտարարությունը խաղաղության դարաշրջանի վերաբերյալ չի ենթադրում, թե կարող ենք լիովին վստահ լինել, որ այն կյանքի կկոչվի, քանի որ դա միայն Հայաստանից կախված չէ։ «Նիկոլ Փաշինյանը հայտարարել է նախընտրական ծրագրում, որ մենք կողմ ենք խաղաղության դարաշրջանի բացմանը, դա նշանակում է մենք հարյուր տոկոսով վստա՞հ ենք, ո՞նց կարանք հարյուր տոկոսով վստահ լինենք մի բանում, ինչը մենակ մեզնից կախված չի»,- ասաց պատգամավորը։

Նրա համոզմամբ՝ խաղաղության դարաշրջանի մասին խոսելով՝ Հայաստանը միջազգային հանրությանը ցույց է տալիս հարևան երկրների նկատմամբ իր մոտեցումները։ «Խաղաղության դարաշրջան բացելու ճանապարհով գնալով առաջին հերթին մենք ներկայանում ենք աշխարհին մեր մոտեցումներով՝ կապված հարևանների հետ, բայց դա չի նշանակում, որ մենք չպետք է ուժեղացնենք մեր պաշտպանությունը կամ չպետք է զինվենք և այլն։ Աշխարհում մարդկության պատմությունը դա պատերազմների պատմություն է։ Մի պատերազմից մինչև մյուս պատերազմ ընկած ժամանակահատվածը մարդիկ օգտագործել են հաջորդ պատերազմին պատրաստվելու համար։ Ուղղակի քաղաքակրթությունը քանի գնում է ավելի բարոյական է դառնում»,-նշեց Աղազարյանը։

Պատգամավորը բացառում է, որ իշխանափոխութուն տեղի կունենա, քանի որ, ըստ Աղազարյանի, իրենց ընտրելիս մարդիկ գիտակցել են, որ վարչապետ է լինելու Նիկոլ Փաշինյանը։ «Եթե պարոն Քոչարյանը շտապում է իշխանափոխության հարցում, թող նախաձեռնի ինչ-որ գործընթացներ, որոնք կարող են բերել արտահերթ խորհրդարանական ընտրությունների, եթե ոչ՝ պիտի նեղություն քաշի սպասի ևս 4 տարի։ Երբ որ ես ընտրվել եմ պատգամավոր, ինձ ընտրել են պատկերացում ունենալով, որ Նիկոլ Փաշինյանը լինելու է վարչապետ, հետևաբար ես չեմ կարող իմ ընտրողների պատգամը ոտնահարել։ Մեր կողմից բացառվում է այդ հավանական տարբերակը, այսպես կոչված, ըստ իրենց հավանական տարբերակի՝ ընդունելի թեկնածու լինի և փոխվի վարչապետը։ Այն, որ Նիկոլ Փաշինյանը իբրև թե չի խորհրդակցում իր թիմի հետ, հաշվի չի առնում իր թիմակիցների կարծիքը, դա թյուրըմբռնում է, դա ուղղակի քաղաքական մանիպուլյացիաների համար միջոց է։ Քաղաքական թիմը Նիկոլ Փաշինյանի շուրջ համախմբված է, ինչպես երբեք», - ընդգծեց Աղազարյանը։

Նրա խոսքով՝ դեռևս 90-ականներին լուծված էր Արցախի ժողովրդի ինքնորոշման հարցը, և Ադրբեջանը պատերազմի միջոցով ճնշել է այդ իրավունքը։ «Մեր տղաների հայրենասիրության, տոգորված պայքարի արդյունքում Արցախի ՊԲ-ն, Արցախի ժողովուրդը իր ինքնորոշման համար զենք վերցրեց և ստեղծեց անվտանգության գոտի։ Դրանից հետո Ռոբերտ Քոչարյանը և մյուսները Հայաստանին ներգրավեցին այդ կոնֆլիկտի մեջ, կոնֆլիկտ էր, որովհետև Արցախի ժողովուրդը ինքնորոշվել էր, և Ադրբեջանը ցանկացավ արյունով ճնշել այդ ինքնորոշման իրավունքը. հայ ժողովրդի մի հսկայական զանգված կանգնեց Արցախի ժողովրդի կողքին, բայց դա չի նշանակում, որ Հայաստանի պետությունը պետք է ստորագրեր այդ հայտնի փաստաթուղթը 94թ-ին և հետևաբար դառնար կողմ կոնֆլիկտի։ Ռոբերտ Քոչարյանը և մյուսները Հայաստանին դարձրին կոնֆլիկտի կողմ, ագրեսոր և մենք այդ իմաստով մեկուսացվեցինք քաղաքակիրթ աշխարհից։ Հիմա մենք ճշտում ենք Հայաստան-Ադրբեջան հարաբերությունները, այդ գործընթացների մեջ ենք։

Ինչ վերաբերում է Արցախի ժողովրդին, ինքը ինքնորոշվելու է, հայտարարելու է իր անկախության մասին։ Մենք որպես ազգ և պետություն պարտավոր ենք անել հնարավորը և անհնարինը այդ իրավունքի իրացման համար»,-մանրամասնեց ՔՊ-ական պատգամավորը։

Անդրադառնալով երկրորդ նախագահի այն հայտարարությանը, որ Իրանին պետք է ներգրավել Հայաստանի անվտանգային նո ճարտարապետության մեջ՝ Աղազարյանը վստահություն հայտնեց, որ Իրանը դժվար պահին կաջակցի մեզ։ «Մենք Իրանի Իսլամական Հանրապետության հետ գտնվում ենք շատ լավ հարաբերությունների մեջ և այդ հարաբերությունները օր օրի զարգանում են այն ուղղությամբ, որ անհրաժեշտ պահին մենք կարող ենք վստահ լինել, որ մենք ունենք մի հարևան, որը մեզ կաջակցի, մեր կողքին կլինի դժվար պահին։ Սակայն չենք կիսում այն տեսակետը, որ գլխավոր երաշխավորը Իրանն է, բայց մեծ կարևորություն եմ տալիս Իրանի դիրքորոշմանը»,-ավելացրեց Հովիկ Աղազարյանը։

Արփինե Նավասարդյան