Ինչքան Փաշինյանի իշխանությունը երկարում է, այնքան կարճանում է Հայաստանի և Արցախի կյանքը. Մետաքսե Հակոբյան

«Ըստ էության Ռոբերտ Քոչարյանն ասում է այն, ինչ կա իրականում։ Ամեն կերպ Ադրբեջանը փաստում է, որ պատերազմով ամեն բան որոշված է և Ղարաբաղի հարց լինել չի կարող, և այո՛, ցավով պետք է նշենք՝ ՀՀ իշխանությունը դա ևս ամրագրում է իր պահվածքով և գործողություններով, այսինքն՝ ընդունում է այն, ինչ ըստ էության պնդում է Ադրբեջանը և փորձում է միջազգային բոլոր հարթակներում դա ընդունել տալ»,-ArmDaily-ի հետ զրույցում նման տեսակետ հայտնեց Արցախի Աժ «Արդարություն» կուսակցության պատգամավոր Մետաքսե Հակոբյանը՝ անդրադառնալով Ռոբերտ Քոչարյանի այն հայտարարությանը, որ Արցախի թեման ընդհանրապես բացակայում է բանակցային գործընթացներում։

Պատգամավորի գնահատմամբ՝ նոյեմբերի 9-ի եռակողմ հայտարարությունից հետո բանակացությունները պետք է վարեին Հայաստանը, Ռուսաստանը, Ադրբեջանը, սակայն ներկայումս բանակացային գործընթացը վերածվել է Ռուսաստան-Ադրբեջան երկխոսության։ «Իհարկե Հայաստանի իշխանությունները կարող էին պայքարել, եթե իրենք ներառված լինեին նորմալ բանակցային գործընթացում, բայց նորություն չի մեզ համար և ակնհայտ է, որ կապիտուլացված իշխանությունները դուրս են բոլոր տեսակի գործընթացներից, ամեն բան Ռուսաստանն ու Ադրբեջանն են որոշում»,-ընդգծեց Հակոբյանը։

Նրա համոզմամբ՝ Նիկոլ Փաշինյանը պարզապես ցանկանում է հասարակությանը ցույց տալ բանակցային գործընթացում այն ներդրումը, ինչը իրականում գոյություն չունի։ «Ամբողջ խնդիրը նաև նրանում է, որ Նիկոլ Փաշինյանը հասարակությանը ուզում է ցույց տալ, որ ինքը կա։ Երբ իրենք կանչում են Մոսկվա իրենց որոշումների մասին հայտնեն, դա վարչապետը ներկայացնում է իբր բանակցություն, և եթե մի փոքր բան իրեն դուր չի գալիս, վազում է Բրյուսել, Բրյուսելում դուր չի գալիս՝ Մոսկվա։ Այսպես ինքը դեգերումների մեջ է՝ պահելո ւ համար իր իշխանությունը, բայց ըստ էության ինքը այլևս ոչինչ է։ Ինչքան իր իշխանության կյանքը երկարում է, այնքան կարճանում է երկու հայկական պետությունների կյանքը»,-մանրամասնեց պատգամավորը։

Հակոբյանը բացառում է, որ կարող է լինել բանակցություն Ստեփանակերտ-Բաքու ֆորմատով. Ադրբեջանը կողմ չի լինի Ստեփանակերտին տեսնել բանակցային գործընթացում։ «Եթե այն ժամանակ, երբ մենք հաղթած պետություն էինք, Ադրբեջանը չի համաձայնել, որ Ստեփանակերտի ներկայացուցիչը լինի բանակցային գործընթացում, չեմ կարծում, որ հիմա նման տարբերակ հնարավոր է։ Ըստ էության, ես չեմ տեսնում Ստեփանակերտ-Բաքու երկխոսություն, ավելի շատ երևում է Մոսկվա-Բաքու երկխոսություն, ինչի արդյունքում ամեն դեպքում Ռուսաստանը ինչքան էլ որ ճիգեր է գործադրում, դեռևս իր վիճակից ելնելով հաջողությունները այդքան էլ մեծ չեն»,-նշեց պատգամավորը։

Հակոբյանի պնդմամբ՝ Արցախի իշխանությունը ծառայի կարգավիճակում է Հայաստանի իշխանության ձեռքին, ենթարկվում է ՀՀ իշխանությանը՝ կատարելով նրա պահանջները։ «Բացարձակ որևէ մեկը հաշվի չի նստում Արցախի իշխանությունների հետ։ Այստեղ խեղճ ու կրակ Արցախի իշխանություններ կան, որոնք ոչ մի կերպ չեն կարողանում և չեն էլ պատրաստվում հակասել Հայաստանի իշխանություններին, ամեն անգամ պատճառաբանելով, որ Նիկոլ Փաշինյանը փող չի տա Արցախին։ Մենք այս պահին ունենք ձևական, դրածո ինչ-որ մեկին, որը նստած է նախագահի աթոռին, ունենք դրածո կառավարություն, որը որևէ էական գործուն որոշումներ չի կարողանում կայացնել»,-եզրափակեց Մետաքսե Հակոբյանը։

Արփինե Նավասարդյան