Ծնվել և մեծացել եմ «3-րդ մաս»-ում, այդքանը բավարար է. բլից հարցազրույց դատավոր Արսեն Նիկողոսյանի հետ

ArmDaily.am-ը «Խորհրդակցական սենյակում» շարքի շրջանակներում շարունակում է բացահայտել դատավորներին: Այս անգամ մեր բլից հարցերին պատասխանել է Վերաքննիչ քրեական դատարանի դատավոր Արսեն Նիկողոսյանը։

Երեք բառով նկարագրեք ձեզ:

- Նպատակասլաց, պատասխանատու, ազնիվ։

Որո՞նք են ձեր դրական կողմերը:

- Հնարավորինս ազնիվ եմ և պարտաճանաչ։

Իսկ բացասական կողմե՞րը:

- Հավատում եմ շատ, վստահում` քիչ։

Ձեր թուլությունը:

- Չափից ավելի ուղղամտությունը։

Որպես գեղեցիկը գնահատող մարդ` ի՞նչ եք կարծում` գեղեցկությունը կփրկի աշխարհը:

- Աշխարհը կփրկի սերը, հոգատարությունը, բարությունը՝ մարդկանց և բնության նկատմամբ։ Իսկ ամենայն սեր գեղեցիկ է։

Ձեր կարգախոսը։

- Միշտ առաջ։

Ինչի՞ց եք վախենում:

- Չհացնելուց, չհասցնել տեսնել աշխարհն իր գեղեցկության մեջ, չհացնել սովորել հնարավորը։

Ի՞նչը կփոխեիք Ձեր մեջ:

- Կյանքի իմաստը զարգացման մեջ է, ուստի և ծնված օրվանից իմ պատկերացումների շրջանակներում իմ մեջ փոխել և փոխում եմ դեպի զարգացում այն ամենն, ինչը հնարավոր է։

Ու՞մ հանդեպ եք ձեզ մեղավոր զգում:

- Ծնողներիս, սիրելիներիս, հարազատներիս, այն բոլոր մարդկանց առաջ, ում կյանքը չեմ կարողանում դարձնել ավելի լավը։

Ի՞նչի համար եք զղջում:

- Ես կասեի՝ ավելի շատ ափսոսում։ Ափսոսում եմ բոլոր այն չսովորածի համար, որ այլևս դժվար թե հասցնեմ․ Օրինակ, կուզենայի դաշնամուր նվագել սովորել։

Ե՞րբ եք ստում:

- Կարող եմ չասել ճշմարտությունը կամ ամբողջ ճշմարտությունը՝ պայմանավորված բարոյական, իրավական պատճառաբանություններով։

Ի՞նչն է Ձեզ զայրացնում:

- Անպատասխանատու վարքագիծը։

Փողը, հարստությունը, պաշտոնները երբեւէ ձեր մեջ որեւէ բան փոխե՞լ են, ազդե՞լ են Ձեր վրա:

- Կարծում եմ՝ չեն փոխի, երբ դրանցից որևէ մեկն ունենամ))։

Հայաստանի պատմության մեջ սիրելի քաղաքական գործիչը ո՞վ է:

- Արտաշես I արքան։

 20-21-րդ դարի հայտնի մարդկանցից ո՞ւմ հետ կցանկանայիք հանդիպել:

- Վազգեն Վեհափառի։

Ձեր կյանքի ամենամեծ սխալը:

- Կյանքում յուրաքանչյուր սխալից փորձել եմ դասեր քաղել, և որքան մեծ է եղել սխալը, այնքան շատ բան եմ սովորել։

Ձեր վատագույն սովորությունը։

- Վատ սովորությունների դեմ պայքարի հարցում միայն մեկում եմ անհաջողության մատնվում՝ չափից ավելի քաղցրավենիք ուտելը սահմանափակելու))։

Չսիրելի եւ սիրելի զբաղմունքներ:

- Սովորաբար, չսիրած զբազմունքով չեմ զբաղվում, իսկ որպես սիրելի զբաղմունք՝ չափազանց շատ եմ սիրում զբոսնել, դիտել ֆիլմեր, ներկայացումներ, հետաքրքիր և խելացի մարդկանց հետ զրուցել։

Գուշակների երբեւէ այցելե՞լ եք:

- Ես հայ քրիստոնյա եմ, և դրանով ամեն ինչ ասված է։

Ի՞նչ վտանգներ եք կյանքում զգացել եւ հաղթահարել:

- Ամենաշատը կարևորում եմ այն, որ դրանք արդեն հաղթահարված են։

Մանկական եւ ոչ մանկական չարաճճիություններ:

- Ունեցել եմ բուռն և հետաքրքիր մանկություն։ Ծնվել և մեծացել եմ «3-րդ մաս»-ում։ Կարծում եմ՝ այդքանը բավարար է։

Ո՞վ է ձեզ կյանքում հիասթափեցրել:

- Ես աշխատում եմ մարդկանցից պահանջել այն, ինչը նրանք պատրաստ են տալ, ուստի և չհիասթափվել։

Հուսահատության պահերը ո՞նց եք հաղթահարում:

- Երևույթներին վերաբերվելով փիլիսոփայորեն՝ «Սա էլ կանցնի»։

Ինչ-որ սկզբունքներ, որոնց ստիպված եք եղել դավաճանել։

- Միշտ չէ, որ հաջողվել է լինել համբերատար այնքան, որքան որ կցանկանայի լինել, միշտ չէ, որ չեմ զայրացել այն բոլոր դեպքերում, երբ կարելի էր չզայրանալ։

Պատրաստում ենք երջանկություն: Ձեր բաղադրատոմսը:

- Առողջ ընտանիք, խաղաղ երկիր։

Ամենաուրախ եւ ամենատխուր օրը։

- Ամենաուրախ՝ զավակի ծնունդ, իսկ ամենատխուրը չէի ցանկանա մտաբերել։

Ի՞նչ կցանկանայիք նվեր ստանալ:

- Ամենալավ նվերը երեխայիս ժպիտն է։

 Ձեր խենթություններից:

- Հրապարակման ենթակա չեն։

Ու՞մ կցանկանայնիք նմանվել։

- Աշխատասիրությամբ և անձնազոհությամբ՝ հորս, բարությամբ և կամեցողությամբ՝ մորս։

Աշխարհի ամենալավ մարդը ո՞վ է:

- Մայրս

Կենդանիներ սիրո՞ւմ եք եւ ի՞նչ կենդանու եք ձեզ նմանեցնում:

- Կենդանիներ շատ եմ սիրում, բնության ստեղծած ամեն ինչ կատարյալ է, ուստի ինձ չէի նմանեցնի որևէ կենդանու։

Ի՞նչ է ընտանիքը ձեզ համար:

- Ամեն ինչ

Ինչ են խոսում ձեր ուսանողները Ձեր մասին։

- Հուսով եմ՝ մեծ մասամբ դրական են արտահայտվում

Ձեր ընտրյալը:

- Իմ ընտրյալն իմ երջանկության աղբյուրն է։

Ի՞նչ հոգսեր ունեք:

- Բոլոր նորմալ մարդկանց հոգսերից։

Ո՞ր մոլախաղում եք անպարտելի:

- Մոլախաղերով սովորաբար չեմ տարվում։

Զանգ ԲԴԽ-ից...։

- Իսկ ինչի՞ն է վերաբերում զանգը։

Խորհրդակցական սենյակում։

-Խորհրդակցական սենյակը միայն պատերը չեն. դա գաղափար է, որի իմաստն այն է, որ դատավորը որոշումները պետք է կայացնի ինքնուրույն, իսկ կոլեգիալ քննվող գործերի դեպքում՝ քննարկումների, բանավեճերի արդյունքում:

Հարց շարքի հաջորդ մասնակցին։

-Ի՞նչ անել երթեւեկության մշակույթը բարձրացնելու ուղղությամբ։

Երեւանի ընդհանուր իրավասության դատարանի դատավոր Դավիթ Հարությունյանը Ձեզ հարցնում է՝ Ձեզ երբևէ չտրված հարցը, որին կցանկանայիք պատասխանել:

-Կարծես թե հնարավոր բոլոր հարցերն ինձ արդեն տրվել են։

«Խորհրդակցական սենյակում»  շարքին մասնակցել են

Ալեքսանդր Ազարյանը 

Գագիկ Հովհաննիսյանը ,

Քրիստինե Մկոյանը

 Գեւորգ Նարինյանը ,

Անի Հարությունյանը,

Սուրեն Մնոյանը

Ռաֆիկ Խանդանյանը
Ստեփան Միքայելյանը

Դավիթ Հարությունյանը

Շարքը՝ Ինգա Մարտինյանի