Նիկոլ Փաշինյանին տվել են աթոռ՝ հայկական պետականությունը վաճառելու համար. ադրբեջանագետ 

«Ալիևը լավ հասկանում է, որ այսօրվա կապիտուլյացված իշխանությունը Հայաստանում չունի որևէ քաղաքական և ոչ քաղաքական գիտելիք, ոչ հենք, հետևաբար այդ թուլությունից օգտվելով, անընդհատ երեսով է տալիս Հայաստանի «վարքը», օրինակ, Ռուսատանին, Իրանին և ուրիշ գործընկերների, որոնք կարող են Հայաստանին եթե ոչ ռազմական, ապա գոնե քաղաքական հարթակում աջակցություն ցույց տալ»,- ArmDaily-ի հետ զրույցում նման տեսակետ հայտնեց ադրբեջանագետ Գառնիկ Դավթյանը՝ անդրադառնալով երեկ Բերձորում Ալիևի հայտարարություններին։

Ադրբեջանի նախագահը, հիշեցնենք, Հայաստանին զգուշացրել է սադրանքների չդիմել, այլապես «արժանի պատասխան կտան»։ «Այսօր Հայաստանը պետք է լավ մտածի: Ոչ ոք մեզ հետ վերջնագրերով չի կարող խոսել և թող ոչ ոքի վրա հույս չդնեն: Ես մեկ անգամ ևս ուզում եմ ասել, մեզ ոչ ոք և ոչինչ չի կարող կանգնեցնել: Եթե Հայաստանը ուզում է մեզ մեղադրել, թե մենք իրենց տարածք ենք մտել, դա ոչ մի հիմնավորում չունի: Նախ և առաջ, եթե սահմանները լինեին այնտեղ, որտեղ իրենք են ասում, ապա սահմանային ինժեներական աշխատանքներ կտարվեին: Նրանք կարծում էին, թե ողջ Ղարաբաղն ու Զանգեզուրը իրենց է մնալու: Այդ պատճառով էլ ոչ մի բան չեն արել հայ-ադրբեջանական սահմանին», - ասել է Ադրբեջանի նախագահը:

Գառնիկ Դավթյանի գնահատմամբ՝ Ալիևի հայտարարությունների համատեքստում կա ռազմական սպառնալիք, որը սարերի հետևում չէ։ «Այդ սպառնալիքներից պետք է հասկանալ, որ Ադրբեջանը չի հրաժարվել իր ռազմական հռետորաբանությունից, իր նպատակներից, Սյունիքը օկուպացնելու ցանկությունից»,-ընդգծեց Դավթյանը։

Նա պատահական չի համարում, որ Ալիևն ամեն անգամ Արցախում նոր բնակավայր այցելելիս խոսում է Հայաստանին ճնշելու մասին, որովհետև ունի նաև ներքին խնդիրներ լուծելու անհրաժեշտություն։ «Ամեն անգամ նոր  «ազատագրված» տարածք այցելելուց հետո Ալիևը քաղաքական նոր զեղումներ է ունենում, և իր հայատյաց կերպարը նորովի է ցույց տալիս։ Ինքն  այնտեղ չի գնում միայն իր նպատակների մասին խոսելու, այլ նաև ներքին խնդիրներ լուծելու համար, նշելու, որ իրենք չեն հրաժարվել Հայաստանին ճնշելու, վերացնելու կամ առհասարակ ոչնչացնելու մտքից ու այս հայտարարությունները դրա մասին են խոսում»,-ասաց Դավթյանը։

Անդրադառնալով Արարատ Միրզոյանի  նյույորքյան հանդիպումներին՝  ադրբեջանագետը կարծիք հայտնեց, որ այդ հանդիպումները որևէ լուծում չեն ենթադրում, և որ ԱԳՆ-ն վաղուց չի գործում։ «Այսպես ասեմ ՝ մեր ԱԳՆ-ն վաղուց չի գործում, ամբողջ պրոցեսը կառավարվում է Նիկոլ Փաշինյանի ձեռքով, Փաշինյանի ձեռքին է ամբողջ պրոցեսը, այդտեղ Արարատ Միրզոյան չէ ուզում է Պողոս Պողոսյանը լինի ՝ իրենք ուղղակի դրածո են և իրենց այդ հանդիպումները չեմ կարծում,թե որևէ լուրջ խնդիր են կարգավորում։ Եթե կապիտուլյանտը որոշում է խաղաղության պայմանագիր ստորագրի,Միրզոյանն ինչ պիտի այնտեղ անի,այսինքն՝ ինքը զուտ քաղաքական դրածո է, որը ենթարկվում է ու կատարելու է այն, ինչ Նիկոլի կողմից է ասվում»,- նշեց Դավթյանը։

Նա չի բացառում, որ Փաշինյանը հենց Նյու Յորքում կարող է ստորագրել, այսպես կոչված, «խաղաղության պայմանագիրը»։ «Այն որ կապիտուլյացիա ստորագրած մարդու «ուշքն ու միտքը» Ադրբեջանին հայկական հողերը հանձնելն է, իրենց տեսակով իրենք դավաճանի կերպար են ձեռք բերել, ես չեմ բացառում, որ նման պրոցես կարող է լինել։ Ընդանրապես խոսել ,որ Նիկոլ Փաշինյանը սպասարկում է հայկական օրակարգը՝ անմտություն է։ Իրեն տվել են աթոռ այն բանի համար, որ ինքը հայկական պետականությունը վաճառի, հիմա ինքն այդ պրոցեսը անելու է բոլոր հնարավոր ձևերով, թե դա կլինի Նյու Յորքում, թե այլ տեղ չեմ կարող ասել»,-ամփոփեց Գառնիկ Դավթյանը։

Արփինե Նավասարդյան