Family portrait. Արարատ Միրզոյանը դեռ գրավում է կնոջ սիրտը
Արխիվ
Armdaily.am-ը շարունակում է իր «Family portrait» շարքը, որտեղ ներկայացնում ենք հայտնի պետական ու քաղաքական գործիչների ընտանիքների կենսագրությունը, ընտանեկան լուսանկարներ և այլ փաստեր:
Այս շաբաթ մեր հերոսը «Իմ քայլը» դաշինքի անդամ, ԱԺ նախագահ Արարատ Միրզոյանն է:
Արարատ Միրզոյանը ծնվել է 1979 թվականի նոյեմբերի 23-ին Երևան քաղաքում: Սովորել և ավարտել է ԵՊՀ պատմության ֆակուլտետը, պատմական գիտությունների թեկնածու է:
2004թ.-ից քաղաքացիական շարժումների մասնակից է: Արարատ Միրզոյանը «Քաղաքացիական պայմանագիր» կուսակցության հիմնադիր անդամ է: 2016 թվականից հանդիսանում է «Քաղաքացիական պայմանագիր» կուսակցության վարչության անդամ: 6-րդ գումարման ԱԺ-ում եղել է «Ելք» խմբակցության պատգամավոր: Թավշյա հեղափոխությունից հետո դարձել է առաջին փոխվարչապետ, այժմ 7-րդ գումարման ԱԺ նախագահն է:
Արարատ Միրզոյանը ամուսնացած է Գոհար Աբաջյանի հետ, ունեն մեկ դուստր՝ Արփին, և մեկ որդի՝ Սամվելը:
Կնոջ հետ Արարատ Միրզոյանը ծանոթացել է 2004 թվականին, երբ սկսվեց Հանուն գիտության զարգացման ուսանողնեի և գիտնականների շարժումը:
«Ես այդ շարժման նախաձեռնողներից և հիմնական համակարգողներից էի: Այդ ժամանակ ասպիրանտ էի, մեզ միացել էին նաև ուսանողները: Գոհարն էլ այդտեղ էր, նա համակարգող խմբի մի քանի այլ անդամների համակուրսեցին էր: Այդ ընթացքում ծանոթացանք, հետո դարձանք ընկերներ, այդ թվում՝ Գոհարի հետ, բայց նա ինձ համար հենց սկզբից էլ պարզապես ընկեր չէր: Գոհարի սիրտը գրավելն իրականում շատ դժվար գործ էր և ես դեռ գրավում եմ նրա սիրտը: Կարծում եմ՝ զգացմունքն այնպես չէ, որ մի անգամ գալիս և այդպես մնում է, այդ զգացմունքն անընդհատ պետք է սնվի երկկողմանի»,- ասել է ԱԺ նախագահը հարցազրույցներից մեկի ժամանակ:
Գոհար Աբաջյանը ծնվել է 1982 թվականի օգոստոսի 19-ին Երևանում: Սովորել է Երևանի պետական համալսարանում:
ԱԺ նախագահի կինը սոցիալական կայքերի ակտիվ օգտատեր է: Նրա հրապարակումները մի շարք ԶԼՄ-ների լրահոսի լուրեր են դառնում:
Հարցազրույցներից մեկի ժամանակ բնութագրելով Արարատ Միրզոյանին՝ Գոհար Աբաջյանն ասել էր, որ ամուսինը սկզբունքային, չափազանց անկեղծ և պարզապես լավ մարդ է:
«Երեխաները միշտ սպասում են, թե երբ է հայրիկը տուն գալու, նա երեխաների հետ շատ է խաղում: Աղջիկս սիրում է նաև դասերը պատրաստել Արարատի հետ, քանի որ նրանք նման են նաև բնավորությամբ ու մտածողության ձևով: Յուրաքանչյուր հարցը մինչև մանրամասնորեն չեն քննարկում, այդ դասը չեն ավարտում»,- պատմել է Գոհար Աբաջյանը:
Շարքը՝ Արփինե Պետրոսյանի:
Շարքի նախորդ հերոսները
Նիկոլ Փաշինյանի ընտանիքը. Մաս առաջին, մաս երկրորդ
