Ստեղծագործ և շքեղ Միլանը. զբոսանք նորաձևության մայրաքաղաքով (ֆոտոշարք)

Իտալիա... այստեղ ամեն քար, ամեն փողոց, օդը ինքնին ներծծված է ստեղծագործական հմայքով: Իտալիայի երկնքի տակ ստեղծագործել են Միքելանջելոն և Լեոնարդո դա Վինչին, Ռաֆայելը և Տիցիանը, Դանթեն և Բոկաչոն։ Այս շարքը կարելի է անվերջ շարունակել։ Մի խոսքով՝ Իտալիան թանգարան է բաց երկնքի տակ։ 

Իտալիայի պատմական ու մշակութային գեղեցկությունը մի փոքր հասկանալու համար անհրաժեշտ է կյանքում մեկ անգամ գոնե այցելել Միլան։ ArmDaily.am-ի թղթակիցը օրեր առաջ այնտեղ էր, և այն, ինչ կատարվում է նորաձևության մայրաքաղաքում, բառերով փոխանցել հնարավոր չէ։

Միլանը Իտալիայի հյուսիսային մասի գլխավոր քաղաքն է, Իտալիայի ամենախոշոր շրջանի՝ Լոմբարդիայի վարչական կենտրոնը: Միլանը հայտնի է ամբողջ աշխարհում իր ֆուտբոլային ակումբով, գլխավոր հրապարակում գտնվող վեհաշուք տաճարով եւ օպերային թատրոնով, որտեղ հավաքում են արիստոկրատիայի բոլոր շրջանակները: Այս քաղաքն է, որ ամեն տարի գարնանը եւ աշնանը բացում է նորաձեւության շաբաթվա համաշխարհային հայտնի ապրանքանիշերի ցուցադրությունները:

Միլանն, անկասկած, կարեւոր քաղաք է պետության համար, քանի որ այն համարվում է ֆինանսական մայրաքաղաք, ինչպես նաև այն անվանում են համաշխարհային նորաձեւության մայրաքաղաք:

Քաղաքի հիմնական տեսարժան վայրերը գտնվում են կենտրոնական մասում։ Դա քաղաքի պատմական տարածքն է, որը կոչվում է Area C։

Քաղաքի գլխավոր տեսարժան վայրն ու այցեքարտը համարվում է Դուոմոյի մայր տաճարը, որը գտնվում է կենտրոնական հրապարակում: Դա զարմանահրաշ մի շինություն է, որը կառուցված է գոթական ոճով։ Նրա ամբողջական անունը Սանտա Մարիա Նաշենտեի տաճար է: Միլանի Դուոմոն աշխարհի խոշորագույն տաճարներից մեկն է համարվում։ Տաճարի լավագույն տեսարանը, ինչպես պարզվեց, Նովեչենտոյի թանգարանից է երևում, որը գտնվում է Դուոմոյի աջ կողմում: Չնայած տեսարանը բացվում է պատուհանից, բայց տաճարի ամեն մանրուք, բառացիորեն, ափիդ մեջ կարծես լինի։

Այնտեղ, Դուոմոյի ձախ կողմում, գտնվում է Վիկտոր Էմանուել II պատկերասրահը: Դա հին պասաժ է, որը կառուցվել է Եվրոպայում առաջինների շարքում։ Այստեղ դուք կարող եք այցելել աշխարհահռչակ բրենդերի նորաձեւության տներ, ինչպես նաեւ ռեստորաններ եւ սրճարաններ։

Պասաժով անցնելուց հետո դուք հասնում եք Լա Սկալայի տարածք։ Այստեղ է գտնվում աշխարհի ամենահայտնի թատրոնը։ Արտաքուստ ոչնչով աչքի չընկնող շենքը ապշեցնում է ինտերիերի շքեղությամբ ու արիստոկրատիզմով։ Լա Սկալայի օպերային թատրոնն այցելում են ոչ միայն Միլանի, այլեւ ամբողջ աշխարհի վերնախավերի ներկայացուցիչները։

Հին ամրոցների սիրահարների համար հետաքրքիր կլինի այցելությունը միջնադարյան տոհմի տիրակալների նստավայր: Դա Սֆորցայի ամրոցն է, կամ Կաստելո-Սֆորցեսկոն, որը կառուցվել է XV դարում։

Սֆորցայի մոտ գտնվում է գեղատեսիլ Սեմպիոնե այգին։ Այն գտնվում է Միլանի եւս մեկ հայտնի տեսարժան վայրի' Խաղաղության կամարի հարևանությամբ։ Սա ճարտարապետական հուշարձան է, որը տեղադրված է Նապոլեոն Բոնապարտի հրամանով, XIX դարի սկզբին:

Քաղաքում են գտնվում աշխարհահռչակ Dolce & Gabbana, Prada, Giorgio Armani, Versace, Louis Vuitton, Gucci և այլ բրենդների շտաբ-գրասենյակները։

Ամենից շատ բուտիկներ դուք կգտնեք Միլանի կենտրոնական փողոցներից մեկում' հայտնի Վիա Մոնտենապոլեոնում: Փողոցի երկարությունը ընդամենը 500 մետր է, եւ այն գտնվում է քաղաքի պատմական մասում: Փողոցը հանդիսանում է բարձր նորաձևության շրջանի՝ «Ոսկե քառանկյունի» բաղկացուցիչներից մեկը։ Դա մի ամբողջ թաղամաս է, որը հավաքել է Իտալիայի ամենահայտնի նորաձեւության տները: Խանութներն այստեղ աշխատում են առավոտից երեկո՝ առանց հանգստյան օրերի և սիեստայի։ Այստեղից դժվար է հեռանալ լիքը դրամապանակով։

Սա է դասական Միլանը՝ ճռճռան նարնջագույն տրամվայ, ճարտարապետությունների միախառնում, անհամար զբոսաշրջիկներ ու իհարկե նորաձևության տներ։