Ի՞նչ ունեցվածք ունի Գագիկ Ջհանգիրյանը

ArmDaily.am-ը «Հայտարարագիր» շարքում այս անգամ կներկայացնի  Բարձրագույն դատական խորհրդի նախագահի պաշտոնակատար Գագիկ Ջհանգիրյանի ունեցվածքը։

Ով է Գագիկ Ջհանգիրյանը

Ծնվել է 1955 թվականին, Արարատ քաղաքում։

Կրթություն

1977 թվականին ավարտել է Երևանի պետական համալսարանի Իրավաբանական ֆակուլտետը։

1979-1982 թվականներին սովորել է Մոսկվայի Համամիութենական դատախազության ինստիտուտում։

1982 թվականին պաշտպանել է գիտական թեզը «Ժամանցի ոլորտի հանցավորության դեմ պայքարի քրեաբանական պրոբլեմները» թեմայով և ստացել իրավաբանական գիտությունների թեկնածուի գիտական աստիճան։

Աշխատանքային փորձ

1970-1973 թվականներին «Բարձրշինտրեստ» 6-րդ շինմոնտաժային վարչությունում աշխատել է որպես գիշերապահ:

1977-1990 թվականներին եղել է ՀԽՍՀ ԳԱ Փիլիսոփայության և իրավունքի ինստիտուտի իրավունքի բաժնում  կրտսեր գիտաշխատող, գիտաշխատող, ապա ավագ գիտաշխատող:

1989 թվականից դասավանդել է Երևանի պետական  համալսարանի Իրավաբանական ֆակուլտետում:

1990-1995 թվականներին եղել է ՀՀ Արդարադատության նախարարության դատական մարմինների վարչության պետ:

1995-1997 թվականներին աշխատել է որպես ՀՀ Արդարադատության նախարարի առաջին տեղակալ:

1997-2006 թվականներին եղել է ՀՀ Զինվորական դատախազ:

2006-2008 թվականներին զբաղեցրել է ՀՀ Գլխավոր դատախազի տեղակալի պաշտոնը։

2012-2017 թվականներին եղել է Ազգային ժողովի պատգամավոր:

2021 թվականի հունվարի 22-ին Հայաստանի Հանրապետության Ազգային ժողովի կողմից ընտրվել է Բարձրագույն դատական խորհրդի անդամ:

2021 թվականի ապրիլի 15-ից կատարում է Բարձրագույն դատական խորհրդի նախագահի պաշտոնակատարի պարտականությունները:

Այլ տեղեկություններ

1994-1995 թվականներին իր մասնակցությունն է բերել ՀՀ առաջին Սահմանադրության մշակման աշխատանքներին՝ զգալի ներդրում ունենալով հատկապես դատական իշխանության, իրավապահ մարմինների բաժինների, Մարդու իրավունքների քրեական արդարադատությանն առնչվող հարցերի և նորմերի մշակման գործին:

1997-2008 թվականներին պարգևատրվել է ՀՀ վարչապետի հուշամեդալով, անվանական զենքով, գերատեսչական բազմաթիվ մեդալներով:

1998 թվականին Հայաստանի Հանրապետության նախագահի հրամանագրով շնորհվել է Արդարադատության 1-ին դասի պետական խորհրդականի դասային աստիճան:

Հեղինակ է ԽՍՀՄ-ում, Հայաստանում և արտերկրում լույս տեսած ավելի քան 2 տասնյակ գիտական հրապարակումների։

Անկուսակցական է:

Ամուսնացած է, ունի երեք զավակ։

Ունեցվածքը

Գագիկ Ջհանգիրյանը հայտարարագիրը ներկայացրել է 2022-ի մայիսի 17-ին։

Նրա դրամական միջոցները 2021 թվականի սկզբին կազմել են 1,500 ՀՀ դրամ, որը տարվա վերջում դարձել է 278,000 ՀՀ դրամ։ Նա հայտարարագրել է 500,000 ՀՀ դրամ կանխիկ գումար, որը տարվա վերջում դարձել է 2,000,000 ՀՀ դրամ։ Աշխատանքի դիմաց նա ստացել է 9,861,646 ՀՀ դրամ վարձատրություն Հայաստանի Հանրապետությունից։

Որևէ այլ բան Գագիկ Ջհանգիրյանի հայտարարագրում ներառված չէ։