Վանեցյանը փորձում է իրագործել երրորդ ուժի ֆենոմենը. քաղաքագետ

Դեռ այն ժամանակից, երբ Վանեցյանն առաջին օրը գնաց «Ազատության» հրապարակ, խոսում էր այն մասին, որ ԱԺ-ում անելիք այլևս չկա, ArmDaily.am-ի հետ  զրուցում ասաց քաղաքագետ Արա Պողոսյանը։ Նրա գնահատմամբ՝  մանդատը վայր դնելու որոշումն, այդ առումով, տրամաբանական էր։ «Քաղաքացիներն այնքան շատ էին լսել նմանատիպ հայտարարություններ, որ շատերը չէին հավատում, թե որևէ քաղաքական գործիչ կգնա նման արմատական քայլի։ Այս դեպքում սա իսկապես արմատական քայլ էր, հատկապես այն իմաստով, որ ոչ միայն մանդատն է ցած դրել, այլ նաև «Հայրենիք» կուսակցությունը դադարում է ՀՀԿ-ի հետ համագործակցել և դուրս է գալիս «Պատիվ ունեմ» դաշինքից»,-նշեց քաղաքագետը։

Արա Պողոսյանը քաղաքական այս շղթայի մի հատված էլ համարեց  Գագիկ Ջհանգիրյանի մասնակցությամբ Վարդազարյանի հրապարակած  սկանդալային ձայնագրությունը, որում շոշափվում էին Արթուր Ղազինյանի և Արթուր Վանեցյանի անունները։ «Օրեր առաջ հրապարակված ձայնագրությունը, որտեղ Գագիկ Ջհանգիրյանը խոսում էր Արթուր Ղազինյանի և Արթուր Վանեցյանի կողքին կանգնելու, աջակցելու մասին, ըստ իս, համատեքստային առումով դիտարկելու պարագայում՝ հնարավոր է, որ դա ևս խթան է հանդիսացել տեղի ունեցածի համար։ Այս ամենը կարող է ընկալվել որպես քաղաքական կապիտալ, սակայն վերջանական ու խորքային գնահատական տալու համար անհրաժեշտ են խորքային, լայն վերլուծություններ։ Ամեն դեպքում, ես ինքս հակված չեմ այս ամենը քաղաքական կապիտալ որակելուն»,- ընդգծեց մեր զրուցակիցը։

Հարցադրմանը արդյոք Արթուր Վանեցյանն իր քայլով որոշակիորեն չթուլացրե՞ց խորհրդարանական ընդդիմությանը՝ քաղաքագետը պատասխանեց. «Այստեղ խոսքը գնում էր միայն «Պատիվ ունեմ» դաշինքի միայն մեկ մասնակցի դուրս գալու մասին, իսկ հանրապետականները դեռևս պահպանելու են իրենց մանտադները, և այն մանդատը, որը կազատվի, կվերցնի մեկ այլ պատգամավոր՝ պահպանելով համամասնությունը։ Ինչ վերաբերվում է կոնկրետ Վանեցյանի անձին, ու խորհրդարանական ընդդիմության շարքում նրա գործունեությանն ու դրա արդյունավետությանը, պետք է նշել, որ արդյունքների տեսանկյունից շատ լուրջ արդյունավետության չի ունեցել, իսկ, եթե վերցնենք ընդհանուր  տեսանկյունից, ապա Վանեցյանի ազդեցությունն այնտեղ այնքան քիչ էր, որ բացակայությունը այդքան էլ նկատելի չի լինի։ Իշխող մեծամասնությունն այս պահին ընդդիմության հետ բանակցելու, ինչ-ինչ կոնսենսուսներ ձեռք բերելու ցանկություն չունի, ուստի ընդդիմությունը գործնականում միայն խոսելու է առանց արդյունքների։ Այս պարագայում Վանեցյանի այնտեղ լինել- չլինելը այդքան էլ էական չէ»։

Խոսելով Արթուր Վանեցյանի և «Դիմադրություն» շարժման նպատակի համընկման, սակայն դրան հասնելու տարբեր ուղղությունների մասին՝ Պողոսյանը նշեց, որ վերջերս շատ է խոսվում երրորդ ուժի ֆենոմենի մասին, ու ըստ նրա, Վանեցյանը փորձելու է հենց այդ երրորդ ուժի կարգավիճակով հանդես գալ։ «Վերջին շրջանում շատ է բարձրաձայնվում երրորդ ուժի ֆենոմենի մասին, ըստ որում, տարբեր կողմերից են դրա մասին խոսում, ուստիմ իմ խորին համոզմամբ, Արթուր Վանեցյանը փորձում է այդ երրորդ ուժի ֆենոմենն իրագործել իր ուժի միջոցով։ Չեմ կարող ասել՝ դա ինչքանով կհաջողի, ինչքանով՝ ոչ, բայց այն, որ փորձ է արվում տարանջատվել այն մարդկանցից, որոնք ոչ միանշանակ ընկալում ունեն հասարակության մոտ, դա գոնե փաստ է։ Իր վերջին հարցազրույցի համատեքստում հենց դա էր ընկած։ Ինչ վերաբերում է արդյունքներին, ապա դա անմիջականորեն կախված է լինելու նրանց  մշակած ռազմավարական ու մարտավարական քայլերից, քաղաքական բովանդակությունից, որը նրանք կառաջարկեն քաղաքացիներին։ Ի դեպ, չպետք է մոռանանք, որ նրանք միասին, թե առանձին, շուրջ երկու ամիս չկարողացան առաջարկել այն բովանդակությունը, որի համար հասարակությունը կպայքարեր»,- ամփոփեց քաղաքագետը։

Մելինե Պետրոսյան