Ի՞նչ ունեցվածք ունի փոխվարչապետ Մհեր Գրիգորյանը

ArmDaily.am-ը «Հայտարարագիր» շարքում այս անգամ կներկայացնի ՀՀ փոխվարչապետ Մհեր Գրիգորյանի ունեցվածքը։

Ո՞վ է Մհեր Գրիգորյանը

Տարեթիվ, ամսաթիվ, ծննդավայր
1972թ., 15 փետրվարի, ք.Աշտարակ

Կրթություն
1989-1991թթ. սովորել է Լոմոնոսովի անվան Մոսկվայի պետական համալսարանի իրավաբանական ֆակուլտետում,
1991-1994թթ. սովորել է և ավարտել Երևանի պետական համալսարանի իրավաբանական ֆակուլտետը` ստանալով իրավագետի որակավորում,
1997-1998թթ. անցել է Մեծ Բրիտանիայի Լիդսի համալսարանի բիզնես դպրոցի 6-ամսյա որակավորման դասընթաց:

Աշխատանքային գործունեություն
1994-1996թթ. Ռուսաստանի Դաշնությունում զբաղվել է անհատ ձեռնարկատիրությամբ
1996 թվականին մասնագիտական գործունեությունը սկսել է Կենտրոնական բանկում, որտեղ 1997 թվականից մինչև 1999 թվականը զբաղեցրել է Իրավաբանական վարչության ղեկավարի պաշտոնը
1999–2005թթ. աշխատել է Հայներարտբանկում (ներկայիս Ամերիաբանկ) իրավաբանական ծառայության ղեկավարի, գործառնական տնօրենի պաշտոններում
2002-2006թթ. Համաշխարհային բանկին մատուցել է իրավաբանական-խորհրդատվական ծառայություններ
2004-2005թթ. համատեղության կարգով աշխատել է «HSBC բանկ Հայաստան»-ում՝ իրավաբանական ծառայության ղեկավարի պաշտոնում
2005-2007թթ. զբաղեցրել է «Ինեկոբանկ»-ի գործադիր տնօրենի պաշտոնը
2007-2011թթ. աշխատել է ՎՏԲ-Հայաստան բանկում՝ գործադիր տնօրենի տեղակալի պաշտոնում
2006-2018թթ. զբաղեցրել է «Աքռա Քրեդիտ Ռեփորթինգ»-ի խորհրդի անդամի պաշտոնը
2011-2018թթ. զբաղեցրել է Արդշինբանկի վարչության նախագահի պաշտոնը
2012-2018թթ. զբաղեցրել է «Արմենիա Ինշուրանս» ապահովագրական ընկերության խորհրդի նախագահի պաշտոնը
2018թ․ մայիսի 12-ին Հանրապետության նախագահի հրամանագրով նշանակվել է փոխվարչապետ
2018թ. հոկտեմբերի 16-ից մինչև 2019թ. հունվարի 16-ը իրականացրել է փոխվարչապետի պաշտոնակատարի պարտականությունները
2019թ. հունվարի 16-ին Հանրապետության նախագահի հրամանագրով նշանակվել է փոխվարչապետ
2021թ. օգոստոսի 3-ին Հանրապետության նախագահի հրամանագրով նշանակվել է փոխվարչապետ

Պարգևներ
2016թ.  ԼՂՀ նախագահի հրամանագրով տնտեսության զարգացման գործում ներդրած ավանդի համար պարգևատրվել է «Անանիա Շիրակացի» մեդալով:
2017թ. Հանրապետության նախագահի հրամանագրով Հայաստանի Հանրապետության Անկախության տոնի առթիվ, տնտեսության զարգացման գործում ներդրած ավանդի համար պարգևատրվել է Անանիա Շիրակացու մեդալով:

Այլ տվյալներ
Պահեստազորի սպա է:

Կուսակցական պատկանելություն
Անկուսակցական

Անձնական տվյալներ
Ամուսնացած է, ունի որդի և դուստր

Ունեցվածքը

Մհեր Գրիգորյանը ունեցվածքի մասին վերջին հայտարարագիրը ներկայացրել է 2021 թվականի մայիսի 27-ին։

Փոխվարչապետը հայտարարագրել է Երևանի կենտրոնում 1 բնակարան, որը ձեռք է բերել 2011 թվականին, 2 ավտոտնակ՝ 2011-ին և 2009-ին ձեռք բերված, և 1 հողամաս Արագածոտնի Մուղնի գյուղում, որը ձեռք է բերել 2012 թվականին։

Նա 2017 թվականին «Արինս գրուպ» ՍՊԸ, «ՌԵԳԻՈՆ» ֆինանսական արդյունաբերական կորպորացիա ՓԲԸ-ից գնել է արժեթղթեր՝  502,300,000 ՀՀ դրամ արժողությամբ։ Տարվա սկզբին նրա դրամական միջոցները կազմել են 3,135,844 ՀՀ դրամ, իսկ ահա տարվա վերջում դրանք դարձել են 4,572,075 ՀՀ դրամ։ Որպես կանխիկ գումար՝ Գրիգորյանը հայտարարագրել է 70,000,000 ՀՀ դրամ, իսկ աշխատանքի դիմաց վարձատրություն վարչապետի աշխատակազմից՝ 23,600,909 ՀՀ դրամ։

Փոխվարչապետը «Արդշինբանկ» ՓԲԸ-ում ունի 1.000056% բաժնեմաս։