Շուշիի գորգերի թանգարանի հարցը՝ օդում կախված. Պատմության թանգարանը խոչընդոտներ է ստեղծում, իսկ ԿԳՄՍՆ-ում զբաղված են

Ինչպես հայտնի է, 44-օրյա պատերազմի ժամանակ Շուշիի գորգերի թանգարանից տարհանված եւ Հայաստան տեղափոխված գորգերը պետք է ցուցադրվեն Հայաստանի պատմության թանգարանում և հունիսից արդեն ներկայացվեն հանրությանը։

Սակայն ArmDaily.am-ին հայտնի է դարձել, որ այս հարցում խնդիրներ են առաջացել և Պատմության թանգարանը, կարծես, չի համաձայնում երկար ժամանակով և Շուշիի գորգերի թանգարանի առաջարկներով կազմակերպել ցուցադրությունը։

Շուշիի գորգերի թանգարանի տնօրեն Վարդան Ասծատրյանը ArmDaily.am-ին պատմեց, որ նույնիսկ վերանորոգումը չի սկսել, ինչից հետո արդեն թանգարանը պետք է տեղակայվեր այնտեղ։

Վարդան Ասծատրյանի խոսքով՝ սակայն,Պատմության թանգարանը և ԿԳՄՍ նախարարությունը միմյանց հակասող հայտարարություններ են անում։

«Նախարարությունը մի բան է ասում, իրենք՝ մի ուրիշ։ Թանգարանից ասում են ցուցադրությունը 6 ամսով ենք կազմակերպում, նախարարությունն էլ սկզբում ասել էր, որ 3 տարի պետք է Շուշիի գորգերի թանգարանը ներկայացված լինի Պատմության թանգարանում։ Որ ասում են՝ մի ձեռքը չգիտի, թե մյուս ձեռքը ինչ է անում»,- ասաց Ասծատրյանը։

Ի սկզբանե Ասծատրյանը Շուշիի գորգերի թանգարանը  ցանկացել է տեղակայել Հայաստանի արտաքին գործերի նախարարության նախկին՝ Կառավարության N2, շենքում, սակայն այդ շենքը 2012 թ.–ին 51,27 մլն դոլարով վաճառվել է շինարարական «Տանգո» ընկերությանը, որի սեփականատերն է հայկական ծագմամբ արգետինացի միլիարդեր Էդուարդո Էռնեկյանը։ Դեռևս 2018-ին Հայաստանում Արգենտինայի դեսպան Գոնզալո Ուրրիոլաբեիտիան հայտարարել էր, որ այդ շենքը կվերափոխվի բիզնես կենտրոնի։

«Ճիշտ էլ չի մեր թանգարանը մեկ այլ թանգարանում ներկայացնելը, իրենք իրենց հավաքածուները ունեն։ Ամենասկզբից առաջարկվել է ԱԳՆ հին շենքը։ Ես շատ ոգևորվեցի, որովհետև առանձին տեղ էր և ոչ ոքից կախված չէինք լինի, նույնիսկ մենք կկարողանայինք մեր ֆինանսավորման հարցը լուծել։ Այսինքն՝ թանգարանը կարող է ինքնաբավ կազմակերպություն լինել։ Բայց չգիտեմ՝ ով խոչընդոտեց, ինչ պատճառներով։ Պատճառաբանում են, որ Էռնեկյանի շենքն է, բայց ախր Էռնեկյանը չի կարող նման հարցի համար ինչ-որ խնդիրներ ստեղծել։ Ինչպես կարող է մի մարդ, որ այդքան բան է արել Հայաստանի համար, մի թև չտրամադրի, ընդամենը 500 քմ տարածք է։ Ինչքանով ես եմ հասկանում՝ ինչ-որ ուժեր կան, որոնք ուզում են մթնոլորտ ստեղծեն և ինձ ոչ կառուցողական լույսի ներքո ցույց տան, ասեն՝ դե ինչ առաջարկում ենք, չի ուզում։ Բայց առաջարկ էլ կա, առաջարկել էլ։ Եթե ուզում են հարցը լուծել, ապա վերջնական պիտի լինի»,- ասաց Շուշիի գորգերի թանգարանի տնօրենը։

Ըստ Ասծատրյանի՝ նախարարությունը հրաժարվել է այդ շենքը տրամադրելուց նաև այն պատճառաբանությամբ, որ ահռելի շինարարական ծախս պետք է իրականացվի։

«Նախարարության մակարդակով կարող է ամենաշատը 25-30 մլն դրամ կազմել։ Եթե հարցը այդ գումարն է՝ թող իրենք ծախսեն, ես կամաց-կամաց վերադարձնեմ այդ գումարը։ Դրան էլ ենք համաձայն, միայն թե առանձին տեղ տրամադրեն։ Պատմության թանգարանում արդեն իսկ անառողջ վիճակ է, և այնտեղի տնօրինությունը խնդիրներ է ստեղծում։ Ամենահետաքրքիրն այն է, որ ժամանակավոր ցուցադրություն են ասել և այն էլ՝ «Արցախյան գորգերի ցուցուդրություն» անվամբ։ Սա Շուշիի գորգերի թանգարանն է, ի՞նչ Արցախյան գորգերի ցուցադրություն։ Նաև Պատմության թանգարանի տնօրենն ասել է, որ ցուցադրության կոնցեպտը իրենք պետք է որոշեն ու իրենք ասեն, թե որ գորգը որտեղ կախվի։ Իրենք խոչընդոտներ են ստեղծում, չեն ասում՝ ոչ, բայց այնպես են անում, որ ես ասեմ ոչ»,- պատմեց Ասծատրյանը։

Ըստ նրա՝ առաջարկված տարբերակն ընդունելի կլիներ, եթե Շուշին անցած չլիներ թշնամուն և թանգարանը վերադառնալու տեղ ունենար, սակայն այս ֆորսմաժորային իրավիճակում վերջնական լուծում է անհրաժեշտ։

Մենք կապ հաստատեցինք նաև Պատմության թանգարանի տնօրենի հետ։ Դավիթ Պողոսյանը նշեց, որ որևէ անհամաձայնություն չկա Վարդան Ասծատրյանի հետ։

«Ամեն ինչ դեռ քննարկման փուլում , և նախաձեռնողը ԿԳՄՍ նախարարությունն է։ Պաշտոնական հարցերով խնդրում եմ իրենց դիմել»,- ասաց Պողոսյանը։

Ճշտող հարցին, թե նախարարության կողմից ի՞նչ կարգադրություն է եղել այս հարցի և ցուցահանդեսը կազմակերպելու վերաբերյալ, Պողոսյանը պատասխանեց. «Դեռևս հստակ որևէ բան չկա։ Մի քիչ շտապ են եղել հայտարարությունները, որոնք հայտնվել են մեդիայում։ Ամեն ինչ դեռևս կազմակերպման պրոցեսում է և ամեն ինչ շատ լավ կստացվի»։

Իսկ ահա Շուշիի գորգերի թանգարանի տնօրենը նշում է՝ ԿԳՄՍ փոխնախարար Ալֆրեդ Քոչարյանն ի սկզբանե ասել է, որ հարցը լուծելու են։

«Եթե իրենք ամեն ինչ ճիշտ անեն, այս ամենը չէր լինի։ Նույն Դավիթ Պողոսյանը ասում է, որ իրեն հրաման էլ չի եկել, որ թանգարանի սրահներից պետք է մեզ տրամադրեն։ Այսինքն՝ հրաման էլ չկա։ Ամբողջը անկապ խոսակցություն է, կամ ինչ-որ բան կա, որից ոչ ոք տեղյակ չէ»,- ասաց Վարդան Ասծատրյանը։

Մենք փորձեցինք մեկնաբանություն ստանալ նաև ԿԳՄՍ նախարարությունից, սակայն նախարարության մամուլի քարտուղար Գեղամ Մելիքբեկյանը նախ ասաց, որ զբաղված է և ավելի ուշ զանգենք, սակայն հետո չպատասխանեց մեր զանգերին։ Նախարարությունից մեկնաբանություն ստանալուց հետո այն նույնպես կհրապարակենք։