Թողել գնացել էր, հետո եկել էր քննչական գործողություններին մասնակցել էր. Արթուր Սաքունցը՝ երեկ վարչապետի ավտոշարասյան կողմից հղի կնոջը վրաերթի ենթարկելու դեպքի մասին 

ArmDaily.am-ի զրուցակիցն է Հելսինկյան քաղաքացիական ասամբլեայի Վանաձորի գրասենյակի նախագահ, իրավապաշտպան Արթուր Սաքունցը։ 

-Երեկ Նիկոլ Փաշինյանի ավտոշարասյունը վրաերթի է ենթարկել հղի կնոջն ու առանց կանգնելու հեռացել դեպքի վայրից՝ արդյունքում հղի կինը և նրա չծնված երեխան մահացել են։ Անկախ արարողակարգից՝ ընդունելի համարո՞ւմ եք ավտոշարասյան հեռացումը դեպքի վայրից։

-Մի փոքր բան՝ թողել գնացել էր, հետո եկել էր քննչական գործողություններին մասնակցել էր։

-Բայց ամեն դեպքում...

-Չէ, ուղղակի ինֆորմացիայի ամբողջության համար եմ ասում։

-Ընդունելի համարո՞ւմ եք վթարից հետո չկանգնելը։ Միայն վրաերթի ենթարկող ոստիկանի մեքենան չէր՝ մի քանի մեքենաներ էին ուղեկցում։

-Թույլատրելի չեմ համարում բնականաբար՝ դատապարտում եմ և պետք է հիմնավոր քննություն իրականացվի և բնականաբար մարդու մահվանը հասցրած այդ միջադեպի մեղավորը պետք է պատասխանատվության ենթարկվի։ Բայց միաժամանակ, իհարկե, այդ ուղեկցող ծառայության վարքագիծը պետք է փոխել։ Այսինքն, դա էլ իր հերթին պետք է որոշակի կարգավորումներ ունենար։ Իհարկե, ես ինչքան հիշում եմ, մինչ ավտոշարասյան գնալը պետք է պետավտոտեսչության մեքենաները նախազգուշական միջոցառումներ ձեռք առնեին, հասկանո՞ւմ եք։ Այսինքն, ճանապարհը բացելու կամ նախազգուշացնելու համար ավտոշարասյան գալու մասին։ Եթե դա պետավտոտեսչության մեքենան է եղել, ապա, իհարկե, դա առավել ևս պետք է ավելի խիստ մոտենալ։ Նորից եմ կրկնում՝ դա դատապարտելի գործողություն է։

-Իսկ իրավապաշտպան համայնքի արձագանքն ինչպե՞ս եք գնահատում։ Շատերը արդարացիորեն նկատում են, որ եթե դա լիներ նախորդ իշխանությունների օրոք, ապա այս դեպքը շատ մեծ արձագանք կստանար, նույնիսկ հնարավոր է ակցիաներ լինեին։

-Գիտեք, շատ բարձր արձագանք ստացել է, հիմա նաև գրառումներ են եղել։

-Ֆեյսբուքյան գրառումնե՞րը նկատի ունեք։

-Դե բա ֆեյսբուքում վերցնում են լրագրողները, հրապարակում են։ Դա էդ ժամանակ ուշադրություն դարձնում են, իսկ որոշ դեպքերում ուշադրություն չեն դարձնում։ Ավելի շուտ դա լրագրողական համայնքին պետք է հարց ուղղեք, թե էդ ոնց է, որ ընտրողաբար են դիտարկում։ Քննադատությունները մեկ տեսնում են, մեկ չեն տեսնում։

-Բայց նախկինում քննադատությունները երբեմն ուղեկցվում էին ակցիաներով և այլն։

-Չէ հա, էդ ո՞ր ակցիաներն ա եղել։ Էդ ինչ, որ ակցիաներն ա եղել։

-Ամեն դեպքում իրավապաշտպանները շատ ավելի ակտիվ էին։

-Հիմա զանգել եք ինձ իրավապաշտպանների մասին հարցեր տալու։ Շատ էլ լավ գիտենք։ Շատ ակտիվ ենք։ Ուղղակի Դուք չեք ուզում նկատեք կամ Ձեր ուզած ձևով չի ակտիվությունը դրսևորվում։

-Ոչ, պրն Սաքունց, ես իմ կարծիքը չեմ արտահայտում, այլ Ձեր հիշատակած ֆեյսբուք սոցիալական ցանցում ծավալված քննարկումները, որ իրավապաշտպանները նախկինի պես ակտիվություն չեն դրսևորում։

-Դանիել Իոաննիսյանը գրել է այդ մասին, կարդացե՞լ եք։

-Այո, բայց Դանիել Իոաննիսյանը պատասխանատու է իր համար։

-Ամեն մեկը իր համար է պատասխանատու՝ ես էլ արձագանքում եմ իմ փոխարեն։Ես մարդկանց քննարկումներին չեմ հետևում և իմ գործողությունների համար եմ պատասխանատու և ինչ-որ անում եմ՝ դա գիտեմ ինչ եմ անում։

Հայկա Ալոյան