Ինչ ունեցվածք ունի Արտակարգ իրավիճակների նորանշանակ նախարարը

ArmDaily.am-ը «Հայտարարագիր» շարքում այս անգամ կներկայացնի ՀՀ արտակարգ իրավիճակների նորանշանակ նախարար Արմեն Փամբուխչյանի ունեցվածքը: 

Ով է Արմեն Փամբուխչյանը

Ծնվել է 1984թ. նոյեմբերի 26-ին Երեւանում:

2002-2004թթ. ծառայել է ՀՀ զինված ուժերում:

2006թ. ավարտել է Երեւանի «Հրաչյա Աճառյան» համալսարանի իրավաբանական ֆակուլտետը: Իրավագետ:

2007-2008թթ. աշխատել է «Հուսալի պաշտպանություն» ՍՊԸ իրավաբանի օգնական: 2009-2011թթ.՝ «Ֆինքա» ՈՒՎԿ ՓԲԸ անվտանգության աշխատակից, 2011-2014թթ.՝ «Ֆինքա» ՈՒՎԿ ՓԲԸ վարկային մասնագետ, ավագ վարկային մասնագետ, 2014-2015թթ.՝ «Ֆինքա» ՈՒՎԿ ՓԲԸ խնդրահարույց վարկերի դեպարտամենտի մասնագետ, 2015-2017թթ.՝ «Ֆինքա» ՈՒՎԿ ՓԲԸ խնդրահարույց ակտիվների կառավարման դեպարտամենտի թիմի ղեկավար: 2017թ.՝ «Անելիք բանկ» ՓԲԸ խնդրահարույց ակտիվների կառավարման վարչության ղեկավար: 2017-2018թթ.՝ «Մոգո» ՈՒՎԿ ՍՊԸ խնդրահարույց հաճախորդների հետ աշխատանքի վարչության պետ: 06.06.2018-15.10.2018թթ. եղել է ՀՀ տրանսպորտի, կապի եւ տեղեկատվական տեխնոլոգիաների նախարարի տեղակալ, 15.10.2018-13.01.2019թթ.՝ ՀՀ տրանսպորտի, կապի եւ տեղեկատվական տեխնոլոգիաների նախարարի առաջին տեղակալ:

2015 թվականից «Քաղաքացիական պայմանագիր» կուսակցության հիմնադիր անդամ է:

2018թ. դեկտեմբերի 9-ին ԱԺ պատգամավոր է ընտրվել «Իմ քայլը» կուսակցությունների դաշինքի համապետական ընտրական ցուցակով:

2020թ-ի սեպտեմբերի 25-ին նշանակվել է ՀՀ արտակարգ իրավիճակների նախարարի առաջին տեղակալ:

2022 թ. ապրիլի 12-ին նշանակվել է ՀՀ արտակարգ իրավիճակների նախարար:

Պարգեւատրվել է «Հայոց բանակի գերազանցիկ» շքանշանով, «ՀՕՊ զորքերի լավագույն օպերատոր» պատվոգրով:

Ամուսնացած է, ունի երկու զավակ:

Ունեցվածքը 

Արմեն Փամբուխչյանը 2020 թվականի հայտարարագիրը ներկայացրել է 2021 թվականի մայիսի 15-ին։

Նա հայտարարագրել է Երևանի Էրեբունի վարչական շրջանում գտնվող 1 բնակարան՝ բազմաբնակարան բնակելի շենքում, որը գնել է 2017 թվականին, 2005 թվականին թողարկված NISSAN մակնիշի ավտոմեքենա, որը ձեռք է բերել 2018 թվականին և LAND ROVER FREELANDER 2 3.2 մակնիշի ավտոմեքենա, որը ձեռք է բերել 2020 թվականին։

2020 թվականի սկզբում Փամբուխչյանի բանկային հաշիվների վրա եղել է 4,096,202 ՀՀ դրամ գումար, որը տարվա վերջում դարձել է 4,285,344 ՀՀ դրամ։

Որպես կանխիկ գումար Փամբուխչյանը հայտարարագրել է 1,030 ԱՄՆ դոլար, 5,200 եվրո, 700,000 ՀՀ դրամ, որը տարվա վերջում դարձել է 1,950 ԱՄՆ դոլար, 3,500 եվրո և 850,000 ՀՀ դրամ։

2020-ի ընթացքում նա աշխատանքի դիմաց վարձատրություն ԱԺ-ից ստացել է 6,574,790 ՀՀ դրամ, իսկ ԱԻՆ-ից՝ 3,558,278 ՀՀ դրամ։

Որևէ այլ բան նա չի հայտարարագրել։