Երբ իշխանությունը նոր հակառեկորդներ է սահմանում, օրենքները փոխում իր քիմքին հարմար, գրավում ամեն համայնք եւ դպրոց

Թե ինչ ջանասիրությամբ է Հայաստանի քաղաքական իշխանությունը գրավում ամեն համայնք, դպրոց, բուժկետ՝ նախանձել կարելի է։ Մեր պաշտոնյաները նույն ջանասիրությամբ իրենց աշխատանքը կատարեին, թերեւս մեզ հասնող չէր լինի որպես զարգացած, կայուն պետություն։
Բայց քանի որ իշխանությունը զբաղված է երկրի ներսում ամեն թուփ եւ քար իրենով անելով, հետեւաբար՝ ժամանակ չունի իր պարտականությունները կատարելու։

Այսքան անվտանգային սպառնալիքների, Արցախյան հիմնախնդրի, թշնամու հետ բանակցությունների, Սյունիքին եւ Գեղարքունիքին սպառնացող վտանգի, սոցիալ-տնտեսական վատ վիճակի կողքին մեր իշխանությունը սիրտ եւ ժամանակ ունի այլ հարցերով զբաղվելու։ Առանց այդ էլ երկրում ծառացած գլոբալ խնդիրները այնքան շատ են, որ թվում է, թե նման մանր-մունր հարցերով հանրային կրքեր չեն բորբոքի։
Հիմա ինչ տարբերություն, թե ով կլինի իքս դպրոցի տնօրենի ժ/պ-ն, ինչու են ձախողում մանկավարժների, ծնողների, աշակերտների համար ցանկալի թեկնածուի ընտրությունը, չէ՞ որ տնօրենի աշխատանքի գնահատողը եւ առաջին շահառուները հենց նրանք են, մյուսները՝ նախարարություն, համայնքապետարան, ընդամենը վերահսկող են, կարող են ստուգել, ուղղորդել, խորհուրդ տալ, պատժել եւ այլն։ Բայց մեր իշխանությունը այդպես չի մտածում, այսքան խնդիրների տարափի տակ նոր խնդիրներ է իր համար ստեղծում, արդյունքում այսօր Երեւանի փողոցներում բողոքի ակցիա էին անում աշակերտներ եւ ուսուցիչներ։ Մինչդեռ երկուսի տեղն էլ դասարանում է, մեկի գործը սովորելն է, մյուսինը՝ սովորեցնելը։

Բայց, ինչպես տեսնում ենք, քաղաքապետարանը չի հանձնվում, ոչ միայն խոչընդոտում է ժ/պ-ի ընտրությունը, փորձելով յուրայինին դարձնել տնօրեն, այլեւ ցանկանում է փոխել անգամ ժ/պ-ին, այսինքն՝ մեկին, ով այսպես թե այնպես ժամանակավոր է։
Ամեն ինչ իրենցով անելու անհագ ցանկությունը սահմաններ չի ճանաչում։ Հիմա պայքարի հաջորդ թատերաբեմը համայնքներում է, այս հարցին մենք բազմիցս անդրադարձել ենք, բայց իշխող քաղաքական մեծամասնության ճկունությանը եւ մտքի թռիչքին կարելի է միայն նախանձել։ Այսօր ԱԺ արտահերթ նիստ է հրավիրել ՏԻՄ օրենքում փոփոխություններ կատարելու համար։ Առաջարկվում է՝ այն համայնքներում, որտեղ ինչ-ինչ պատճառներով համայնքապետեր չեն ընտրվում, հնարավորություն տալ վարչապետին՝ ժամանակավոր պաշտոնակատարներ նշանակել։ «Ներկայացվող նախագծով նախատեսվում է, որ եթե օրենքով միավորված համայնքի ավագանու առաջին նիստն ավագանու լիազորությունները ստանձնելու պահից 20 օրվա ընթացքում չի գումարվում, կամ ավագանու լիազորությունները վաղաժամկետ դադարեցվում են, ապա ՀՀ վարչապետը նշանակում է համայնքի ղեկավարի պաշտոնակատար՝ մինչեւ օրենքով սահմանված կարգով նորընտիր համայնքի ղեկավարի լիազորությունների ստանձնումը»։

Հիմնավորման մեջ նշվում է, որ 2021 թ․ ընթացքում 45 համայնքում անցկացվեցին ընտրություններ, սակայն մի շարք համայնքներում համայնքի ղեկավարի ընտրության գործընթացը տարբեր պատճառներով ձգձգվեց, ինչը բացասական անդրադարձ ունեցավ, իսկ որոշ դեպքերում՝ շարունակում է ունենալ համայնքների բնականոն կյանքի եւ բնակչության սպասարկման վրա։ Նշենք, որ այդ համայնքներից է Թալինը, որտեղ ՔՊ-ն ճնշումներով, քրեածին տարրերի հետ զավթեց համայնքի ղեկավարի պաշտոնը, սակայն մեծամասնություն կազմող ընդդիմադիր ավագանին չի մասնակցում, եւ համայնքում նիստեր չեն գումարվում։ Նույն վիճակն է նաեւ Վանաձորում, որտեղ Մամիկոն Ասլանյանին են անազատության մեջ պատանդ պահում։ Անցանկալի համայնքապետերից մեկին էլ՝ Առուշ Առուշանյանին ազատության դիմաց 5 տարով զրկեցին պաշտոններ զբաղեցնելու իրավունքից։

Ամբողջ խնդիրն այն է, որ թե այս, թե նախկին իշխանությունը տարրական հարգանք չունի պետության նկատմամբ, պաշտոնը, իշխանությունը միջոց են ավելի մեծ իշխանության, ազդեցության հասնելու համար։ Ընդ որում՝ նույնիսկ ամեն ինչ օրինական կազմակերպելն էլ չի ազատում պատասխանատվությունից։ Որովհետեւ օրինականությունը մեր դեպքում հակաօրինական գործողությունները օրենքով թույլատրելի դարձնելն է, օրենքները մարդկանց, նեղ անձնական խմբերի շահերին ծառայեցնելը։ Նախորդ իշխանությունն էլ այդպես վարվեց, օրենքները իրեն հարմարացնելով, արդյունքում՝ պտուղներից օգտվեցին հաջորդները, իսկ այդ փոփոխությունները դարձան մահակ նախորդների գլխին։ Նույնը սպասվում է այս իշխանությանը, իրենց իսկ ընձեռած լայն լիազորություններից եւ հնարավորություններից կօգտվեն հաջորդները, պատուհաս դարձած փոփոխություններն էլ կզգան սեփական մաշկի վրա։

Դիցուք երբ արդեն Հայաստանում նոր իշխանություն լինի, այս իշխանությունը ընդդիմադրի կարգավիճակում համայնքապետ ունենա, իսկ իշխանությունը ոչ մի ձեւ չթողնի նրա պաշտոնավարումը, մինչդեռ այդ անձնավորությունը եւ լավ է աշխատում, եւ հեղինակություն է բնակիչների շրջանում։ Կամ իքս հիմնարկի տնօրենին ազատեն աշխատանքից, քանի որ նախկինների օրոք է նշանակվել եւ ամենեւին էլ կապ չունի, որ վերջինս բարեխիղճ, նվիրված աշխատակից է...։

Սա այն է, ինչ այսօր անում է իշխանությունը՝ թողած մեր կենսական ամենակարեւոր եւ առաջնահերթ խնդիրները։ Բայց այս ամենը դառնում է տխուր նախադեպ, ապականվում է օրինականության եւ պետության էությունը, ամենավատ ռեկորդները սահմանված եւ ներված են լինում, իսկ ինչու չգերազանցել նրանց կամ գոնե չլինել նրանց պես։