Ազգային հերոսից՝ նոր հակահերոս. իշխանությունը անհանդուրժո՞ղ է կոռուպցիայի հանդեպ

Հայաստանում հերթական բարձրաստիճան պաշտոնյան է ձերբակալվել, մեղադրյալի կարգավիճակում հայտնվողը ոչ ավել, ոչ պակաս Արտակարգ իրավիճակների նախարարն է՝ գեներալ-մայոր, Ազգային հերոս։ Այսօր արդեն Հակակոռուպցիոն կոմիտեն բացահայտում է ԱԻՆ-ում մի քանի օր տեւած «մասկի շոուների» արդյունքները, ըստ այդմ՝ մոտ մեկ տասնյակ անձանց մեղադրանքներ են առաջադրվել, այդ թվում՝ նախարարին, նրա խորհրդականին, ստորաբաժանումների ղեկավարին, այլ աշխատակիցների...։

Հիմա հարց է առաջանում՝ ինչ «հանցանք» է գործել նախարարը, որը պատճառ է դարձել այսպիսի բացահայտումների։ Դրվագներից մեկով՝ Ա. Փիլոյանը նախարարության հետ համագործակցող ՍՊ ընկերության օգտին գործողությունների կատարման համար իր խորհրդական Ա. Հ.-ի օժանդակությամբ 2022թ.-ին ստացել է խոշոր չափերով կաշառք, մեղադրվում է նաեւ ջեռուցման համակարգի տեսքով խոշոր չափերով կաշառք ստանալու մեջ համապատասխան անձին նախարարությունում աշխատանքի ընդունելու համար: Մի խոսքով՝ գործով փաստական տվյալներ են ձեռք բերվել պաշտոնատար անձանց կողմից խոշոր ու առանձնապես խոշոր չափերով կաշառք ստանալու, դրան օժանդակելու, պաշտոնեական դիրքը չարաշահելու, խարդախության եղանակով խոշոր չափերով հափշտակություն կատարելու, ինչպես նաև խոշոր և առանձնապես խոշոր չափերով ապօրինի վարձատրություն ստանալու, տալու և այլ չարաշահումների վերաբերյալ։

Այս բացահայտման մասով բազմաթիվ հարցեր են առաջանում։
Նախ, Նիկոլ Փաշինյանը քանիցս հայտարարել է, որ կոռուպցիան չի ներելու, չի հանդուրժելու նույնիսկ ամենամտերիմ մարդու դեպքում։ Բայց այսքան ժամանակ ընդունենք, որ այնպես չէ ամեն ամիս որեւէ նախարարի, փոխնախարարի կամ բարձրաստիճան պաշտոնյայի են ձերբակալում կոռուպցիայի գործով, ինչը ամենեւին էլ չի նշանակում, որ կոռուպցիոն պոզուպոչով վերացել է։ Ինչեւէ, կոռուպցիայի նկատմամբ անհանդուրժող պետք է լինել, բայց հետաքրքիր են ընտրված «հակահերոսները»։

Այս դեպքում, օրինակ, տխուր է արձանագրել, որ կոռուպցիայի գործով մեղադրյալի կարգավիճակում է «Ազգային հերոսի» կոչում ստացած մարդը։ Փաշինյանի կողմից հերոսի կոչմանը արժանացած գեներալ-լեյտենանտ Փիլոյանի մասին երբեք էլ մամուլը դրական չի արտահայտվել, դեռ պատերազմի ժամանակ կասկածի տակ էին դնում նրա գործած սխրանքները եւ նշում, որ Ազգային հերոսի կոչումը չպետք է արժեզրկել։
Ինչեւէ, չնայած այս ամենին Փաշինյանը Փիլոյանին է դարձրել Ազգային հերոս, շնորհեց գեներալ-լեյտենատի կոչում, իսկ այսօր նա մեղադրվում է ջեռուցման համակարգի տեսքով կաշառք ստանալու մեջ, բացահայտվում է կոռուպցիայի մի խայտառակ շղթա։

Հակակոռուպցիոն կոմիտեի հաղորդագրությունը առաջին հերթին ափսոսանք, հիասթափություն եւ հուսահատություն է առաջացնում։ Ափսոս էր Ազգային հերոսի կոչումը, որ աջուձախ նվիրաբերում էին։ Ափսոս էր նախարարի պաշտոնը, որ արժեզրկվեց, ափսոս էր Արտակարգ իրավիճակների նախարարությունը, որը Արմեն Երիցյանի օրոք երկրի թիվ մեկ օրինակելի կառույցն էր։ Հարգելով անմեղության կանխավարկածը՝ ամեն դեպքում՝ տարածված հաղորդագրությունը լավ չի խոսում նաեւ քաղաքական իշխանության մասին, փաստորեն ստացվում է, որ երկրի վարչապետը վատ ճաշակ եւ «նյուխ» ունի, բարձր կոչումներ, պաշտոններ է տալիս կոռուպցիոնների եւ այս ամենը պարբերական բնույթ է կրում։ Երկրորդ՝ նման շոուներով արժեզրկվում է թե կոչումը, թե պաշտոնը, այլեւս որ մի պրոֆեսիոնալը կգնա պաշտոն զբաղեցնելու, եթե իմանա, որ իրեն կարող են խայտառակել ջեռուցման կաթսայի համար։

Հիմա իշխանության տեսանկյունից երեւույթը այլ մեսիջներ ունի, առաջին՝ կոռուպցիան՝ նույնիսկ ջեռուցման կաթսայի տեսքով, չի ներվում ոչ ոքի, այստեղ շատերը կասեն՝ իյա, իրոք։ Երկրորդ՝ Փիլոյանը անթույլատրելի արարք է թույլ տվել, այդ պատճառով ջեռուցման կաթսան նրան չներվեց։ Երրորդ՝ գուցե եւ ներվեր ամեն ինչ, հարցը կուլիսներում փակվեր, Փիլոյանին էլ ուղարկեին թոշակի՝ առանց հեղինակազրկելու թե զբաղեցրած պաշտոնը, թե ունեցած կոչումը։ Այսպես հարցեր լուծելը պետության տեսանկյունից ճիշտ չէ, քանի որ ստացվում է, որ պետական ապարատները չեն աշխատում, մեկ անձի որոշմամբ է իրականացվում ամեն ինչ։ Բայց այնպես չէ, որ այժմ մեկ անձի որոշմամբ չէ ղեկավարվում երկիրը, եւ քանի դեռ մենք չենք լսել մյուս կողմի տեսակետը՝ չենք կարող ենթադրել, թե եղել է կոռուպցիա, թե ոչ, ինչ մասշտաբի եւ ինչու չի ներվել դա Փիլոյանին։ Իսկ առայժմ պետք է արձանագրենք, որ «Ազգային հերոսը» ջեռուցման կաթսայի տեսքով կաշառք ստանալու գործով մեղադրյալ է։