Ինչ ունեցվածք ունի Վահագն Խաչատուրյանը

ArmDaily.am -ը «Հայտարարագիր» շարքում այս անգամ կներկայացնի ՀՀ նորընտիր նախագահ Վահագն Խաչատուրյանի ունեցվածքը:

Ով է Վահագն Խաչատուրյանը

Վահագն Խաչատրյանը ծնվել է 1959 թվականին Խորհրդային Հայաստանի Սիսիան քաղաքում։ 1976 թվականին ոսկե մեդալով ավարտել է Երևանի թիվ 118 միջնակարգ դպրոցը, 1976-1980 թվականներին՝ Երևանի Ժողովրդական տնտեսության ինստիտուտը՝ տնտեսագետ որակավորմամբ։ 1980-1982 թվականներին ծառայել է խորհրդային բանակում։

1982-1992 թվականներին Երևանի Ժողվրդական տնտեսության ինստիտուտում իրականացրել է գիտա-մանկավարժական գործունեություն, 1982-1990 թվականներին աշխատել է «Հրազդանմեքենա» արտադրական միավորումում՝ որպես տնտեսագետ, տնտեսական հետազոտությունների լաբորատորիայի վարիչ, 1990-1992 թվականներին եղել է «Մարս» արտադրական միավորման բաժնի վարիչ, գլխավոր տնօրենի տեղակալ։

1990-1995 թվականներին եղել է Երևանի քաղաքային խորհրդի պատգամավոր, 1992 թվականի դեկտեմբերի 22-ից մինչև 1996 թվականի փետրվարի 22 եղել է Երևանի քաղաքային խորհրդի գործադիր կոմիտեի նախագահ՝ Երևանի քաղաքապետ։

1995-1999 թվականներին ընտրվել է Հայաստանի Ազգային ժողովի պատգամավոր, եղել է ԱԺ ֆինանսավարկային, բյուջետային և տնտեսական հարցերի մշտական հանձնաժողովի անդամ, ԱԺ «Հանրապետություն» խմբակցության անդամ։

1996-1998 թվականներին եղել է Հայաստանի նախագահ Լևոն Տեր-Պետրոսյանի խորհրդական։

2000 թվականից դարձել է «Արմատ ժողովրդավարության և քաղաքացիական հասարակության զարգացման կենտրոնի» հիմնադիր անդամ, իսկ 2006 թվականից՝ «Այլընտրանք» հասարակական-քաղաքական նախաձեռնության հիմնադիր անդամ։

2008-2013 թվականներին եղել է «Հայ ազգային կոնգրես» կուսակցության «Մալաթիայի տարածքային կառույցի» ղեկավար, միաժամանակ՝ կուսակցության տնտեսական հանձնախմբի անդամ։

2019-ից 2021 թվականներին եղել է «Հայէկոնոմբանկ» ԲԲԸ-ի խորհրդի անդամ։

2021 թվականի օգոստոսի 4-ին Հայաստանի վարչապետ Նիկոլ Փաշինյանի առաջարկությամբ Հայաստանի նախագահ Արմեն Սարգսյանի հրամանագրով նշանակվել է ՀՀ բարձր տեխնոլոգիական արդյունաբերության նախարար։

2022 թվականից ՀՀ 5-րդ նախագահն է:

Գիտական, մասնագիտական հոդվածների, ազատական տնտեսագիտական, քաղաքական գրքերի թարգմանությունների և հրապարակումների հեղինակ է։

Ամուսնացած է, ունի 2 զավակ։

Ունեցվածքը

Խաչատուրյանը հայտարարագիրը ներկայացրել է 2021 թվականի դեկտեմբերի 30-ին։

Նա հայտարարագրել է Երևանի կենտրոնում գտնվող 1 բնակարան՝ բազմաբնակարան բնակելի շենքում, որը ձեռք է բերել 2002 թվականին, նույն թվականին ձեռք բերված ավտոտնակ, 2 հողամաս, որոնցից մեկը գտնվում է Արաբկիր վարչական շրջանում, իսկ մյուսը Ձորաղբյուրում: Հողամասերը նորընտիր նախագահը ձեռք է բերել համապատասխանաբար 2017 և 2006 թվականներին:

Խաչատուրյանի բանկային հաշիվներին եղել է 5,550,927 և 6,032,020 ՀՀ դրամ, ինչպես նաև 163 ԱՄՆ դոլար գումար: Նա հայտարարագրել է 15,000 ԱՄՆ դոլար կանխիկ գումար, 2,666,642 աշխատավարձ ԵՊՀ-ից, Շուշիի տեխնոլոգիական համալսարանից, Անտարեսից, նաև 5,400,500 ՀՀ դրամ աշխատավարձ Հայէկոնոմբանկից:

Որևէ այլ բան նա չի հայտարարագրել։