Կարելի է Հայաստանը հայտարարել ճգնավորների հանրապետություն․ Սամվել Մարտիրոսյան

«Եթե իմ QR կոդը ամեն սրճարանում սկանավորեն, ապա կկարողանան տեսնել իմ անուն, հայրանուն, ազգանուն, ծննդյան թիվ եւ անձնագրի համարը։ Լավ, ով եւ որ օրգանով ա մտածել ու որոշել, որ մի բուռ ազգ ենք, պետք ա ամեն ինչ իրար մասին իմանանք։ Ո՞վ ա որոշել, որ իմ անձնագրի համարը հանրային տեղեկատվություն ա։ Ու էդ դեպքում էլի բան ավելացրեք էլի մեջը ֊ տան հասցեն, հեռախոսի համարը, սոցքարտ։ Լիքը աշխատելու տեղ կա, բարեշրջելու։

Ձեր հունվարի 22 էլ շնորհավոր»,- գրել էր Մարտիրոսյանը։

 

Առողջապահության նախարար Անահիտ Ավանեսյանն էլ անդրադառնալով այս ահազանգին՝ լրագրողների հետ զրույցում ասաց, որ քաղաքացիների անձնական տվյալների գաղտնիությունը չի խախտվում, որովհետեւ քաղաքացին իր կամքով է ցույց տալիս իր հետազոտության արդյունքները: 

 

ArmDaily.am-ը զրուցել է Սամվել Մարտիրոսյանի հետ՝ պարզելու, ինչպես է մեկնաբանում Ավանեսյանի ասածը։

 

«Նույն պատասխանն է, էն, որ ասում էին, որ թեստի գումարը քաղաքացին չպետք է տա ու բացատրություն է եղել, որ  կարող է հարևանը տալ։ Ուզում եմ ասեմ, որ սա ինչ-որ ժանգլյոռություն է, որովհետև եթե դու մարդկանց դնում ես իրավիճակի մեջ, երբ իրենք պարտադրված են տվյալները տալու, պարզ է, որ միշտ կարելի է ասել, որ դա անհրաժեշտություն չի՝ առաջնային սրճարան գնալը, բայց դա չի նշանակում, որ կարելի է մարդկանց ամեն ինչից զրկել՝ ասելով, որ պարտավոր չեն և այլն»,-ArmDaily.am-ի հետ զրույցում ասաց Սամվել Մարտիրոսյանը։

 

Մարտիրոսյանն ասում է, որ մի կողմից իրոք մարդիկ իրենց կամքով են ներկայացնում, բայց փաստացի մարդը դա պետք է անի օրվա մեջ, մի գուցե, շատ տեղեր։

 

«Եթե ենթադրենք թատրոն է գնում, թանգարան է գնում, սպորտ դահլիճ է գնում, որը իմիջայլոց շատերի համար շռայլութուն չէ, այլ հենց նույն առողջական պահանջ է և մարդը մեծ հաշվով պարտադրված է։ Փաստացի ստացվում է, որ ահռելի քանակի մարդկանց մոտ այդ տվյալները կարող են հայտնվել»,-ասաց նա։

 

Հարցին, թե կարող ենք պնդել, որ իրոք մարդը իր կամքով է ներկայացնում անձնական տվյալները, պատասխանեց․ «Պատճառաբանումը նախարարության նրանում է, որ այն վայրերում է պարտադրված, որոնք ինքը կարող է չայցելել, բայց այդպես կարելի է Հայաստանը հայտարարել ճգնավորների հանրապետություն ու պարզա, որ մարդիկ համարյա ոչ մի տեղ կարող են չգնալ մեծ հաշվով»,-նշեց Մարտիրոսյանը։

 

Մարտիրոսյանն այս խնդրի լուծման տարբերակն ունի։

 

«Հարցը շատ հեշտ լուծվող է, եթե ցանկություն կա հարցը լուծել, այլ ոչ թե վիճաբանության մեջ մտնել։ Հարցը լուծված է օրինակ այն երկրներում, որտեղ անձնական տվյալների պաշտպանությունը հարգվում է պետության կողմից ու շատ պարզ է արվում դա։ Այսինքն սկանավորումը արվում է հատուկ ծրարի միջոցով, որը պարզապես ցույց է տալիս, այդ կոդը վավեր է, այսինքն մարդը պատվաստված է կամ թեստավորված, թե ոչ։ Սկանավորողը ավելորդ ոչ մի տեղեկություն չի տալիս»,-եզրափակեց նա։

 

Սեդա Մակարյան