«Շատ լավ է, որ ՀԱՊԿ-ի Բրյուս Լին դուք եք, ինչո՞ւ չեք դիմում ՀՀ սահմանի հարցով»․ Խամոյանը՝ Փաշինյանին
ՏեսանյութԽորհրդարանում կառավարության հետ հարցուպատասխանի ժամանակ «Հայաստան» խմբակցության պատգամավոր Ագնեսա Խամոյանը վարչապետ Նիկոլ Փաշինյանին հիշեցրեց ընդդիմադիր ժամանակ՝ 2017թ-ին, ՀԱՊԿ մասին արված հայտարարությունը։
Վարչապետ Փաշինյանն արձագանքեց՝ պատգամավորը ճշգրիտ հրապարակեց այն օրակարգը, որն ինքը, ՀՀ վարչապետի պաշտոնն ստանձնելով, քննարկել է ՀԱՊԿ-ում։
«Իհարկե, մի քիչ այլ բառապաշարով, այլ տոնայնությամբ, այլ դեմքի արտահայտությամբ, այլ կարգավիճակով։ Մենք ասել ենք, որ ՀԱՊԿ-ում մեր առաջնահերթությունը ՀԱՊԿ արագ արձագանքման, ճգնաժամային իրավիճակներին արձագանքման մեխանիզմների կատարելագործումն է, որպեսզի հասկանանք՝ այդտեղ աշխատող մեխանիզմ կա, թե՞ չկա։ Երբ ասվում է՝ ՀԱՊԿ-ին ինչի՞ չենք դիմել, էս ամբիոնից հայտարարվել է այդ ամենի մասին, պետք չէ հանրահայտ փաստերի մասին անընդհատ հարցեր տալ։
Այդ ձայնագրության մեջ նշված ամեն ինչը հնչել է ՀԱՊԿ աշխատանքային մակարդակով։ Եվ երբ եկել է պահը, երբ մենք պիտի գործողություն ձեռնարկենք մեր ամբողջ օրակարգի վերաբերյալ, այո, ես կայացրել եմ որոշում, իհարկե, ՀԱՊԿ մեր մյուս գործընկերների հետ։ Եվ առաջին անգամ ՀԱՊԿ պատմության մեջ գործել է արագ արձագանքման մեխանիզմ։ Լա՞վ է սա Հայաստանի շահերի համար, թե՞ վատ։ Իհարկե, լավ է։ Արդյոք սրանով բոլոր հարցերի պատասխանները տրվա՞ծ են, ոչ, տրված չեն։
Ընդդիմադիրներն ասում են՝ ՀՀ տարածքից 40 քառակուսի կմ տարածք կորցրել ենք, նախկինում 70-ից ավելի քառակուսի կմ տարածք եղել է և մինչև այսօր էլ շարունակում է մնալ ոչ մեր հսկողության տակ։ Բա ինչի՞ նախկինում ՀԱՊԿ-ին չեն դիմել էդ հարցերով։ ՀԱՊԿ կանոնադրության մեջ գրված է, որ ՀԱՊԿ-ը առաջին հերթին գործողությունները ձեռնարկում է քաղաքական-դիվանագիտական մեթոդներով։ ՀԱՊԿ-ը բանակ չէ, առաջին հերթին ռազմաքաղաքական կազմակերպություն է։
Խամոյանն էլ արձագանքեց․ «Շատ լավ է, որ ՀԱՊԿ Բրյուս Լին դուք եք։ Ի՞նչն է ձեզ խանգարում ՀԱՊԿ-ին դիմել 4-րդ հոդվածով, որպեսզի Ադրբեջանի զինծառայողները դուրս շպրտվեն Հայաստանի սուվերեն տարածքից։ Դուք հանգուցալուծում եք Ղազախստանի ներքաղաքական կյանքը, ինչո՞ւ չեք հանգուցալուծում Հայաստանի սահմաններում տիրող իրավիճակը»։
«Ինչպես գիտեք՝ մի հատ է եղել Բրյուս Լի և Բրյուս Լին ՀԱՊԿ-ում չի եղել։ Բայց ինչպես ՀՀ-ում, այնպես էլ ալամ ՀԱՊԿ-ում եղել ա մի տղամարդ, որի կարգավիճակը հիմա իր կողմնակիցներն են հրապարակային կասկածի տակ դնում։ Մենք այդպիսի հավակնություններ չունենք։ Ինչ վերաբերում է Ղազախստանի հետ կապված որոշմանը, դրա վերաբերյալ բավարար պարզաբանումներ հնչել են, ես լրացուցիչ պարզաբանումների անհրաժեշտություն չեմ տեսնում։ Հայաստանի կառավարությունն ունի բավարար լիազորություններ՝ անհրաժեշտության դեպքում և ըստ նպատակահարմարության՝ կայացնել որոշումներ։ Եվ այն դեպքում, երբ նպատակահարմար ու արդյունավետ չէ այդ որոշումը, չկայացնել այդ որոշումները»,- եզրափակեց Փաշինյանը։
