Մահվան թվերը շտկեցին եւ վե՞րջ․ պատասխանատվության ենթարկվողներ չե՞ն լինելու, թե +/-700-ը տեխնիկական վրիպակ է

Առողջապահության նախարարությունը այսօր հերթական ուշագրավ հայտարարությունն է  տարածել իր ֆեյսբուքյան էջում կորոնավիրուսից մահվան դեպքերի թվաքանակի տվյալներում առկա տարբերության մասին։ ԱՆ-ն նշել է, որ Վիճակագրական ծառայության կողմից հրապարակված բոլոր դեպքերն անհատապես համադրվել են կորոնավիրուսային հիվանդություն ունեցած անձանց տվյալների հետ, և առողջապահության նախարարության կողմից շտկվել է ԱՆ էլեկտրոնային տեղեկատվական բազայի մահվան տվյալները` դրանք համապատասխանեցնելով Վիճակագրական կոմիտեի հրապարակած վիճակագրությանը:

Հիշեցնենք, որ դեռ հոկտեմբերին ԱԺ նիստի ընթացքում «Պատիվ ունեմ»–ի պատգամավոր Թագուհի Թովմասյանը հարց էր ուղղել Առողջապահության նախարար Անահիտ Ավանեսյանին՝ ասելով, որ Ազգային վիճակագրական ծառայության տվյալներով` նախորդ տարի 3545 մարդ է մահացել կորոնավիրուսի հետևանքով, իսկ հիվանդությունների կանխարգելման և վերահսկման ազգային կենտրոնի տվյալներով` 2828։ 

Կառավարության նիստի ընթացքում այս հարցին անդրադարձել էր նաև վարչապետ Նիկոլ Փաշինյանը՝ հանձնարարելով կառավարությունում ծառայողական քննության ավարտվելուց հետո գլխավոր դատախազությունում ևս ուսումնասիրություն կատարվի։

Ինչ վերաբերում է տվյալների տարբերությանը. խոսքը, ըստ Թագուհի Թովմասյանի հայտնած տվյալների, 717 մահվան դեպքերի մասին է, որոնք նախարարության համար, կարծես, մանրուք լինեն, և գերատեսչությունը հանգիստ, խաղաղ հայտարարում է տեխնիկական թվացող սխալի շտկման մասին։ Մինչդեռ սա ոչ թե թվի շտկում է, այլ խոսքը մարդկային կյանքերի մասին է՝  վարչապետ Նիկոլ Փաշինյանի լեքսիկոնի մոտիվներով՝ +/-700։ Հետաքրքիր է՝ նախարարությունը մեր առողջության պահպանմանը, պատշաճ որակի բժշկական ծառայություններ մատուցելուն, մարդկանց կյանքին էլ է նույն թեթեւագույն տեխնիկական մտածելակերպով վերաբերում, ինչպես մահվան վերաբերյալ տվյալներին։  Եւ միթե թվերը շտկելով ամեն ինչ ավարտվում է, որեւէ մեկը պատասխանատվություն չի՞ կրելու սրա համար, այսինքն՝ մոտ 700 մահվան դեպքի անհամապատասխանությունը նորմալ, մարդկային, իրավաչափ սխալ է, որի դեպքում մեղավորներ պետք չէ՞ փնտրել։ Արդյոք հանրությանը կարիք չկա պարզաբանելու, թե ինչպես, ինչու կարող էր 700 մահվան դեպքի անհամապատասխանություն լինել, ով է մեղավոր, ինչ քայլեր են ձեռնարկում հետագայում +/- 100 եւ 1000 մարդկային կյանքեր չկորցնելու համար։

Նշենք, որ մենք այս հարցով ավելի վաղ դիմել էինք գլխավոր դատախազությանը, որտեղից մեզ հայտնել էին, որ կորոնավիրուսից մահվան դեպքերի թվաքանակի տարբերությունը պայմանավորված է տարբեր պետական մարմինների կողմից տնային պայմաններում և արտերկրում covid-19-ից մահվան դեպքերի հավաքագրման մեթոդաբանության տարբերությամբ։

Արփինե Պետրոսյան