Ինչ ունեցվածք ունի Երևանի նոր քաղաքապետ Հրաչյա Սարգսյանը

ArmDaily.am-ը «Հայտարարագիր» շարքում այս անգամ կներկայացնի Երևանի նորընտիր քաղաքապետ Հրաչյա Սարգսյանի հայտարարագիրը:

Ով է Հրաչյա Սարգսյանը

Ծնվել է 1985 թվականի թետրվարի 13-ին Երևանում:

1991-1999 թվականներին սովորել է Երևանի համար 185 միջնակարգ դպրոցում։ 1999-2001 թվականներին սովորել է Հայաստանի ազգային պոլիտեխնիկական համալսարանի հենակետային վարժարանում, 2001-2005 թվականներին՝ ՀՊՃՀ-ում, ստացել ճարտարագիտության բակալավրի աստիճան։ 2007-2009 թվականներին սովորել է Հայաստանի պետական կառավարման ակադեմիայում, ստացել մագիստրոսի աստիճան։

2014-2018 թվականներին աշխատել է «Արդշինբանկ» ՓԲԸ-ում: 2018 թվականի սեպտեմբերի 23-ին «Իմ քայլը» կուսակցությունների դաշինքով ընտրվել է Երևան քաղաքի ավագանու անդամ։ Նույն թվականի հոկտեմբերի 29-ին Երևանի ավագանու նիստում նշանակվել է Երևանի քաղաքապետի առաջին տեղակալ:

Հանդիսացել է «Առաքելություն» կուսակցության քաղաքական խորհրդի հիմնադիր-անդամ, որտեղից հեռացվել է 2021 թվականի հուլիսի 28-ին:

Ամուսնացած է, ունի երկու զավակ:

Ունեցվածքը

Նորընտիր քաղաքապետը 2020 թվականի հայտարարագիրը ներկայացրել է այս տարի մարտի 30-ին։

Նա հայտարարագրել է Աջափնյակ վարչական շրջանում գտնվող 1 բնակարան` բազմաբնակարան բնակելի շենքում, որը ձեռք է բերել 2017 թվականին:

Տարվա սկզբում Սարգսյանը ունեցել է 600,000 ՀՀ դրամ և 4,500 ԱՄՆ դոլար կանխիկ գումար, որը տարվա վերջում դարձել է 400,000 ՀՀ դրամ և 4,500 ԱՄՆ դոլար:

Նա նաև հայտարարագրել է 6,686,131 դրամ աշխատանքի վարձատրություն, որը ստացել է Երևանի քաղաքապետարանից, ինչպես նաև 144.00 ԱՄՆ դոլար ստացված փոխառություններ (վարկեր) «ԱԿԲԱ ԲԱՆԿ» ԲԲԸ-ից:

Որևէ այլ բան նորընտիր քաղաքապետը չի հայտարարգրել: