Երևան-Կապան-Երևան թռիչքուղին չեղարկվել է․ ի՞նչ են ասում փորձագետները

Քաղաքացիական ավիացիայի կոմիտեն «Նովէյր» ավիաընկերությունից ստացել էր համապատասխան հայտ Երևան–Կապան–Երևան կանոնավոր չվերթներ իրականացնելու նպատակով։ Չվերթների մեկնարկը նախատեսվում էր 2022 թվականի հունվարի 20-ից՝ շաբաթական երկու չվերթ հաճախականությամբ։

Երեկ պարզ դարձավ, որ «Նովէյր» ընկերությունը չեղարկել է Երևան-Կապան թռիչքների իրականացման վերաբերյալ իր հայտը, որը ներկայացրել էր Քաղավիացիայի կոմիտեին։

Ավիացիայի հարցերով փորձագետ Նավիկ Խաչատրյանը ի սկզբանե ողջունել է նախագիծը, սակայն իր համար անհասկանալի էր այն շահութաբեր կլիներ, թե՝ ոչ։

«Որպեսզի «ՆովԷյրը» կարողանար հաջողությամբ թռչեր, պետք է  համապատասխան հաշվարկ արվեր, օրինակ ըստ էկիպաժի վերգետնյա սպասարկումը, երկու օդանավակայաններում ուղևորների վերգետնյա սպասարկումը, նավթի ծախսը և ապահովագրությունը, որովհետև այն միայն մեկ երկրում չի արվում։ Ավիացիոն ապահովագրումը կամ Լոնդոնում կամ Ռուսաստանում է արվում»,-ArmDaily.am-ի հետ զրույցում ասաց Խաչատրյանը։

Ըստ փորձագետի ենթադրելի է, որ այս դեպքում ապահովագրությունը Ռուսաստանում պիտի լիներ, որովհետև ինքնաթիռ ներքին շրջանառության համար է շահագործվելու։

«Կան նաև օդանավակայանների ներսի նավիգացիոն ծախսերը, որը պետք էր հաշվարկի մեջ նախատեսել և այդ հաշվարկները, այն ժամանակ ես անում էի, մոտ 50 դոլարից ավել էր գալիս, իսկ օդանավը փոքր է՝ 19 տեղանոց, այսինքն՝ մի ուղղությամբ ծախսը 1000 դոլար է կազմում»,-ասաց նա։

Փորձագետն ասում է՝ առաջին խնդիրը, որ չվերթը չկայանար, ինքնարժեքի հաշվարկն է։

«Իսկ եթե ավիաընկերության կողմից գինը դրվի 100 դոլար, հերիք չի՝ մենք ապրում ենք երկրում որտեղ 100 դոլարը մեծ գումար է, մի բան էլ ավելի էժան գնով կարելի է Կապանից հասնել Երևան»,-պնդեց Խաչատրյանը։

Հաջորդ հարցը անվտանգային հարցն է՝ ըստ Նավիկ Խաչատրյանի։

«Եթե ինքնաթիռը բարձրանում է երկինք ու գնում է՝ դեպի Կապան իջնի, ապա պիտի այդ պլանի մեջ նախատեսվի լրացուցիչ օդանավակայան, որ ինչ-ինչ պատճառով Կապանի այդ օդանավակայան չիջնելու դեպքում գնա էնտեղ, որովհետև նավթը չի բավականանցնի, որ հետ գա Երևան»։

Փորձագետի հետ զրուցելիս պարզվեց, որ չվերթ իրականացնելը այդքան էլ դյուրին չի, փաստորեն կան բազում խնդիրներ։

«Օդաչուները պետք է ունենան մանյովռելու հնարավորություն, այսինքն եթե օդանավը գալիս է, որ իջնի Կապանի թռիչքուղի ու է չի կարողանում, պետք է շարունակի չվերթը, բայց օդանավը չի կարող թռիչքուղու կողքը պտտվել, պետք է երկար թռիչքուղի վերցնի։ Այդ ժամանակ գուցե պետական սահմանը հատելու խնդիր լինի, հնարավոր է մեկ սանտիմետր դուրս գաս օդային տարածքից ու  Ադրբեջանը համարի օդային տարածքի խնդիր, ու եթե դա մի քանի րոպե տևի կործանիչները օդ կբարձանան և կստիպեն օդանավին իջնել Ֆիզուլիի օդնավակայան որը մեծ վտանգ է»,-ասաց նա։

Փորձագետը պնդում է՝ կարևոր գործոն է նաև ունենալ երկրորդ օդանավ, որպեսզի տարբեր տեխնիկակական պատճառներով ինքնաթիռի խափանման հետևանքով, երկրորդ ինքնաթիռը լինի փոխարինող։ Երկրորդ ինքնաթիռն էլ պետք է լինի 19 տեղանող։

«Նովէյրը չունի երկրորդ ինքնաթիռը և ես զարմացա՝ ինչպե՞ս էին ուզում թռիչքներ իրականացնել»,-եզրափակեց Խաչատրյանը։

Սեդա Մակարյան