Family portrait. Ծառուկյանների ընտանիքը
Արխիվ
Armdaily.am-ը շարունակում է իր «Family portrait» շարքը, որտեղ ներկայացնում ենք հայտնի պետական ու քաղաքական գործիչների ընտանիքների կենսագրությունը, սոցիալական ակտիվությունը և այլ փաստեր:
Այս շաբաթ մեր հերոսը «Բարգավաճ Հայաստան» կուսակցության նախագահ Գագիկ Ծառուկյանն է:
Գագիկ Ծառուկյան
Գործարարը ծնվել է 1956 թվականի նոյեմբերի 25-ին Կոտայքի մարզի Առինջ գյուղում Նիկոլայ և Ռոզա Ծառուկյանների ընտանիքում։ Ընտանիքի հայրը՝ Նիկոլայ Ծառուկյանը, մասնագիտությամբ էլեկտրատեխնիկ է, այժմ զբաղվում է հասարակական գործունեությամբ։ Գագիկ Ծառուկյանի մայրը՝ Ռոզա Ծառուկյանը, մասնագիտությամբ հաշվապահ է և «Մուլտի Ագրո» սահմանափակ պատասխանատվությամբ ընկերության նախագահն է,[ միաժամանակ «Բարգավաճ Հայաստան» կուսակցության Կանանց խորհրդի պատվավոր նախագահը: Գագիկ Ծառուկյանը սովորել է Առինջ գյուղի դպրոցում, որտեղ էլ ծանոթացել է իր ապագա կնոջ՝ Ջավահիրի հետ:
Ջավահիր Ծառուկյան
Ջավահիր Ծառուկյանը հազվադեպ է շփվում լրատվամիջոցների հետ։ Երբ Գագիկ Ծառուկյանը նոր էր հրաժարվել «Բարգավաճ Հայաստան» կուսակցությունից, լրագրողների հետ զրույցում նա ասել էր, որ ուրախ է, քանի որ իր ամուսինն այլեւս քաղաքականությամբ չի զբաղվում.
«Այո, իհարկե ուրախ եմ, այդպես ավելի հանգիստ է»,- ասել էր Ջավահիր Ծառուկյանը։ Նա երբեմն ամուսնուն ուղեկցում է պաշտոնական միջոցառումներին։
Երեխաները
Գագիկ և Ջավահիր Ծառուկյաններն ունեն վեց զավակ՝ Ռոզա, Գայանե, Էմմա, Անահիտ, Նվեր և Հովհաննես Ծառուկյաններ:
Ռոզա Ծառուկյանն ավարտել է Անանիա Շիրակացու անվան ճեմարանը, ավարտել է Երևանի պետական բժշկական համալսարանը, ամուսնացած է Կարապետ Գուլոյանի հետ, ով Կոտայքի մարզպետն է եղել:
Գայանե Ծառուկյանը նույնպես ավարտել է Անանաիա Շիրակացու անվան ճեմարանը, ավարտել է Երևանի Պետական Համալսարանի իրավաբանության ֆակուլտետը գերազանցության դիպլոմով: Ամուսնացած է Անդրանիկ Մանուկյանի որդու՝ Դավիթ Մանուկյանի հետ:
Էմմա Ծառուկյանն ավարտել է Անանաի Շիրակացու անվան ճեմարանը, ավարտել է Երևանի պետական բժշկական համալսարանը, ամուսնացած է նախկին վարչապետ Հովիկ Աբրահամյանի որդու՝ Արգամի հետ:
Անահիտ Ծառուկյանն ավարտել են Անանիա Շիրակացու անվան ճեմարանը, սովորում է ԵՊԲՀ-ում, նրա անունով է կոչվում Առինջ գյուղի պոլիկլինիկան: Գագիկ Ծառուկյանի կրտսեր դուստրը ամիսներ առաջ՝ հոկտեմբերի 20-ին նշանվեց Խաչատուր Սուքիասյանի (Գռզո) որդու՝ Ալբերտի հետ:
Նվեր Ծառուկյանը սովորում է Հայաստանի պետական տնտեսագիտական համալսարանում Ինչպես նաև զբաղվում է բազկամարտով և մասնակցում տարբեր տեսակի առաջնությունների:
Հովհաննես Ծառուկյանը չի սիրում իր մասին տեղեկություններ տարածել: Նրա կենսագրության մանրամասների վերաբերյալ տեղեկություններ գրեթե չկան:
Շարքը՝ Արփինե Պետրոսյանի:
