Ընտրություններում հաղթելու մեր շանսերը գնահատում եմ բավականին բարձր. Իրինա Յոլյան

ArmDaily.am-ի զրուցակիցն է «Առուշ Առուշանյան» դաշինքի անդամ, Գորիսի նախկին փոխհամայնքապետ Իրինա Յոլյանը։

-Այսօր Առուշ Առուշանյանը հայտարարություն տարածեց այն մասին, որ չնայած այս պահին կալանավորված է, սակայն պատրաստվում է մասնակցել ՏԻՄ ընտրություններին։ Ինչպե՞ս եք գնահատում Առուշանյանի շանսերը։

-Բավականին բարձր եմ գնահատում, որովհետև Առուշանյանը գործով ապացուցել է, որ Գորիսում հսկայական ներդրումներ անելով հնարավոր է դրական փոփոխություններ բերել և այդ աշխատանքը ամենօրյա ռեժիմով տեսել են Գորիս համայնքի բնակիչները։ Եվ պատերազմական իրավիճակում Առուշանյանը կարողացել է շատ արագ մոբիլիզացնել ամբողջ համայնքը, որը եղել է Արցախի թիկունքը։ Հետպատերազմական իրավիճակում նաև սահմանային խնդիրների լուծման հետ կապված, սահմանամերձ բնակավայրերի հետ կապված խնդիրների լուծման հետ կապված առաջին արձագանքման օղակը եղել է համայնքը և չի եղել այդպիսի մի խնդիր, որը համայնքի համար լինի անլուծելի, որը որ համայնքի իրավասության շրջանակներում է, չի եղել այդպիսի մի խնդիր, որը անլուծելի լինի։

-Պատերազմական իրավիճակում Առուշանյանի կազմակերպչական ունակություններն ու դրսևորած հմտությունները ազդեցությունը կարո՞ղ ենք որպես առավելություն դիտարկել հատկապես հիմա, երբ Գորիսի մի շարք բնակավայրեր վերածվել են սահմանամերձ գոտիների։

-Այո, երբ որ այդպիսի հրաման եղավ, որ համայնքը պետք է մոբիլիզացվի և ջոկատներ պիտի կազմվեն, սահմանները պետք է գծվեն, ամբողջ այդ աշխատանքները խրամուղիների անցկացման, Առուշանյանի գլխավորությամբ իրականացվել են և կան փաստեր, տեսանյութեր՝ արձանագրվել է այդ ամեն ինչը, որ պատշաճ կերպով կազմակերպվել է։ Եվ առաջնագծի հետ կապված, և թիկունքային աշխատանքների կազմակերպման հետ կապված ամեն ինչ արվել է համայնքի կողմից և բնականաբար Առուշանյանի գլխավորությամբ։

-Ձեր դաշինքի անդամների նկատմամբ ճնշումներ կիրառվո՞ւմ են։ Օրինակ, որոշ ժամանակ առաջ Գորիսի բնակիչներ էին մեր խմբագրություն ահազանգել, որ իրենց այցելում են ուժային կառույցների ներկայացուցիչներ ու փորձում վախեցնել։

-Եթե նկատի ունենանք, որ մեր վրա քրեական գործ է հարուցվել, ավելին, սպեցնազ է ուղարկվել Գորիս՝ մեզ ձերբակալելու, ընդամենը նրա համար, որ մենք սահմանը պահող բնակիչներին տվել ենք դրամական աջակցություններ։ Նույն Որոտանի բնակիչներին, ովքեր այսօր բազմաթիվ խնդիրների առջև են կանգնել, մեր Շուռնուխի բնակիչներին, Բարձրավանի բնակիչներին, Ակների բնակիչներին, որ թշնամին իրենցից մի քանի կիլոմետր վերև կանգնած է Սև լճի տարածքում։ Իհարկե սա ևս բռնության դրսևորում է, ճնշումների մի դրսևորում է, երբ որ մեր նկատմամբ հարուցվել է քրեական գործ՝ սահմանը պահող բնակիչներին դրամական աջակցություն տալու համար։ Եվ դա որակվում է որպես վատնում և յուրացում, յուրացում բառի վրա խնդրում եմ ուշադրություն դարձնել այն պարագայում, երբ որ և Քննչական կոմիտեն, և դատարանում, երբ որ կալանքի տանելու համար էին դիմել, չկա այդպիսի մի օրինակ, երբ որ ասենք 115 բնակչից որևէ մեկը գոնե հազար դրամ տվել է Գորիսի համայնքապետարանի որևէ աշխատակցի։

Այստեղ ձևակերպումն է շատ կարևոր եղել, անպայման որակել և լրատվամիջոցներով տարածել այդ կեղծ ինֆորմացիան, երբ որ յուրացման գոնե մեկ ապացույց չկա։ Բայց եթե մեզ պետք է դատեն, քրեական գործեր հարուցեն այն բանի համար, որ սահմանը պահող գյուղացուն, ով այսօր բազմաթիվ խնդիրների առաջ է կանգնած՝ սկսած արոտավայրերի, կորցնելուց, դաշտավայրերը կորցնելուց, ամենօրյա ռեժիմով ինչ-որ խնդիրներ են առաջանում, անասուններն են անցնում՝ այդտեղ արդեն փոխհատուցման խնդիրներ են լինում, լավ, եթե այս երկրի սահմանը պահող բնակիչն իրավունք չունի, որովհետև Քննչական կոմիտեն որակում է, որ այդ մարդիկ լավ են ապրում և տեղի է ունեցել վատնում։

Ես շատ կուզենամ, որ այս գործը գնա դատարան և դատարանում ապացուցվի, թե որ շուռնուխեցին է շատ լավ կարգավիճակով ապրում, ես Որոտանում հարուստ մարդ չգիտեմ։ Ես գիտեմ, որ բոլորը դիմել են սոցիալական այս կամ այն խնդիրը լուծելու, ես գիտեմ, որ իրենք ներկայացրել են հիվանդության փաստաթղթեր։ Իհարկե սա ճնշում գործադրելու լավագույն օրինակներից մեկն է՝ աղաղակող նկարահանումներ իրականացնել, հանրությանը ցույց տալու համար՝ տեսեք, թալան է տեղի ունեցել, այն դեպքում, երբ մեկ ապացույց չեն կարող ունենալ, որ հազար դրամ անգամ, նորից եմ կրկնում, Գորիսի համայնքապետարանի որևէ աշխատակից կարող է վերցրած լինել։ Իրենք ևս սա արձանագրել են, բայց մեր հիմնական խնդիրն այն է, որ մենք սահմանը պահող գյուղացուն տվել ենք դրամական աջակցություն։

-Իսկ հասարակության տրամադրություններն ինչպիսի՞նն են, ընդհանրապես Ձեր շփումներն ի՞նչ են ասում։

-Բնական է, որ այս իրավիճակում մարդիկ տեսնում են՝ ինչ է կատարվում և շատ լավ հասկանում են ինչ է կատարվում։ Շատ-շատերը չեն ուզում ակնհայտ, երևացող խնդիրների, գլխացավանքի մեջ ընկնել և փորձում են զերծ մնալ։ Բայց ես հավատում եմ գորիսեցու թասիբին, ես վստահում եմ մեր համայնքի բնակիչներին, ես իրենց նաև ճանաչում եմ և գիտեմ, որ իրենք միշտ կարող են ճիշտ որոշում կայացնել ցանկացած ճիշտ իրավիճակում։

-Իշխանությունները վարչական լծակներ կկիրառե՞ն։

-Նախորդ ընտրություններին էլ է վարչական լծակ կիրառվել։ Այդ մասով քրեական գործ է հարուցվել Գորիսի ոստիկանությունում, բայց քանի որ խոսքը վերաբերվում էր իշխանությանը՝ ընդամենը ժամեր են պահանջվել, որպեսզի գործը կարճվի։ Այս անգամ էլ եթե լինի, մենք կնկատենք՝ այդ մասին անպայման կբարձրաձայնվի։ Հիմա որևէ մեկնաբանություն չեմ անի, քանի որ չի սկսվել նախընտրական թոհուբոհը, երբ որ արդեն գործընթացը սկսվի միաժամանակ, եթե կլինեն ինչ-որ խնդիրներ՝ այդ մասին միանշանակ կբարձրաձայնենք։

-Ձեր մրցակիցների մասին ի՞նչ կասեք, ինչպե՞ս եք գնահատում նրանց շանսերն այս ընտրություններում։

-Որևէ մեկնաբանություն չեմ ուզում ասել։ Յուրաքանչյուրը պետք է աշխատի իր հնարավորությունների, կարողությունների շրջանակներում։ Այս ընթացքում մենք այնքան թշնամանք, տհաճ իրավիճակներ, ատելություն ենք տեսել ու լսել, որ ես ինքս անձնապես հակված եմ, որպեսզի մենք ավելորդ լարվածություն չբերենք մեր համայնք, որովհետև մեր խնդիրը այս ստեղծված իրավիճակում միասնություն ստեղծելն է։ Եվ դրա համար չեմ ուզում անել որևէ հայտարարություն, որով որ կարող եմ առանց այն էլ այդ անջրպեդը, որ մեր հասարակության մեջ ստեղծվել է ու երեք տարի խորացվում է, որովհետև ինչպես նաև Առուշանյանն է իր խոսքում ընդգծել՝ միասնականություն ու շենացող Գորիս։ Սա է լինելու մեր տեսլականը և սրան ուղղված քաղաքականությամբ ենք մենք գնալու դեպի առաջ։

Հայկա Ալոյան