Քանի որ գործող քաղաքական այս դաշտի տրամաբանությունից դուրս ենք պայքարի մեջ մտել՝ կարծում ենք, որ ամբողջապես հաջողելու ենք. «Գյուրին կռնա»

ArmDaily.am-ի զրուցակիցն է «Գյուրին կռնա» քաղաքակրթական շարժման անդամ Արմեն Ներսիսյանը:

- Ձեր նախաձեռնության էջի նկարագարության բաժնում գրել էիք ոչ թե քաղաքական, այլ քաղաքակրթական: Ի՞նչ է դա նշանակում:

- Դա նշանակում է, որ Ձեր ասած քաղաքական պրոցեսը, որ հիմա ընկալում են, ընդամենը մեկ օղակ է: Սա համազգային շարժում է, որի նպատակը գաղափարական, քաղաքակրթական վերելքն է: «Գյուրին կռնան» ինքը սկսում է Գյումրիից, բայց նպատակ ունի տարածվել ամբողջ հանրապետությունով մեկ:

- Ինչո՞վ է պայմանավորված անվանման հենց այս տարբերակի ընտրությունը:

- Հիմա մենք քանի որ մեր արժանապատվությունը, մեր ինքնագիտակցումը, մեր հավաքական բանականությունն ամբողջությամբ պայթեցված է, մեր ուժը, մեր շփվելու այդ կոդն ենք փորձում փոխանցել, գենի արթնացման կոդն ենք փորձում փոխանցել: «Գյուրին կռնան» տարածվելու է հանրապետությունով մեկ: Յուրաքանչյուր համայնք իր բարբառով պետք է այդ կռնան, կարողանալու տերմինն առաջ տանել և եթե դա ամբողջանում է հանրապետությունով մեկ, ապա մենք այդ քաղաքակրթական վերելքն ապրում ենք: Մեզ պետք է ուղղակի այդ ազգային զարթոնքը:

- Մոտավորապես քանի՞ անդամ ունի Ձեր շարժումը:

- Սա շարժում է և բավականին շատ անդամներ ունի, և միայն Գյումրիում չէ որ: «Գյուրին կռնա» քաղաքակրթական շարժումը ձևավորվել է «Ազգային արժեք» ակումբի կողմից, որը աշխարհաժողովի նախաձեռնող խմբի անդամ է:

- Դուք մասնակցելու եք ՏԻՄ ընտրություններին: Կներկայացնե՞ք ձեր թեկնածուներին:

- Միայն Գյումրիում ենք առայժմ մասնակցելու ընտրություններին: Հենց այդպես էլ ձևակերպել ենք, որ սկսելու ենք Գյումրիից՝ մեր ճամփեն ուրիշ է, բայց վստահ ենք, որ ինքը որպես գործընթաց տարածվելու է ամբողջ հանրապետությունում: Թեկնածուները «Ազգային արժեք» ակումբի անդամներն են: Մենք ամբողջ ցուցակը կազմել ենք այդ տրամաբանությամբ: Այն կուսակցությունները, որոնց միջոցով ձևակերպվել է դաշինքը, իրենք ուղղակի տեխնիկական ու գաղափարական գործիք են այս պարագայում, որպեսզի կարողանանք մասնակցել ընտրություններին: Բայց կուսակցություների ընտրությունն էլ որոշակի տրամաբանված խճանկար է: Մենք վերցրել ենք քրիտոնեությունը, նժդեհացեղակրոնությունը և որպես արդյունք նաև Հայք Հայկազունիները, որովհետև մեր նպատակը Հայք պետության կառուցումն է:

- Կուսակցությունների անունները կնշե՞ք, որոնց հետ դաշինք եք կազմել:

- Նժդեհյան ցեղակրոն, և ուզում եմ հատուկ նշել, քանի որ շատերի մոտ կարծիք է, թե Շանթ Հարությունյանի Ցեղակրոն կուսակցությունն է, Հայք Հայկազունիներ և Քրիստոնեական վերածնունդ կուսակցությունները:

- Ազգայնակա՞ն կուսակցություններ են:

- Այո, ամբողջապես:

- Ի՞նչ եք կարծում, նման ուղղվածության շարժումների կարիքը կա Հայաստանում:

-Ոչ միայն կարիքը կա, այլև ուշացած են այսպիսի շարժումները:

- Հասարակությունը նման շարժումների կարիքը զգո՞ւմ է, որքանո՞վ կհաջողեն նման շարժումները:

- Մենք հստակ գիտենք հասարակությունը, հասարակության վերաբերմունքը կամ հասարակական կարծիքը, բայց մենք ոչ թե մոդայով ենք գնում կամ մոդայի հետևից գնալով երկիր կորցրեցինք ըստ էության, այլ գնում ենք պահանջը ձևավորելու: Սա բնական պահանջ է լինելու յուրաքանչյուր հայի համար: Հիմա իհարկե ընդհանուր այս տեխնոլոգիական հարձակման արդյունքում հասարակությունը պատրաստ չէ, բայց մենք գնում ենք արթնացնելու հասարակությանը: Դրա համար ազգայնական շարժումներն այլընտրանք չունեն, ազգային պետության կառուցումը հիմա այլընտրանք չունի, որքան էլ մեզ հիմա փորձեն այլ բան հրամցնել:

- Ի՞նչ արդյունքներ կկարողանաք ապահովել ընտրությունների ժամանակ, ի՞նչ արձագանքներ եք ստանում:

- Քանի որ գործող քաղաքական այս դաշտի տրամաբանությունից դուրս ենք պայքարի մեջ մտել՝ մենք կարծում ենք, որ ամբողջապես հաջողելու ենք: Որովհետև դուրս ենք սև-սպիտակ այդ պիտակավորման դաշտից, մենք ցույց ենք տալիս լույսը, ցույց ենք տալիս ապագան: Այս շարժումը քաղաքակրթական շարժում է, ինքն ապագայի մեր կառավարումն է, այսօր ենք մենք ձևավորում մեր խնդիրները, որոնք ապագայում լուծվելու են:

- Ովքե՞ր են Գյումրիի քաղաքապետի ձեր թեկնածուները:

- Մեր առաջին համարը Վարդան Սրտաշյանն է, երկրորդ համարը Վարդան Գրիգորյանը, երրորդ համարը՝ Վարդուհի Բալոյանը: Վարդան Սրտաշյանը «Ազգային արժեք» ակումբի անդամներից է, երկար ժամանակ եղել է ազգային դաշտում, ծավալել է ակտիվ հասարակական գործունեություն, միաժամանակ գործարար է, «Արաքս» հյուրանոցային համալիրի տնօրենն է, Վարդան Գրիգորյանը նույնպես գործարար է, ժամանակին զբաղեցրել է Շիրակի փոխմարզպետի պաշտոնը, բայց հայտնի իրադարձություններից հետո հրաժարվել է, իսկ Վարդուհի Բալոյանը Գյումրու «Իրական» դպրոցի համակարգողն է, կրթա-մշակութային բավականին լուրջ գործունեություն ծավալած:

Հայկա Ալոյան