Պարզաբանում. Ի՞նչ է անհրաժեշտ վարորդական իրավունքի վկայական ստանալու համար

Արխիվ 18 Փետրվար, 2019 0:02

ArmDaily.am-ի «Պ՚արզաբանում» շարքի շրջանակում կանդրադառնանք, թե ինչ է անհրաժեշտ վարորդական իրավունքի վկայական ստանալու համար, կներկայացնենք ընթացակարգի իրավական եւ տեխնիկական մասը՝ քայլ առ քայլ։

Պատասխան

Վարորդական իրավունքի վկայականի ստացման ինչպիսի՞ ընթացակարգ է գործում ՀՀ-ում:

Վարորդական վկայական ստանալու համար քննություններ ընդունելու եվ վարորդական վկայական տալու կարգը սահմանված է ՀՀ կառավարության թիվ 1158-Ն որոշմամբ, ըստ որի՝ վարորդական վկայականի տրամադրման համար որակավորման քննություններն ընդունվում են երկու փուլով՝ տեսական և գործնական քննություններ հանձնելու միջոցով: Որակավորման քննություններն ընդունվում են Երևան քաղաքի և մարզային քննական մարմիններում` ըստ անձի մշտական կամ ժամանակավոր հաշվառման կամ փաստացի բնակության վայրի: Որակավորման քննություններն ընդունում են ճանապարհային ոստիկանության պետի կողմից ստեղծված` առնվազն երեք անդամից բաղկացած քննական հանձնաժողովները:

Տեսական քննություններն անցկացվում են համակարգչային թեստերի միջոցով: Յուրաքանչյուր թեստ բաղկացած է պատասխանի 2-5 տարբերակ պարունակող 10 հարցերից, ընդ որում՝ պատասխանի տարբերակներից ճիշտ է միայն մեկը: Յուրաքանչյուր թեստի հարցերն ընտրվում են ճանապարհային ոստիկանության կողմից կազմված հարցաշարի տարբեր բաժիններից` համակարգչի պատահական ընտրության միջոցով: Հարցաշարը (փոփոխությունների դեպքում` նաև փոփոխությունները) կազմելուց հետո այն հրապարակվում է Հայաստանի Հանրապետության կառավարությանն առընթեր Հայաստանի Հանրապետության ոստիկանության լրատվության միջոցներով (այդ թվում` էլեկտրոնային): Թեստի հարցերին պատասխանելու համար տրվում է 15 րոպե ժամանակ, որը լրանալուց հետո թեստի լրացումը դադարեցվում է: Քննության արդյունքները տպագրվում են համակարգչի միջոցով՝ ճիշտ ու սխալ պատասխանների մասին նշումներով և տրվում քննությունը հանձնողին: Քննությունը համարվում է դրական հանձնած, եթե քննություն հանձնողը հարցերի առնվազն 90 տոկոսին տվել է ճիշտ պատասխաններ: Քննության արդյունքների վերաբերյալ կատարվում են գրառումներ քննությունների արդյունքների հաշվառման մատյանում ու հաստատվում հանձնաժողովի նախագահի և անդամների ստորագրությամբ:

Ընդ որում՝ քննության ընթացքը ցուցադրվում է սպասասրահում տեղադրված էկրանին: Կախված տեսական քննության արդյունքներից՝ անձին կա՛մ տրվում է տեսական քննության արդյունքների վերաբերյալ փաստաթուղթ գործնական քննության փուլին մասնակցելու համար, կա՛մ անձին են վերադարձվում նրա կողմից քննական մարմնին նախապես տրամադրված փաստաթղթերը: Տեսական քննությունը դրական չհանձնած անձը կարող է ցանկացած ժամանակ անհրաժեշտ փաստաթղթերը ներկայացնելով` կրկին մասնակցել տեսական քննությանը:

Գործնական քննության ժամանակ ստուգվում է վարորդի թեկնածուի գործնական վարման հմտությունն այն կարգերի տրանսպորտային միջոցներով, որոնք վարելու համար տրվելու է վարորդական վկայական: Գործնական քննությունն անցկացվում է այնպես, որպեսզի ստուգվեն վարորդի նաև կողմնորոշման հմտությունները, և վերջինս առավելագույնս պատրաստված լինի իրական կյանքում ավտոմեքենա վարելուն:

Որակավորման քննությունները դրական հանձնած անձը ցանկացած ժամանակ, բայց ոչ ուշ, քան վարորդական վկայական տալու համար հիմք հանդիսացած փաստաթղթերի պահպանման համար սահմանված ժամկետի ավարտը, ներկայացնում է նախատեսված փաստաթուղթը, և անհրաժեշտ տվյալներն անմիջապես գրանցվում են վարորդական վկայականներ տալու մատյանում ու մուտքագրվում համակարգիչ: Դրանից հետո անձն անմիջապես նկարահանվում է համակարգչային տեխնիկայի միջոցով, և նրան մեկ աշխատանքային օրվա ընթացքում հատկացվում է հերթական համարի վարորդական վկայական:

Ի՞նչ փաստաթղթեր են անհրաժեշտ ներկայացնել տեսակավորման քննությանը մասնակցելու համար:

«A», «B», «C» կարգերի ու «A1», «B1», «C1» ենթակարգերի տրանսպորտային միջոցներ վարելու վարորդական վկայական ստանալու տեսական քննությանը մասնակցելու համար անձը քննական մարմին պետք է ներկայացնի՝

1. անձնագիր կամ անձը հաստատող այլ փաստաթուղթ, իսկ դրանցում անձի հաշվառման (փաստացի բնակության) վայրի մասին տեղեկության բացակայության դեպքում` նաև հաշվառման (փաստացի բնակության) վայրի մասին տեղեկանք,

2. քննություն ընդունելու համար օրենքով սահմանված պետական տուրքի վճարման անդորրագիր:

«D» կարգի ու «D1» ենթակարգի տրանսպորտային միջոցներ վարելու վարորդական վկայական ստանալու տեսական քննությանը մասնակցելու համար` նաև հետևյալ փաստաթղթերը՝

վարորդական վկայական ստանալու համար Հայաստանի Հանրապետության օրենսդրությամբ սահմանված կարգով ուսուցում իրականացնող կազմակերպության (այդ թվում` ռազմաուսումնական հաստատության) կողմից տրված վարորդական դասընթացների ավարտական քննությունները դրական հանձնելու վերաբերյալ փաստաթուղթ (քարտ, որի ձևը հաստատում է Հայաստանի Հանրապետության կրթության և գիտության նախարարը)` բացառությամբ «A», «B» և «C» կարգերի ու «A1», «B1» և «C1» ենթակարգերի տրանսպորտային միջոցներ վարելու, վարորդական վկայական ստանալու դեպքերի, որոնց համար նշված ավարտական քննությունները դրական հանձնելու վերաբերյալ փաստաթուղթ չի պահանջվում
վարորդական վկայական (նոր կարգերի (ենթակարգերի) տրանսպորտային միջոցներ վարելու իրավունք ստանալու որակավորման քննություններին մասնակցելու, վարորդական վկայականի փոխանակման կամ միջազգային վարորդական վկայական ստանալու դեպքում):

Ինչպե՞ս է կայացվում անձին վարորդական վկայական տալու կամ վարորդական վկայական տալը մերժելու մասին որոշումը:

Քննական մարմնի ղեկավարի կողմից ընդունվում է անձին վարորդական վկայական տալու կամ վարորդական վկայական տալը մերժելու մասին որոշումներից մեկը որակավորման քննությունների ընդհանուր արդյունքների հիման վրա:

Տեսական քննությունը բացասական հանձնելու դեպքում վարորդական վկայական տալու մերժման մասին որոշումն ընդունվում է անմիջապես քննության ավարտից հետո, իսկ գործնական քննությունը բացասական հանձնելու դեպքում՝ ոչ ուշ, քան հաջորդ աշխատանքային օրը:

Ենթակա՞ է արդյոք բողոքարկման քննական մարմնի որոշումը՝ վարորդական վկայական տալու մերժման մասին:

Քննական մարմնի ղեկավարի կողմից կայացված վարորդական վկայական տալու մերժման մասին որոշումը ենթակա է բողոքարկման` «Վարչարարության հիմունքների և վարչական վարույթի մասին» Հայաստանի Հանրապետության օրենքով սահմանված կարգով: Մասնավորապես՝ վարչական ակտը կարող է բողոքարկվել վարչական կամ դատական կարգով: Վարչական կարգով բողոք կարող է ներկայացվել ինչպես ակտն ընդունած վարչական մարմին, այնպես էլ վարչական մարմնի վերադաս վարչական մարմին:

Ինչպե՞ս է ընթանում անձին տրանսպորտային միջոց վարելու իրավունքից զրկելու գործընթացը:

Անձը կարող է զրկվել տրանսպորտային միջոց վարելու իրավունքից Վարչական իրավախախտումների վերաբերյալ ՀՀ օրենսգրքին համապատասխան կարող է վարչական տույժ նշանակվել տրանսպորտային միջոց վարելու իրավունքից զրկելու ձևով, վարորդից վերցվում է վարորդական վկայականը մինչև գործի վերաբերյալ որոշում կայացնելը և տրվում է տրանսպորտային միջոց վարելու իրավունքի ժամանակավոր թույլտվություն, որի մասին նշում է արվում իրավախախտումների վերաբերյալ արձանագրության մեջ: Տրանսպորտային միջոց վարելու իրավունքից զրկելու որոշում կայացնելու դեպքում վարորդական վկայականը չի վերադարձվում, իսկ ժամանակավոր թույլտվության գործողությունը երկարաձգվում է մինչև գանգատարկման համար սահմանված ժամկետի լրանալը, կամ գանգատի առթիվ որոշման ընդունումը:

Ո՞ր իրավախախտումների դեպքում անձը կարող է զրկվել տրանսպորտային միջոց վարելու իրավունքից:

Առավել զգույշ վարելու և ճանապարհային երթևեկության կանոնների պահպանման նկատմամբ ավելի զգոն լինելու համար հարկ է իմանալ, որ անձը կարող է զրկվել տրանսպորտային միջոց վարելու իրավունքից Վարչական իրավախախտումների վերաբերյալ ՀՀ օրենսգրքով նախատեսված այն արարքները կատարելու դեպքում, որոնց համար որպես պատասխանատվություն նախատեսված է տրանսպորտային միջոց վարելու իրավունքից զրկում: Այդպիսի արարքներ են հանդիսանում առանց հաշվառման համարանիշի, կեղծված կամ փոխարինված հաշվառման համարանիշով տրանսպորտային միջոցներ վարելու արարքները վարչական տույժ նշանակելու օրվանից հետո` մեկ տարվա ընթացքում, երրորդ անգամ կատարելը, տրանսպորտային միջոցը կանգնեցնելու մասին ոստիկանության ծառայողի` օրենքով սահմանված կարգով տրված պահանջը վարորդների կողմից դիտավորյալ չկատարելու արարքը վարչական տույժի նշանակման օրվանից հետո` մեկ տարվա ընթացքում, կրկին կատարելը, և այլն:

Հարցերին պատասխանել է Արատտա ընկերության իրավախորհրդատու Տաթեւ Մարտիրոսյանը։

«Պարզաբանում» շարքի նախորդ հոդվածում անդրադարձել էինք ամուսնության ձեւակերպման իրավական ընթացակարգերին։ https://www.armdaily.am/news/14353.html?lang=hy