Իմ դեմ որոշում կայացնելը ուներ արժեք, որն արդեն վճարվել է․ Ռուբեն Վարդազարյան

Քիչ առաջ հայտնի դարձավ, որ ՀՀ վերաքննիչ դատարանն իր այսօր հրապարակած որոշմամբ ամբողջությամբ բավարարել է դատախազության բողոքը Ռուբեն Վարդազարյանի գործով և բեկանել ՀՀ առաջին ատյանի դատարանի որոշումը:

Հիշեցնենք, որ Առաջին ատյանի դատարանը գտել էր, որ նախքան Ռուբեն Վարդազարյանին քրեական գործով որպես մեղադրյալ ներգրավելը, Դատախազությունը պետք է դիմեր ՀՀ բարձրագույն դատական խորհուրդ և ստանար վերջինիս համաձայնությունը: Եվ այնքանով, որքանով չէր դիմել, ըստ Առաջին ատյանի դատարանի, թույլ է տվել Ռուբեն Վարդազարյանի իրավունքների խախտում: Վերաքննիչ դատարանի որոշման մասով ArmDaily.am-ը մի քանի հարց ուղղեց ԲԴԽ նախագահ Ռուբեն Վարդազարյանին, ում լիազորությունները այժմ կասեցված են։

-Ինչպե՞ս եք գնահատում Վերաքննիչ դատարանի այս որոշումը, որքանո՞վ էր այն սպասելի Ձեզ համար։

-Կայծակնային արագությամբ որոշման կայացումը դատական համակարգի ծանրաբեռնվածության պայմաններում զարմանալի էր, իսկ որոշման բովանդակությունը՝ սպասելի։

-Ինչո՞ւ էր սպասելի։

-Սպասելի էր, քանի որ իմ դեմ որոշում կայացնելը ուներ արժեք, որն արդեն վճարվել է, այսօր պարզ դարձավ, որ պարոն Արմաղանյանի (որոշումը կայացրած Վերաքննիչ դատարանի դատավոր Մհեր Արմաղանյան) որդին բարեհաջող հանձնել է դատավոր դառնալու քննությունը եւ շուտով կդառնա դատավոր։

-Պարոն Վարդազարյան, փաստորեն դուք այնպիսի մարդկանց եք դատավոր դարձրել, որոնք նեղ, անձնական շահերը գերադասում են դատավորի առաքելությունից, մասնագիտական պատվից, պարոն Չիչոյանը, Արմաղանյանը․․․շարքը շարունակելի է։

-Ոչ Չիչոյանին, ոչ Արմաղանյանին ես չեմ դարձրել դատավոր, դատավոր դարձնելու եզրույթին սկզբունքորեն դեմ եմ, իսկ բանավոր հարցազրույցի փուլը, որին մասնակից եմ եղել եւ հանձնաժողովի նախագահ եմ եղել, վստահ եմ՝ կանխել ենք, որ նման մարդիկ դատավոր չդառնան։

-Փաստորեն՝ լավ չեք կանխել․․․իսկ Վճռաբեկ դատարան դիմելո՞ւ եք, թե՞ ոչ։

-Դիմելու եմ Վճռաբեկ դատարան, վստահ եմ, որ նույնաբովանդակ որոշում է լինելու, իմ բողոքը վարույթ չի ընդունվելու, բայց պետք է դիմեմ, որպեսզի հնարավորություն ունենամ դատական իշխանության կողմից յուրովի մեկնաբանվող նորմի սահմանադրականությունը վիճարկել Սահմանադրական դատարանում, ինչպես նաեւ Մարդու իրավունքների եվրոպական դատարան դիմել։ Վստահ եմ՝ ՄԻԵԴ-ը պարոն Ջհանգիրյանի կամակատարը չի լինի։

-Պարոն Վարդազարյան, փաստորեն չե՞ք վերադառնալու։

-Փաստորեն չեմ վերադառնալու, այս պահին չեմ էլ ուզում վերադառնամ, չեմ ուզում այս ֆարսին մասնակից լինել։

-Սա նահա՞նջ է պայքարից։

-Բացարձակ նահանջ չէ, սա ավելի հստակ դիրքավորում եւ ուժերի վերականգնում է նշանակում, պայքար՝ հանուն իմ երազած դատարանի։

-Նաեւ վարչական դատարան էիք դիմել, որեւէ նորություն կա՞։

-Վարչական դատարան ներկայացված հայցս հետ է վերադարձվել, վերաքննիչ բողոք եմ ներկայացրել։ Քանի դեռ մեր դատարանում կան դատավորներ, ովքեր դատարանի նախագահին եւ ԲԴԽ նախագահին շեֆ են ասում, նման պրոցեսներ լինելու են։

-Ձեզ էլ էին շեֆ ասում։

-Ինձ երբեք շեֆ չեն անվանել։

-Իսկ Ձեր դեմ հարուցված քրեական գործից ի՞նչ նորություն կա։

-Նորություն չունեմ այս պահին, վստահ եմ, որ այժմ փորձելու են հնարավորինս շուտ գործն ուղարկել դատարան, քանի դեռ սերվերները առգավված են եւ մակագրությունը լինելու է ձեռքով։ Նման պայմաններում քրեական գործը քննելու է այն դատավորը, որը գործը դեռ չստացած խոստում կտա մեղադրական դատական ակտ կայացնելու։

-Պարոն Վարդազարյան, փաստորեն իշխանությունը հաջողել է դատարանները գրավելու, դատարանները բուռը հավաքելու օպերացիան։

-Դեռ հաջողելու ճանապարհին են, կան 10-15 հոգի, որոնք պայքարում են եւ չեն կոտրվում։

-Նրանց չեզոքացնելը հեշտ է՝ վարույթներ, քրեական գործեր։

-Ցավոք սրտի՝ այո։

-Չե՞ք կարծում, որ ամեն դեպքում Դուք Ձեր մեղքի բաժինն ունեք, որ այսօր մեր դատավորները հեշտ են հանձնվում, սկզբունքային չեն, առաջնորդվում են ոչ թե Սահմանադրությամբ եւ օրենքներով, այլ շահերով․․․։

-Միանշանակ, ես իմ մեղքի բաժինն ունեմ, ես քաջ գիտակցում եմ այն բոլոր սխալները, որ թույլ եմ տվել իմ պաշտոնավարման ընթացքում, բայց նաեւ վստահ եմ, որ վերադառնալուց հետո իմ բոլոր սխալներ շատ արագ կշտկեմ։

-Այսինքն՝ ամեն դեպքում վերադառնալո՞ւ եք եւ վենդետա լինելո՞ւ է։

-Վերադառնալու եմ եւ իրական վեթինգ եմ իրականացնելու։

-Իսկ ինչու 3 տարի շարունակ չիրականացրեցիք, չէ՞ որ իշխանությունն էլ էր դա պահանջում։

-Իշխանությունը ուրիշ վեթինգ էր պահանջում, այն վեթինգը, որը ես նկատի ունեմ, դրա սկզբունքները, մեխանիզմները այլ հարցազրույցի թեմա է, որը պատրաստ եմ ցանկացած հարմար պահի բացահայտել։