Ադրբեջանի նպատակը լոկալ մարտեր վարելն է, իրադարձութունների հետագա զարգացումները կախված են բանակցային գործընթացից. Տիգրան Աբրահամյան

ArmDaily.am-ը սահմանային իրավիճակի շուրջ զրուցել է «Պատիվ ունեմ» դաշինքի պատգամավոր Տիգրան Աբրայամյանի հետ։

- Պարոն Աբրահամյան, ինչու է թշնամին ընտրել հատկապես Գեղարքունիքի սահմանային հատվածը։

- Ադրբեջանը նպատակ ունի առաջնագծում լարվածություն մտցնել և Հայաստանի վրա ճնշումներ գործադրել, թե սահմանի որ հատվածի ուղղությամբ այդ լարվածությունը կլինի՝ դա մարտավարական հարց է, այդ պահին որտեղ հարմար է՝ այդտեղ էլ լարվածություն են մտցնում։ Այսինքն, պետք չէ ցանկացած ուղղության վրա ֆիքսվել, թե այդտեղ ինչ-որ խնդիր է լուծում։ Խնդիրը լարվածություն մտցնելն է, մնացած հարցերը, թե սահմանի որ հատվածում իրավիճակը կլարվի՝ զուտ մարտավարական հարց է։ Ամեն դեպքում՝ իրենք գործողություններ են սկսում այն հատվածներում, որտեղ համարում են խոցելի։ Խնդիրը դրա մեջ է։ Միգուցե կփորձեն իրավիճակի ավելի ընդգրկուն էֆեկտ ստեղծել՝ լարվածությունը կտեղափոխեն ուրիշ հատված։ Բայց այստեղ գլխավոր խնդիրը Հայաստանի նկատմամբ ճնշումներ գործադրելն է։

- Երեկ ՀԱՊԿ գլխավոր քարտուղար Ստանիսլավ Զասը հայտարարություն էր տարածել հայ-ադրբեջանական սահմանին տիրող իրավիճակի առնչությամբ, սա այն հայտարարությո՞ւնն էր, որ կարելի էր ակնկալել ռազմաքաղաքական դաշինքից, որի անդամ է Հայաստանը։

- ՀԱՊԿ գլխավոր քարտուղարի ղեկավարի հայտարարությունը ողջ խորությամբ հասկանալու համար նախ անհրաժեշտ է իմանալ, թե ՀԱՊԿ-ը և Հայաստանը, ինչ աշխատանք են տանում, քննարկումներն որ փուլում են և ինչ աշխատանքներ կան։ Երբ դրա մասին մանրամասն կիմանանք՝ այդ համատեքստում շատ ավելի հասկանալի կլինի, թե իրականում ինչու է ՀԱՊԿ գլխավոր քարտուղարի հայտարարությունն այդպիսի բնույթ կրում։

- Հետագա զարգացումների հետ կապված ինչ կանխատեսումներ ունեք՝ կարելի՞ է լայնամասշտաբ գործողություններ ակնկալել, թե դրանք շարունակելու են լոկալ բնույթ կրել։

- Ես կարծում եմ, որ Ադրբեջանի նպատակը եղել է լոկալ մարտեր վարելը, բայց իրադարձութունների հետագա զարգացումները կախված են, թե դիվանագիտական հարթույթունում կողմերն ինչ համաձայնության կգան կամ չեն գա, հետագա զարգացումներն ինչ հունով կշարժվեն, այսինքն, դրանք ուղիղ կախված են բանակցային գործընթացում տեղի ունեցող աշխատանքներից։

- Երեկ Կառավարության նիստում Նիկոլ Փաշինյանն ասաց, որ իմաստ ունի դիտարկել հայ-ադրբեջանական սահմանի ողջ երկայնքով ռուս խաղաղապահների տեղակայման հարցը։ Ձեր գնահատմամբ՝ ինչ արձագանք կարելի է սպասել ռուսական կողմից, ապա նաև Հայաստանի համար սա սուվերենության մնացորդների վերջնական կորուստ չի նշանակի։

- Գիտեք, ցանկացած նախաձեռնություն ունի իր գինը։ Պետք է հաշվարկել, թե ինչ ենք տալիս և ինչ ենք ստանում դրա դիմաց։ Երկրորդը՝ ցանկացած նախաձեռնություն ոչ միայն ընկալում ու լսում են երկրի ներսում, այլ դա քննարկվում ու դիտարկվում է ամենատարբեր տեսանկյուններից նաև դրսում։ Այդ տեսանկյունից պետք է հասկանալ, թե դրանով ինչ մեսիջներ է ուղղվում Ադրբեջանին և առհասարակ արտաքին աշխարհին, այն պայմաններում, երբ դու քո սահմանների ամբողջական պաշտպանությունը փորձում ես դնել թեկուզ և քո դաշնակից պետության վրա։

- Ի՞նչ մեսիջ է հղվել, պարոն Աբրահամյան։

- Չեմ ուզում մանրամասնել, որովհետև խնդիր եմ տեսնում։

- Իսկ դրա գինը ո՞րը կարող է լինել։

- Չեմ կարող ասել, բայց երբ քո սահմանի անվտանգությունն ապահովում է որևէ այլ երկիր՝ անկախ նրանից, որ դա որոշակի իրավական բազա ունի փոխադարձ օգնության առումով, բայց դա կարող է լրացուցիչ ծախսեր առաջացնել, մարդկային ուժի տեղաբաշխման մասին է նաև խոսքը։ Ոչինչ հենց այնպես չի լինում, անկախ նրանից դիմացինդ բարեկամ երկիր է, համագորակցության մեջ եղած երկիր է, թե ռազմավարական դաշնակից։