Ի դեպ. Երեւանի կենտրոնում տեղի ունեցած սպանության մասին
Ի դեպԻ դեպ. Այսօր ռումբի նման պայթեց ու կայծակնային արագությամբ համացանցում ու առցանաց մամուլում տարածվեց տեղեկությունն այն մասին, որ մայրաքաղաքում, Երեւանի կենտրոնում կրակոցներ են հնչել, կա, սպանված։ Ապա հայտնի դարձավ սպանվածի անձը։ Ըստ մամուլի տեղեկությունների, սպանվածը Քյավառցի Ռաֆո անունով հայտնի Ռաֆայել Մարդոյանի թիկնապահն է։ Դարձյալ ըստ մամուլի տեղեկությունների, հանցագործի թիրախը, սակայն եղել է Ռաֆայել Մարդոյանը: Ըստ այդմ, Ռաֆայել Մարդոյանը հաճախ է հայտնվում հանցագործների թիրախում եւ սա նրա նկատմամբ առաջին մահափորձը չէ:
Եվս մեկ մահափորձ էլ տեղի էր ունեցել 2018 թվականին՝ ԱՄՆ-ում. Նրա ուղղությամբ բազմաթիվ կրակոցներ են արձակել, Վերջինիս ծանր վիճակում տեղափոխվել է Բևերլի Հիլզի հիվանդանոցներից մեկը, բժիշկներին հաջողվել է փրկել նրա կյանքը: Մեկ այլ մահափորձ էլ տեղի էր ունեցել Մոսկվայում: Ասում են նախկինում նրա նկատմամբ մեկ անգամ էլ մահափորձ արվել է Երևանում, հուղարկավորության ժամանակ: Սրանք տեղեկություններ են, որ շրջանառվում են մամուլում, իսկ այսօրվա դեպքից հետո ոստիկանները Ռաֆայել Մարդոյանին տարել են ոստիկանություն: Իհարկե տեղի ունեցածը ՝ սպանություն մայրաքաղաքի կենտրոնում, արտառոց է, սակայն աննախադեպ չէ։ Նախկինում էլ նման դեպքեր արձանագրվել են։ Այլ հարց է, որ մեր հասարակության հուզական, գերլարված վիճակում նման դեպքերը ավելի մեծ հնչեղություն են ստանում, ավելի մեծ ազդեցություն են ունենում մարդկանց հոգեբանական վիճակի վրա։ Առաջին, առաջնային ռեակցիան այն է, որ իշխանությունն իր տեղում չէ, որ իրավապահ մարմինները անգործության են մատնված, երկիրն անտեր է, եւ այլն։ Թե պաշտոնական վիճակագրությունն ինչ է ասում, չգիտեմ, բայց տպավորություն է, որ զենքի կիրառմամբ քրեական ռազբոռկաներն ու սպանությունները կարծես հաճախակիացել են։ Իհարկե, այստեղ իրավապահ համակարգը ահռելի աշխատանք ունի անելու, այն էլ այս պայմաններում, երբ երկիրը հարկադրված է դիմակայել արտաքին անվտանգային մարտահրավերներին, երբ երկրում ներքաղաքական լարված իրավիճակ է ու նախընտրական շրջան։
Այս պայմաններում այսպիսի դեպքերը ոչ միայն հասարակական կարգին են սպառնում այլեւ, եթե կուզեք՝ պետական անվտանգությանը։ Եվ վերջինը.Ինչպես հիմա Հայաստանում ամեն ինչ, ամեն մի մեծ ու փոքր իրադարձություն, այս սպանությունն էլ կունենա որոշակի ազդեցություն հանրային տրամադրությունների վրա, անկախ նրանից, թե քաղաքական ուժերն այն կփորձեն, թե չեն փորձի օգտագործել քաղաքական նպատակներով։ Մնում է հուսալ, որ իրավապահ մարմինները արագ ու օպերատիվ կպարզեն սպանության հանգամանքներն ու մեղավորներին։
