Ի դեպ. Նիկոլ Փաշինյանի՝ Ֆրանսիա եւ Բելգիա այցերի մասին
ADTVԻ դեպ, այսօր տեղի է ունեցել Հայաստանի վարչապետի պաշտոնակատար Նիկոլ Փաշինյանի այցը Ֆրանսիա եւ Բելգիա։ Հատկանշական է, որ այցը Ֆրանսիա տեղի է ունենում նախագահ Էմանուել Մակրոնի հրավերով։
Երկու երկրների ղեկավարները լրատվամիջոցների համար հայտարարությամբ են հանդես եկել, որտեղ Մակրոնը շեշտել է, որ Հայաստանի և Ադրբեջանի միջև սահմանազատումը պետք է իրականացվի բացառապես բանակցությունների միջոցով, և որ ադրբեջանական զորքերը պետք է լքեն Հայաստանի ինքնիշխան տարածքը: Ֆրանսիայի նախագահը նաև ընդգծել է, որ անհրաժեշտ է բոլոր գերիների և մյուս պահվող անձանց ազատ արձակումը: Այս հրապարակային հանդիպումից հետո արդեն տեղի է ունեցել երկու երկրների ղեկավարների հանդիպումը աշխատանքային ճաշի ֆորմատով։
Փաշինյանը հյուրընկալվել է նաեւ Ֆրանսիայի Ազգային ժողովում, հանդիպել է Ազգային ժողովի նախագահի, ինչպես նաեւ Ֆրանսիայի Սենատի նախագահի հետ։ Փարիզից վարչապետի պաշտոնակատարը մեկնել է Բրյուսել, հանդիպելու Բելգիայի վարչապետի և Եվրոպական խորհրդի նախագահի հետ։
Հասկանալի է, որ այցը կապված է տարածաշրջանային վերջին զարգացումների ու ստեղծված իրավիճակի հետ, եւ թե Ֆրանսիայի նախագահ Մակրոնի, թե Եվրոպական խորհրդի նախագահի հետ հանդիպումների հիմնական թեմաները վերաբերում են հայ-ադրբեջանական սահմանին ստեղծված լարված իրավիճակին, Ղարաբաղյան հակամարտության հետագա կարգավորման գործընթացին, ինչպես նաեւ տուժած բնակչության ու հումանիտար աջակցության հնարավորությունները։
Մեծ հաշվով Նիկոլ Փաշինյանի այցը պայմանավորված է ընթացիկ իրավիճակի ու հետագա հնարավոր զարգացումների հնարավոր սցենարների հետ։ Մի կողմից Նիկոլ Փաշինյանի այցը խիստ ողջունելի է, եթե հաշվի առնենք հատկապես Ֆրանսիայից հնչած հայտարարությունները Արցախի կարգավիճակի, Արցախի տարածքների դեօկուպացիայի եւ Հայաստանի տարածքային ամբողջականության, ընդհուպ մինչեւ հարցը ՄԱԿ ԱԽ-ում քննարկելու եւ այդ հովանու ներքո Հայաստանին ռազմական աջակցություն տրամադրելու պատրաստակամության մասին։
Այլ հարց է, թե ողջունելի լինելուց զատ ինչքանով է այն ռիսկային՝ հաշվի առնելով մեր ռազմավարական գործընկեր ՌԴ-ի դիրքորոշումն ու եթե կարելի է ասել՝ «քաղաքական խանդը»։ Արդյոք այս այցը իրականում, եւ Կրեմլի ընկալումներում, նշանակում է դեմարշ, կամ առնվազն քաղաքական այլընտրանքի գնալու ուղերձ, թե՞ սա Կրեմլի գիտությամբ ու համաձայնությամբ կատարված այց է։ Չպետք է բացառել, որ Ֆրանսիայի գործոնը կարող է օգտագործվել ՌԴ-ի կողմից Թուրքիայի հետ հարաբերություններում դիրքերը ամրացնելու համար: Առաջիկա օրերին կերեւա ՌԴ-ի արձագանքի ոչ հրապարակային դրսեւորումներից։
