Ի դեպ. Հայաստանի՝ ՀԱՊԿ-ին դիմելու մասին

Ի դեպ, արդեն երրորդ օրն է, ինչ Սյունիքում իրավիճակը մնում է լարված, վարչապետի պաշտոնակատարի գնահատականով՝ պայթյունավտանգ։ Ադրբեջանի զինված ուժերի զինծառայողների որոշ խմբեր հատել են Հայաստանի պետական սահմանը և Սև լիճը պարփակելուն ուղղված գործողություններ են արել:

Նախօերին Նիկոլ Փաշինյանը նշեց, որ դեռևս շուրջ 250 ադրբեջանցիներ գտնվում են ՀՀ պետական սահմաններից ներս` Սյունիքի և Գեղարքունիքի մարզերի որոշ հատվածներում: Ըստ Նիկոլ Փաշինյանի, այս սադրանքը կարող է ունենալ ոչ թե տեղային խնդիրներ լուծելու, այլ ռազմական բախում առաջացնելու նպատակ։ Հիշեցնեմ, Ադրբեջանը հայտարարել է 15 հազար զինծառայողների մասնակցությամբ լայնածավալ զորավարժություններ անցկացնելու որոշման մասին:

Ստեղծված իրավիճակում հնարավոր մի քանի քայլերից ՀՀ-ն, ըստ էության, ընտրել է երկուսը միաժամանակ։ Բանակցություններ ադրբեջանական կողմի հետ եւ դիմել ՀԱՊԿ-ին։ Բանակցությունները ըստ շրջանառվող տեղեկությունների վերջնական համաձայնությունների ու արդյուքների չեն հանգեցրել, դրանք այսօր էլ շարունակվում են։

Դառնանք ՀԱՊԿ-ին։ Նիկոլ Փաշինյանն ասում է, թե «Ստեղծված իրավիճակը լիարժեքորեն համապատասխանում է ՀԱՊԿ 2-րդ հոդված 2-րդ պարբերությանը, համաձայն որի ՀԱՊԿ-ի «մեկ կամ մի քանի մասնակից պետությունների անվտանգությանը, տարածքային ամբողջականությանը և ինքնիշխանությանը սպառնացող վտանգի կամ միջազգային խաղաղությանն ու անվտանգությանը սպառնացող վտանգի դեպքում մասնակից պետություններն անմիջապես կակտիվացնեն համատեղ խորհրդակցությունների մեխանիզմը` իրենց դիրքորոշումները համակարգելու և ծագած սպառնալիքը վերացնելու նպատակով միջոցներ ձեռնարկելու համար։

Այսպիսով ՀՀ-ն դիմել է ՀԱՊԿ-ին հենց այս հոդվածով։ Մինչդեռ շատերի մոտ հարց է առաջանում, թե ինչու այս հոդվածով, որը վերաբերում է այն դեպքերին, երբ ՀԱՊԿ անդամ պետությունը ենթարկվում է անվտանգության, կայունության կամ տարածքային ամբողջականության հետ կապված սպառնալիքի, եւ ենթադրում է զուտ խորհրդատվությունների նախաձեռնում, եւ ոչ 4-րդ հոդվածով, որը վերաբերում է ագրեսիայի դեպքերին եւ նախատեսում անմիջապես ռազմական օգնության տրամադրում։ Սա ագրեսիա՞ է, թե՞ սպառնալիք։ Հայաստա՞նն է գնահատել, որ սա սպառնալիք է, թե՞ ՀԱՊԿ-ից են հուշել։ Ինչեւէ։ Հետաքրքիր է, թե ինչպիսին կլինի ՀԱՊԿ արձագանքը։

ՀԱՊԿ-ը կդիմի Ադրբեջանին վերջնագրային տոնո՞վ, սպառնալով ռազմական գործողություններով, թե՞ կդիմի Հայաստանին՝ փորձելով հարցը լուծել սահմանային գոտում խաղաղապահներ տեղակայելու տարբերակով։ Ենթադրել կարելի է, բայց ժամանակից առաջ չընկնենք։ Սպասենք ՀԱՊԿ արձագանքին։