Ի դեպ. Նիկոլ Փաշինյանի չընտրության 1-ին փուլի մասին
ADTVԻ դեպ, այսօր մեկնարկեց Նիկոլ Փաշինյանի եւ Խորհրդարանական երկու խմբակցությունների ղեկավարների՝ Գագիկ Ծառուկյանի եւ Էդմոն Մարուքյանի քաղաքական պայմանավորվածությունն իրականացնելու գործընթացը։ Իսկ այդ պայմանավորվածությունն ինչես հայտնի է, արտահերթ ընտրությունների անցկացումն է։ Ըստ այդմ, վարչապետի հրաժարականից հետո ԱԺ-ն երկու շաբաթում երկու անգամ վարչապետ չի ընտրում, խորհրդարանը արձակվում է եւ գնում ենք արտահերթ ընտրությունների։ Այս տրամաբանությամբ էլ ԱԺ-ն այսօր հատուկ նիստ էր հրավիրել, որի ընթացքում տեղի ունեցավ վարչապետի ընտրության, այս դեպքում ավելի ճիշտ կլինի ասել ՝ վարչապետի չընտրության առաջին փորձը։
Ի դեպ, նիստին չէր մասնակցում ԲՀԿ-ն։ Խմբակցության քարտուղարն ասաց, որ չեն մասնակցում, քանի որ այն տեխնիկական բնույթ կրող նիստ է։ Ինչեւէ.«Իմ քայլ»-ի կողմից առաջադրված վարչապետի թեկնածու Նիկոլ Փաշինյանը ելույթ ունեցավ, պատասխանեց հարցերին, որից հետո էլ տեղի ունեցավ քվեարկությունը: Որպեսզի հունիսի 20-ին տեղի ունենան ընտրություններ այսօր Նիկոլ Փաշինյանի թեկնածությունը պետք է մերժվեր եւ այդպես էլ եղավ, անականկալներ չեղան։
Ձայների 1 կողմ, 3 դեմ և 75 ձեռնպահ արդյունքով, Նիկոլ Փաշինյանի թեկնածությունը չընդունվեց։ Հիշեցնեմ, Վարչապետ չընտրվելու դեպքում քվեարկությունից յոթ օր հետո անցկացվում է վարչապետի նոր ընտրություն, որին մասնակցելու իրավունք ունեն պատգամավորների ընդհանուր թվի առնվազն մեկ երրորդի առաջադրած վարչապետի թեկնածուները: Այդ դեպքում վարչապետի թեկնածուները կարող են առաջադրվել սույն հոդվածի 5-րդ մասով նախատեսված քվեարկությունից հետո` վեց օրվա ընթացքում: Եթե անվանական քվեարկությամբ, պատգամավորների ընդհանուր թվի ձայների մեծամասնությամբ վարչապետ չի ընտրվում, ապա Ազգային ժողովն արձակվում է իրավունքի ուժով:
Իսկ հնարավո՞ր է, որ վարչապետի ընտրություն 2-րդ փուլում անսպասելի անակնկալներ լինեն, պատգամավորների առնվազն մեկ երրորդը վարչապետի այլ թեկնածու առաջադրի։ Տեսականորեն չի բացառվում եւ այդ մասին խոսեց նաեւ վարչապետի պաշտանակատար Նիկոլ Փաշինյանը։ Մեջբերում. «Այս ընթացքում շահարկումներ են լինում այն մասին, որ ինչ-որ մի պահի ինչ-որ ուժեր փորձելու են երկրորդ փուլում այլ սցենար զարգացնել: Եթե այդպիսի փորձեր լինեն, պայմանավորվածությունների խախտում լինի, մենք ունենք պատրաստի լուծում՝ «Իմ քայլը» խմբակցությունը կընտրի վարչապետ: Ես հույս ունեմ, որ պայմանավորվածությունները որևէ կերպ խախտելու փորձեր չեն արվի»,- ասաց Նիկոլ Փաշինյանը: Դե ինչ, սպասենք վարչապետի չընտրության երկրորդ փուլին։
