Ի դեպ, Ալիեւի ագրեսիվ հայտարարության եւ Փաշինյանի՝ Սյունիք կատարած այցի մասին
ADTVԻ դեպ, այսօր բավական լարված իրավիճակ էր Սյունիքում։ Վարչապետ Նիկոլ Փաշինյանի աշխատանքային այցն ուղեկցվեց բողոքի ակցիաներով, ճանապարհներ փակելով, վարչապետի հասցեին հնչող տհաճ վանկարկումներով։
Տհաճ այնքանով, որ հասել ենք այն օրին, երբ նման վանկարկումներ են հնչում երկրի թիվ մեկ պաշտոնյայի հասցեին։ Իհարկե, այս իրավիճակի խորքում նաեւ ներքաղաքական, նախընտրական շերտ կա, սակայն առաջին պլանում այն իրական տագնապներն են, որոնք կապված են Մեղրիի շուրջ խմորումներով։ Հատկանշական է, որ վարչապետի այցը հաջորդել էր Ադրբեջանի նախագահ Իլհամ Ալիեւի հերթական ագրեսիվ հայտարարությանը՝ ուղղված ՀՀ տարածքային ամբողջականությանը։ Նա հայտարարել է, մեջբերում եմ՝ «Զանգեզուրի միջանցքի ստեղծումը լիովին համապատասխանում է մեր ազգային, պատմական և ապագա շահերին: Մենք կիրականացնենք Զանգեզուրի միջանցքի խնդիրը` կցանկանա դա Հայաստանը, թե ո՛չ:
Եթե Հայաստանը ցանկանա, խնդիրը կարելի է լուծել շատ հեշտ, եթե ոչ՝ մենք դա կլուծենք ուժով: Այսպիսով, ադրբեջանցի ժողովուրդը կվերադառնա գրավված Զանգեզուր 101 տարի հետո»։ Ադրբեջանի նախագահի «101 տարի անց Զանգեզուր վերադառնալու» հայտարարությանն արձագանքեց ՀՀ ԱԳՆ մամուլի խոսնակը: Նա խստորեն դատապարտեց Հայաստանի տարածքային ամբողջականության դեմ Ադրբեջանի նախագահի նկրտումները, Ադրբեջանի կողմից ուժ կիրառելու սպառնալիքները, հայտարարեց, որ Հայաստանը մշտական կապի մեջ է իր ռազմավարական դաշնակցի, ինչպես նաև Հարավային Կովկասում խաղաղությամբ շահագրգռված բոլոր գործընկերների հետ:
Հենց այստեղ է, որ հարցեր են առաջանում կապված մեր ռազմավարական դաշնակցի եւ հարավային Կովկասում խաղաղությամբ շահագրգիռ գործընկերների հետ։ Ադրբեջանը, կամ որ նույնն է՝ Թուրքիան, սպառնում է Հայաստանի՞ն, թե իր ռազմավարական գործընկեր Ռուսաստանին։ Գուցե փոխհամաձայնեցվա՞ծ սպառնալիք է, որ վերջին պահին ռազմավարական գործընկերը գա մեզ փրկի, ինչ որ բան զիջելով։ Իսկ ի՞նչ էր նշանակում ԱՄՆ-ի դեսպանի այցը Սյունիք։ Արդյո՞ք սա ԱՄՆ արձագանքն է Սյունիքի նկատմամբ թուրք ադրբեջանական նկրտումների, ՀՀ տարածքային ամբողջականության կարեւորումով։
Տարածաշրջանային խաղացողների կողմից նախընթաց հայտարարությունները՝ Իրանից մինչեւ ԱՄՆ,ՀՀ նախագահի, ՄԻՊ-ի վերջին այցերը մեկ բանի մասին են խոսում՝ Սյունիքում լուրջ խմորումներ են, շահերի բախումներով ու զարգացման տարբեր սցենարներով։ Իսկ ՀՀ ԱԳՆ-ն հայտարարում է, որ կձեռնարկվեն անհրաժեշտ միջոցները՝ երկրի ինքնիշխանությունը և տարածքային ամբողջականությունը պաշտպանելու համար:
