Ի դեպ. Նախագահը չի ստորագրում «ՀՀ ընտրական օրենսգիրքը եւ չի դիմում ՍԴ
Ի դեպԻ դեպ, անցած շաբաթ օրը ՀՀ նախագահի աշխատակազմը հայտարարություն է տարածել «ՀՀ ընտրական օրենսգիրք» սահմանադրական օրենքում փոփոխություններ և լրացումներ կատարելու մասին» օրենքի վերաբերյալ: Հաղորդագրության մեջ նշվում է, որ Հանրապետության նախագահն Օրենքը քննարկել է մի շարք կուսակցությունների ղեկավարների, քաղաքական գործիչների, կենտրոնական ընտրական հանձնաժողովի ներկայացուցչի հետ, լսել նրանց կարծիքներն ու դիտարկումները: Ուսումնասիրությունները հանգեցրել են այն եզրակացության, որ սահմանադրականության տեսանկյունից Օրենքն առերևույթ խնդրահարույց չէ: Խնդրահայրուց չէ, սական նախագահը չի ստորագրելու օրենքը եւ ուշադրություն՝ չի դիմելու ՍԴ։ Ինչու չի ստորագրելու՝ նախագահի աշխատակազմը բերում է մի քանի սկզբունքային դիտարկումներ։ Դրանցից մեկն այն է, որ Օրենքն ընդունվել է Ազգային ժողովի միայն քաղաքական մեծամասնության քվեարկության արդյունքում: Մինչդեռ
Նախագահը գտնում է, որ արտահերթ ընտրությունները կազմակերպելուն պետք է նախորդի Սահմանադրության, ինչպես նաև Ընտրական օրենսգրքի համապարփակ փոփոխությունների գործընթացը, որը պահանջում է ողջամիտ ժամկետ և իրականացվի լայն հանրային, քաղաքական քննարկումների արդյունքում, կարծիքները լսելով և հաշվի առնելով: Մյուս դիտարկումն առնչվում է Վենետիկի հանձնաժողովի մոտեցումներին։ Ըստ այդմ ընտրական օրենսդրության փոփոխությունները պետք է տեղի ունենան առնվազն ընտրություններից մեկ տարի առաջ: Նախագահն արձանագրում է նաեւ, որ Օրենքով վերացվում է այսպես կոչված «ռեյտինգային» համակարգը: Նախագահի գնահատմամբ առանց տարածքային ցուցակների համամասնական ընտրակարգը կարող է արդյունավետ լինել խորհրդարանական կայացած քաղաքական մշակույթ ձևավորած պետություններում։ Հիմա, ինչ է լինում, երբ նախագահը չի ստորագրում եւ չի դիմում ՍԴ։ Առանձնապես ոչինչ։ Սահմանված ժամկետից հետո օրենքը ստորագրվում եւ հրապարակվում է ԱԺ նախագահի կողմից։
Եվ ուրեմն, ինչ է ասում ՀՀ նախագահն իր այս քայլով։ Շատ պարզ՝ քաղաքական անհամաձայնություն, եթե կուզեք դեմարշ։ Արմեն Սարգսյանն հիշեցնում է իր ուղերձը՝ վարչապետի հրաժարականի ու արտահերթ ընտրությունների մասին, սակայն ոչ Նիկոլ Փաշինյանի օրակարգով։ Մինչդեռ Նիկոլ փաշինյանն առաջ է մղում իր օրակարգը, ընդուպ նույնիսկ ՖԲ գրառման միջոցով ընտրությունների օրը սահմանելով, ինչի իրավունքը ՀՀ նախագահինն է, այն էլ վարչապետի հրաժարականից հետո։Հիմա հարց է առաջանում, թե այդ ինչու վարչապետը կարող է շրջանցել նախագահի լիազորությունները, իսկ նախագահը պետք է վերցնի ու ստորագրի «Իմ քայլի» քվեարկած օրենքը։ Դուք նախաձեռնել եք, դուք քվեարկել եք, դուք էլ ստորագրեք՝ ինձնից հեռու, ինչպես ասում են՝ «ՁԵր մուրը Ձեր գլուխը»։
