Ի դեպ. ՀՀ նախագահը հերթական անգամ դիմում է ՍԴ
Ի դեպԻ դեպ, Հանրապետության նախագահը նորից որոշել է դիմել Սահմանադրական դատարան, այս անգամ՝ «Հայաստանի Հանրապետության դատական օրենսգիրք» սահմանադրական օրենքում լրացումներ և փոփոխություններ կատարելու մասին» օրենքի և հարակից օրենքների՝ Սահմանադրության համապատասխանության հարցը որոշելու խնդրանքով: Ինչպես ասում են՝ Հայաստանի դատական համակարգը, հեչ «հին դարդով» չի մնում։
Բանն այն է, որ անցած շաբաթ խորհրդարանական իշխող մեծամասնությունը որոշեց նոր լիազորություններ տալ ԲԴԽ-ին։ Ըստ այդմ՝ ցանկացած ֆիզիկական եւ իրավաբանական անձ կարող է դիմել ԲԴԽ-ին՝ պահանջելով վարույթ հարուցել դատավորի նկատմամբ եւ քննել այն։ Իշխանությունը սա ներկայացնում է որպես բարեփախում, որպես դատաիրավական ռեֆորմի կարևոր բաղադրիչներից մեկը, որը հնարավորություն կտա դատական համակարգը դուրս բերել նախկին կառավարող համակարգի ազդեցությունից: Այս տեսակետի հետ բնականաբար կտրականապես համամիտ չեն դատական համակարգում։
Նրանք նշում են, որ այս փոփոխությունը ապօրինի է, հակասահմանադրական, եւ որ իրենք չեն հանդուրժելու իրենց վարույթում գտնվող գործին զուգահեռ վարույց հարուցվի իրենց իսկ նկատմամբ, կախվածության մեջ դնի կողմերից ու ԲԴԽ-ից։ Եվ ընդհանրապես այս փոփոխություններին դեմ հանդես եկող դատավորներն ու իրավաբանները գտնում են, որ սա դատական համակարգը վերահսկողության տակ վերցնելու թաքնված նպատակներ ունի։ Եվ մինչ Դատավորներն այս փոփոխության վերացմանը հասնելու համար պատրաստվում են բողոքարկել դատական ճանապարհով՝ դիմել ՍԴ, ՄԻԵԴ, այլեւ անգամ պատրաստ են ցույցի դուրս գալ, կենացները ինչպես ասում են, քաղցրացրեց Արման Բաբաջանյանի «Հանուն Հանրապետության» կուսակցությունը, հայտարարելով, որ ապրիլի 16-ին բողոքի ակցիա է կազմակերպելու Բարձրագույն դատական խորհրդի շենքի մոտ։
Ակցիան լինելու է «Ընդդեմ Հայաստանի պետականության եւ ժողովրդի իշխանության դիրքավորված դատավորների», վերտառությամբ, մասնակցելու են փաստաբաններ, իրավաբաններ, տուժած քաղաքացիներ։ Եվ ահա, այս խառը իրավիճակում իր հերթական «ձիով քայլը» կատարեց ՀՀ նախագահը։ Նա, զրուցելով մասնագետների հետ, եկել է եզրակացության, որ Օրենքով առաջարկվող կարգավորումներն իրավիճակային են և առերևույթ խնդրահարույց, առերևույթ հակասում են Սահմանադրությանը, ուստի որոշել է դիմել Սահմանադրական դատարան՝ օրենքի Սահմանադրության համապատասխանության հարցը որոշելու խնդրանքով: Գնդակը նորից ՍԴ-ի դաշտում է։
