Ի դեպ. «Հայրենիքի փրկության շարժման» անելիքների մասին՝ Բաղրամյան պողոտան բացելուց հետո
ADTVԻ դեպ, արտախորհրդարանական ընդդիմության մի հատվածը ներառող «Հայրենիքի փրկության շարժումը», որ արդեն տեւական ժամանակ հանրահավաքներ, բողոքի գործողություններ ու անհնազանդության ակցիաներ էր իրականացնում գործող իշխանությունների դեմ, նախօրեին որոշեց բացել Բաղրամյան պողոտան։ Շարժումը արձանագրում է, թե իրենց հաջողվել է ձևավորել հանրային լայն համախմբում եւ որ վարչախումբը թեև դանդաղ, սակայն հանրային լայն ճնշման ազդեցության տակ տեղի է տալիս: Շարժումը որոշել է բացել Բաղրամյան պողոտան, միաժամանակ սկսել քաղաքական ակցիաների նոր ալիք՝ ընդլայնելով գործողությունների աշխարհագրությունն ու մարզերի բնակչության ընդգրկվածությունը:
Առաջիկայում ենթադրվում է, որ շարժումը որոշ գործողություններ ու ակցիաներ կնախաձեռնի նույն օրակարգային կոչերով ու բառամթերքով, սակայն ակնհայտ է, որ այդ օրակարգը, այն է՝ հանրային ճնշման միջոցով հասնել վարչապետի հրաժարականին, ձեւավորել ժամանակավոր կառավարություն Վազգեն մանուկյանի գլխավորությամբ եւ մեկ տարի հետո անցկացնել խորհրդարանական ընտրություններ, ավելի ու ավելի անիրատեսական է դառնում։
Շարժումը հարկադրված է ի գիտություն ընդունել իշխանության եւ խորհրդարանական ընդդիմության համաձայնությամբ ձեւավորված քաղաքական օրակարգը եւ մտածել այդ ուղղությամբ, այն է՝ մասնակցել կամ չմասնակցել հունիսի 20-ին նախանշված խորհրդարանական ընտրություններին։ Հաշվի առնելով շարժման մեջ ընդգրկված առանձին կուսակցությունների հայտարարությունները, տրամաբանական է, որ շարժումն այս ֆորմատով այլեւս ավարտված է։ ԲՀԿ-ն, որ միաժամանակ ներկայացված է եւ խորհրդարանում եւ արտախորհրդարանական այս ֆորմատում, արդեն հայտարարել է, որ մասնակցելու է ընտրություններին առանձին, «Հայրենիքը» եւս հայտարարել է ընտրություններին մասնակցելու մտադրության մասին, ՀՀ 2-րդ նախագահը եւս մասնակցելու է՝ բնականաբար դաշինքով, մնացին մյուսները։ Հետաքրքրական է, թե ինչպիսին կլինի ՀՀԿ-ի եւ ՀՅԴ-ի դիրքորոշումները։ ՀՀԿ-ի մասով դեռ հստակություն չկա։ Ենթադրվում է, որ ՀՀԿ-ն կամ կվերանայի Փաշինյանի վարչապետության պարագայում ընտրություններին չմասնակցելու որոշումը, իսկ դա, խոստովանենք, չի լինի անհույս մասնակցություն՝ հաշվի առնելով նույնիսկ հեղափոխական էյֆորիայի ժամանակ հավաքած շուրջ հին տոկոսը, կամ որպես կուսակցություն չի մասնակցի, սակայն քաղաքական կշիռ ունեցող հանրապետականները կընդգրվեն այս դաշտում ձեւավորվելիք դաշինքի ցուցակում։
Նույնը կարելի է ասել ՀՅԴ-ի մասին։ Ի դեպ, արդեն մամուլում տեղեկություններ են շրջանառվում, որ ընդդիմության այս հատվածի լիդերներըն արդեն քննարկում են ընտրություններին դաշինքով թե առանձին մասնակցելու հարցերը։ Ավելին, ըստ օդում կախված լուրերի, արդեն ձեւավորվում է «Քոչարյան դաշինքի» նախընտրական ցուցակը։
