Գործարար, «Թովմասյան» բարեգործական հիմնադրամի տնօերն, «Դվին» հյուրանոցի սեփականատեր Արտակ Թովմասյանն այսօր լրագրողների հետ հանդիպման ժամանակ հայտարարեց, որ առաջիկայում մտադիր են կուսակցություն ստեղծել՝ այն դեռ ռեգիստրացիայի փուլում է։ Նա ասաց, որ կուսակցության անունը դեռ որոշված չէ, իսկ անդամների հավաքագրումը դեռ ընթացքի մեջ է։
«Ունենում ենք հազարավոր նամակներ և առաջարկություններ, ովքեր իրենց մասնակցության ցանկությունն են հայտնում։ Մենք ակտիվ փուլում ենք, քննարկում ենք, հանդիպումներ ենք անցկացնում։ Փորձում ենք ամեն ինչ անել, որպեսզի չսխալվենք մեր թիմակիցների հարցում»,-ասաց նա։
Պատասխանելով լրագրողներից մեկի հարցին, թե կարող են իրենց պայքարը օրինականության սահմաններում, սակայն փողոց տեղափոխել՝ Թովմասյանը պատասխանեց. «Մեր նպատակը փողոցային շարժումներն անելը չէ, մենք գիտենք աշխատելու ձև և անելու ենք դա գործով։ Լայվ մտնելով, անընդհատ ասելով, պետք է շատ երկար ժամանակ ունենաս, որ լայվ մտնես, դրա համար նախընտրում ենք գործը»։
Նա տեղեկացրեց, որ այս պահին 17+-ին միանալու ցանկություն կամ պահանջ չունեն և որ իրենց միակ ընդհանրությունը՝ կառավարության հրաժարականի պահանջն է։
«Մեր ցանկությունն է ստեղծել նոր ուժ, այդ նոր ուժի մեջ, արդեն մի անգամ ես ասել եմ, ընդգրկված կլինեն պրոֆեսիոնալներ և ամենակարևորը որ լինեն ոչ քաղաքական»,-հայտարարեց Թովմասյանը։
Նա կարևորում է, որ իրենց համար չկա հին և նոր, այլ կա հայ և Հայաստան։
ArmDaily.am-ի հարցին ի պատասխան, Թովմասյանը նշեց.«17+-ի սխալին կամ ճշտին գնահատական տալ չեմ կարող։ Բայց Վազգեն Մանուկյանին կբնութագրեմ որպես նորմալ, գիտակից, անկախ մարդ։ Եվ եթե իմ անձնական կարծիքն արտահայտեմ՝ շատ լոյալ է, 17-ի կողմից նա առաջարկվում է որպես նեյտրալ, ոչ մի պետական իշխանությանը կամ ընտրություններին մասնակցելու միտումներ ունեցող անձ։ Դրա համար ինձ թվում է մեր ժամանակավոր կառավարության համար նա կարող էր լինել շատ հարմար թեկնածու։ 17+-ի գործունեության վերաբերյալ գնահատական չեմ կարող տալ, քանի որ իրենց հանդիպումներին չեմ մասնակցել և իրենց միտումներին մանրամասն ծանոթ չեմ։ Բայց տեսնելով , հասկանալով, որ ունեն պլան,բայց այդ պլանը մինչև հիմա չի իրականացել՝ ինձ թվում է ամեն մեկս էլ հասկանում ենք։ Բայց դա պայքար է, որը նորմալ է։ Իրենք իրենց տեսակետն ունեն շարժման ու ըստ դրա շարժվում են։ ժամանակը ցույց կտա, թե դա ինչի կարող է հանգեցնել»,-պատասխանեց Արտակ Թովմասյանը։
Խնդրեցինք անդրադառնալ նաև կոմունիկացիաների ապաշրջափակմանն ու սահմանների բացման հետևանքով Թուրքիայի և Ադրբեջանի հետ տնտեսական հարաբերությունների հաստատմանը, նա ասաց, որ ով ուզում է գա, ով ուզում է լինի՝ տնտեսության վիճակը շատ մեծ է.«Ով ուզում է լինի, ով ուզում է գա, թե Վազգեն Մանուկյանը ժամանակավոր, թե նոր թիմ, թե նախկին իշխանություն՝ տնտեսական պրոբլեմները լինելու են։ Եթե համեմատենք 1994 թվականից հետո և 2020 թվականից հետո Հայաստանի իրավիճակը, ապա դրանք շատ տարբեր են։ Այն ժամանակ մենք ունեին հաղթանակած ազգ՝ գլուխը բարձր, չնայած արտահոքը կար՝ մոտ 600.000 մարդ լքել էր Հայաստանը, բայց բոլորը ավելի հպարտ էին իրենց կարգավիճակից, որ իրենք հաղթել էին։ Դրա հետ միասին մեր տնտեսությունը տասը տարի, եթե ոչ ավել՝ ուներ պրոբլեմներ, որոնք կարողացանք հաղթահարել 7-10 տարվա ընթացքում։ Տվյալ պարագայում Քովիդը մի կողմից, միջազգային անկումը տնտեսական, ռեցեսիան գլոբալ, որը որ սպասվում է այս տարի մյուս կողմից, աշխարհի բոլոր երկրներն են ճգնաժամի մեջ, բայց մենք կրկնապատիկ ճգնաժամի մեջ ենք, որովհետև հիմա մենք բարոյահոգեբանական ճգնաժամի մեջ ենք։ Մեր ամբողջ սփյուռքն է նույն այդ վիճակին»,-ասաց Թովմասյանը։
Գործարարը հայտնեց նաև, որ սփյուռքի մի շարք գործիչներ հիմնադրամից հաշվետվություններ են պահանջել ու պայման դրել հետ վերադարձնել իրենց գումարները, քանի որ դրանք ծախսվել են ոչ այն նպատակների համար, ինչի համար հավաքվել են։ Արտակ Թովմասյանը մտահոգիչ համարեց, որ հիմնադրամի գումարները կառավարությանը տրամադրելուց հետո Սփյուռքն այլևս վստահություն չունի հիմնադրամի նկատմամբ և այլևս չի օգնի այս կառավարությանը։
«Եթե այն ժամանակ մեզ օգնում էին՝ հիմա կարող է այդ օգնությունը չլինի, որովհետև իշխանություն հանդեպ հավատը հավասարվել է զրոյի»,-նկատում է «Թովմասյան» բարեգործական հիմնադրամի տնօրենը։
Վերջինս անդրադարձավ նաև պատերազմի օրերին բանակին հասցված նյութատեխնիկական հսկայական վնասին, որը տարիներ շարունակ համալրվել էր, իսկ այժմ այդ բացը պետք է համալրել 3 անգամ ավելի շատ գումարով։
«Անդրադառնալով բանակին, պետք է ասեմ, որ մեր բանակը արել է ամեն ինչ ու մինչև վերջ կանգնած է եղել մեր ազգային հետաքրքրությունների համար։ Տարիներով համալրված զինանոցը դատարկվել է՝ դա պետք է համալրել։ Բյուջեն պետք է եռապատկվի, քառապատկվի, որը չկա։ Այսինքն, մենք ունենք տնտեսական մեծ պրոբլեմներ, որոնք կանգնքած են մեր ազգի առաջ։ Դրա համար պետք է լինելն համապատասխան պրոֆեսիոնալներ, բիզնես պատկերացումներ ունեցող անձեր, խմբեր, որոնք կարողանան աջակցել մեր պետությանը ու հասցնել այն կարճ ժամանակում հաղթանակների։ Կարևոր է նաև Արցախի հողերի կորուստը՝ հացահատաիկի մատակարարման, նաև մսի ու մրգի մատակարարաման խնդիրը»,- իր մտահոգությունը հայտնեց Թովմասյանը։
«Դվին» հյուրանոցի սեփականատերը նշեց, որ գների սանդղակի բարձրացում է լինելու, ինչը հարվածելու է քաղաքացու սպառողական զամբյուղին։
ArmDaily.am-ի այն հարցին, թե արդյոք Հայաստանի տնտեսությունը պատրաստ է դիմակայել թուրքական ու ադրբեջանական շուկային՝ Թովմասյանը պատասխանեց, որ մենք այսօր դրան պատրաստ չենք։ Միայն համագործակցությունը իհարկե կլիներ դրական։ Հարևանների հետ ավելի ճիշտ է նորմալ հարաբերություններ ունենալ, բոլոր ազգերն էլ ունեցել են պրոբլեմներ՝ Հնդկաստան-Պակիստան, Հնդկաստան-Չինաստան՝ այդպիսի օրինակները բազում են։
«Թուրքական ապրանքները, եթե համեմատենք հայկական ապրանքների հետ, իհարկե գնայինով նրանք մեզ վրա կարող են շատ մեծ ճնշում ունենալ, թե գնայինով, թե քանակով։ Ես դրա մեջ տեսնում եմ պրոբլեմներ, տեսնում եմ պրոբլեմներ անվտանգության հետ կապված՝ հատկապես պարենային սննդի մասով։ Մենք, լինելով ընդամենը 3 միլիոնանոց ազգ, պետք է որ մեր պարենային ինքաբավության հարցը լուծած լինեինք։ Բայց ամեն պրոբլեմի մեջ միշտ լուծում կա, պարզապես պետք է այդ պրոբլեմի մեջ խորանալ ու լուծման տարբերակներ փնտրել»,- պատասխանեց Արտակ Թովմասյանը։
