Ի դեպ. ԲՀԿ, ՀՅԴ «Հայրենիք» կուսակցությունների համատեղ հանրահավաքի մասին
Ի դեպԻ դեպ, այսօր ԲՀԿ, ՀՅԴ եւ Հայրենիք կուսակցությունները հայտարարել են համապետական հանրահավաք անցկացնելու մասին:Նկատենք, ի սկզբանե ԲՀԿ-ն էր խոսում մեծ հանրահավաքի մասին, Գագիկ Ծառուկյանն անձամբ հանդիպումներ էր ունենում տարբեր համայնքներում, նախապատրաստելով առաջիկա հանրահավաքը։ Իշխանության ներկայացուցիչները հայտարարում էին, թե ԲՀԿ-ն իր ակտիվությամբ ընդամենը փորձում է ապահովել հարուցված քրեական գործերի քաղաքական փաթեթավորումը։ Եւ առնվազն հրապարակային խոսքի մակարդակում հեգնանքով էին արտահայտվում, թե մեզ հանրահավաքով եք վախեցնո՞ւմ, մենք անհամբեր սպասում ենք ԲՀԿ բազմահազարանոց հանրահավաքին։
ԲՀԿ-ն էլ երկար սպասեցնել չտվեց եւ գործընկերների հետ հայտարարեց հանրահավաքի օրը՝ հոկտեմբերի 8։ Հասկանալի է, որ քաղաքական թեժ աշնան մեկնարկն ազդարարող հավաքը հնարավորինս բազմամարդ դարձնելու համար այս երեք կուսակցությունները կներդնեն իրենց կարողություններն ամբողջությամբ։ Հավաքի բազմամարդության առումով ինչիպիսի պատկեր կլինի՝ առայժմ դժվար է կանխատեսել։ Ի՞նչն է միավորել այս երեք կուսակցություններին։ Ակնհայտ է, որ խոսքը գաղափարախոսական ընդհանրությունների մասին չէ, այստեղ մեկտեղվել են աջերն ու սոցիալիսստները։
Միավորողը մեկ բան է՝ հասնել կառավարության, վարչապետի հրաժարականին, զարգացումները հասցնել մինչեւ արտահերթ խորհրդարանական ընտրություններ։ Այս մասին, տարբեր ձեւակերպումներով մեկ անգամ չէ, որ հայտարարել են այս երեք կուսակցությունների ղեկավարները։ Թե ինչի մասին են խոսելու՝ սա էլ խիստ կանխատեսելի է։ Բանախոսները կոշտ եւ պատկերավոր լեզվով քննադատելու են գործող իշխանությունների գործունեությունը՝ ներքինից մինչեւ արտաքին քաղաքականություն, համավարակի դեմ պայքարի ձախողումից մինչեւ տնտեսության վիճակ, ազգային արժեքներ, մշակույթ ու սպորտ։
Իսկ եզրակացությունն այն է լինելու, որ գործող կառավարությունն իր անկարող ու անփորձ կադրերով վիճակի չէ լուծել երկրի առաջ ծառացած խնդիրները ու զարգացման ուղիներ մշակել, փոխարենը հեքիաթներ է պատմում 2050թ-ի մասին։ Եւ քանի որ կառավարությունը տապալվել է բոլոր ուղղություններով, պիտի հեռանա: Իսկ թե հանրահավաքի վերջում դեղին քարտ ցույց կտան, թե կարմիր, կախված կլինի հանրահավաքի բազմամարդությունից։
Շարունակությունը՝ հաջորդիվ, ըստ իրավիճակի։ Եւս մեկ ի դեպ. Մինչ այս երեք կուսակցությունները պատրաստվում են հոկտեմբերի 8-ի հանրահավաքին, ըստ մամուլում շրջանառվող տեղեկությունների, հենց վաղը դատարանը կքննի ԲՀԿ առաջնորդ Գագիկ Ծառուկյանին կալանավորելու վերաբերյալ ԱԱԾ միջնորդությունը։Ինչպես ասում են, կենացները քաղցրանում են, թեժ աշունը մեկնարկում է։Հետեւենք իրադարձությունների հետագա զարգացումներին։
