avia.pro կայքը մասնագետներին հայտնի է որպես անհուսալի, սադրանքներ անող կայք. Կարեն Վրթանեսյանը՝ թուրքական F-16 կործանիչների Երևանին մոտենալու մասին

Ընդհանրապես հայտնի չէ, թե ովքեր են avia.pro կայքին հետևում, հնարավոր է ուղղակի սենսացիոն բաներ են գրում, որ այցելուներ ունենան, հնարավոր է ինչ-որ մեկի պատվերն են կատարում, կամ ինչ-որ մեկի պրոյեկտն է, որն ինչ-որ մեկի շահերն է առաջ տանում։ Հիմա ինչ էլ ասեմ՝ դա մաքուր սպեկուլյացիա է լինելու, որովհետև պարզ չէ, թե ում կայքն է, ում շահերից ելնելով է աշխատում։ Այս մասին ArmDaily.am-ի հետ զրույցում ասաց ռազմական փորձագետ Կարեն Վրթանեսյանն՝ անդրադառնալով avia.pro կայքի հրապարակմանն, ըստ որի թուրքական F-16 կործանիչները Հայաստանի մայրաքաղաքին են մոտեցել օդային հարվածի հեռավորության վրա։ Նա ընդգծեց, որ առաջին հայացքից այս կայքը օդուժի թեմայով մասնագիտացող կայք է, հետևաբար դժվար է զանազանել, թե որտեղ է իրական տեղեկատվությունը, որտեղ՝ կեղծ լրատվությունը։ «Մենք գիտենք, որ դա անհուսալի կայք է, ու կոնկրետ սադրանք է արել, որովհետև սա արդեն երրորդ դեպքն է, որ իրենցից ակնհայտորեն ոչ հավաստի տեղեկատվություն է տալիս, կամ իրական տեղեկատվությունը ներկայացնում է որպես արտառոց կամ սենսացիոն մի բան։ Քանի որ մենք ռազմական ոլորտի լուսաբանմամբ ենք զբաղվում, մեր աչքով այդ կայքն ընկել էր, միայն վերջին 20 օրվա ընթացքում այս կայքը արդեն 3 անգամ ակնհայտ ապատեղեկատվություն է տարածել։ Եթե մարդը մասնագիտորեն չի հետևում այդ թեմային՝ երևի թե դժվար է հասկանալ, որ ապատեղեկատվություն է, այս դեպքում պետք է տեղեկությունը ճշտել ռազմական փորձագետներից, կոնկրետ այս դեպքում կայքը թեմայով զբաղվող մարդկանց ծանոթ է որպես անհուսալի, սադրանքներ անող կայք»։

Նա ընդգծեց, որ քանի որ թուրք-ադրբեջանական համատեղ զորավարժություններ են ընթանում և Ադրբեջան են բերվել թուրքական F 15 ռազմական օդանավեր՝ շատ հնարավոր է, որ այդ տեղեկատվության վրա կայքը փորձեր խաղալ՝ նպատակ ունենալով վախեցնել, խուճապ տարածել, կամ վախեցնելով լինքեր տարածել ու գովազդից փող ստանալ։ «Վստահ պնդել, թե որ տարբերակն է՝ դժվար է, բայց ցանկացած դեպքում պետք է հաշվի առնել, որ սա անհուսալի կայք է»։

Անդրադառնալով Թուքիայի իրական գործողությունների դիմելու հավանականությանը՝ փորձագետն ասաց, որ Թուրքիան քաղաքականապես ակտիվորեն աջակցում է Ադրբեջանին, Թուրքիան սպառազինություն է տրամադրում Ադրբեջանին, պատրաստում է Ադրբեջանի զինվորականներին, մեծ թվով ադրբեջանցի զինվորականներ տարբեր մասնագիտությունների պրոֆիլների պատրաստություն են անցել Թուրքիայում, բացի դրանից հայ-թուրքական հարաբերությունները չի կարելի բարիդրացիական համարել։ «Այսինքն, բոլոր նախադրյալները, որ Թուրքիան, եթե հնարավորություն ունենա, հակահայկական քայլերի դիմելու՝ կդիմի։ Մենք այդ առումով կասկածելու որևէ բան չունենք։ Մեր խնդիրն այն է, որ Թուրքիային նման հնարավորություն չտանք, ավելին՝ Թուրքիան իր բոլոր հարևանների հանդեպ ինչ-որ ոտնձգություններ, ինչ-որ տարածքային կոնֆլիկտներ ունի և ունեցել է՝ ընդհուպ մինչև ներխուժում։ Այսինքն, Թուրքիան շատ անհուսալի և վտանգավոր հարևան է և նման սցենար բացառելը, այդ թվում՝ ռազմական սցենարը ես համարում եմ, որ իրատեսական է»։